PENGANTAR

Menurut Ishak Peutua Gam, naskah hikayat Tajul Muluk ini merupakan hasil salinannya sendiri yang dikerjakannya sekitar tahun 1970. Sumbernya adalah sebuah naskah lama yang tidak diketahui nama pengarang aslinya dan tahun penyusunannya. Hal ini diungkapkannya pada kesempatan bertemu dengan kami tanggal 20 Juni 1982 di kediamannya di Meureudu. Dikatakan- nya juga bahwa ia telah merobah beberapa kata yang terdapat dalam naskah sumber sesuai dengan selera bahasa yang dimiliki- nya. Namun tidak merobah jalan ceritanya. Naskah salinan huruf Arab ini kami peroleh dari Pusat Doku- mentasi dan Informasi Aceh bulah September 1981, dengan ukuran 21,5 cm X 16,5 cm. Tebalnya 401 halaman dan tiap halaman terdiri dari dua puluh lima baris. pengaruh mempengaruhi dalam jalan cerita hikayat Aceh nampak kuat dalam Tajul Muluk. Untuk bahan setudi perban- dingan, hikayat ini kiranya perlu dipelihara. Kami telah mengalih aksarakan hikayat yang cukup panjang ini kedalam huruf Latin dengan memberikan ringkasan ceritanya. Semoga ada gunanya bagi peminat kesusastraan daerah.

Penyunting

8ATMADM39

ini zuuM ujeT avad daleen .msO sut lse mmoasM. anihise mvmuaaajmkb gasy nibns almusnilse Beed aaloquam kabb gnav amal ralesn dsudoa deisba evavdmu20ve1 mudal .avanamuauvooq muder asb avaiks snaisgnsq sman muderlib ksa assaob amotod maisqmoad abeq avanclqslanuib iai laH -mslaleki0 .ubc5moM ib avoaameibsl ib 5801 imut OS lsssna1 jaqabvł gmey ai2 aqaieded dadotm dekat ai swdad agui svo blülimib gney sanded smboa aagaab isvese rodmma dadaan mahab .avtiaiheo aslsj ásdovsm lebb mumal4 .8va mao ma? hab dolomq imed imi dei bud aamilsa delaon nagasb .1891 tadmasqs2 dalud msaA ieemmotal asb jaetmem qab mab aamala 10b mvaisdsT .ms.81 X mo 2.15 mswau ahed aail duluq sub rtab hibrst nsmalsd dacA j8vad aifo nalei msiab kdomeg0sqmsm du1san9q -0sdiq kbuma pedad kunU .luioM buiaT amlab lauł 2sqman dilagnem dalej imaX .sudileqib ubaq evauil ini lsvald .asgmib aial kmiud meisbeal ini gmejasq quxua agay lavalid aalmsele svoenua she agome2 .avmsihmo msaaáamin asalisimom msgneb daioab paemasauol sakmeq laad gnitaavas9

RINGKASAN HIKAYAT TAJUL MULUK JILID I

Raja Zainul Muluk dari negari Syarikatan mempunyai empat orang putra. Sesudah kawin lagi dengan putri Kande Lilan baginda mendapat seorang putra lagi dan diberi nama Tajul Muluk. Menurut ahli nujun, Tajul Muluk akan menjadi seorang raja besar, tetapi baginda sendiri akan menjadi buta bila melihat anaknya itu. Sebab itulah baginda membuang Tajul Muluk yang masih bayi itu ke dalam hutan bersama ibunya Kande Lilan. Pada suatu hari ketika Zainul Muluk sedang berburu, secara kebetulan melihat anaknya. Baginda tidak mengenal anaknya yang sudah berusia tujuh tahun itu. Pada saat itulah mata baginda buta. Tajul Muluk dituduh mencelakakan mata raja. Ia ditangkap lalu dibuang ke dalam jurang. Menurut ahli nujum obat mata baginda ialah bunga Meungkawali. Keempat putranya disuruh mencari bunga mujarab itu dan barangsiapa yang berhasil akan diangkat menjadi raja meng- gantikan baginda. Dalam perjalanan mencari bunga Meungkawali mereka bertemu dengan Tajul Muluk yang ternyata masih hidup meskipun sudah dibuang ke dalam jurang. Mereka tidak menge- tahui bahwa Tajul Muluk adalah adik mereka sendiri. Tajul Muluk turut serta mencari bunga obat mata ayahnya. Ketika sampai di negeri Buni Yaman keempat bersau- dara itu dipenjarakan oleh Ratu Janu Hati akibat kalah main catur. Dalam permainan berikutnya Tajul Muluk dapat mengalah- kan Janu Hati sehingga ia diangkat menjadi raja negeri Buni Yaman sesuai dengan taruhan yang sudah disepakati. Janu Hati menjadi permaisurinya dan keempat saudaranya dibebaskan. Tetapi Tajul Muluk bersumpah tidak akan mendekati istrinya sebelum ia menemukan obat mata ayahnya. Dengan bantuan Janu Hati akhirnya Tajul Muluk sampai di negeri Peulinggoe Pura yang diperintah oleh raja Muzafasyah yaitu ayah putri Meungkawali. Dalam usaha mendapatkan bunga sakti itu Tajul Muluk harus kawin dengan putri Mahmuda yaitu anak ratu Ha-

milah yang bertanggung jawab atas bunga Meungkawali. Dengan susah payah akhirnya Tajul Muluk dapat memasuki mahligai putri Meungkawali dan memetik bunganya yang disebut bunga Meungkawali. Sesudah agak lama Tajul Muluk tinggal bersama putri Mahmuda ia teringat akan nasib ayahnya yang dalam keadaan buta itu. Dengan menunggang seekor kuda terbang bersama Mahmuda ia menuju negeri Syarikatan. Mereka singgah di Buni Yaman. Ke- mudian melanjutkan perjalanan bersama keempat saudaranya. Sebelum sampai di Syarikatan bunga Meungkawali dirampas oleh Hamidasyah yaitu abang Tajul muluk yang tertua dan ia sendiri dipukul dengan batu sampai pingsan. Disangkanya Tajul Muluk sudah mati. Bersama ketiga orang adiknya Hamidasyah melanjutkan perjalanan hingga sampai di istana orang tuanya. Baginda Zainul Muluk segera diobati dengan bunga Meungkawali sampai sembuh. Dengan bantuan ratu Hamilah Tajul Muluk sembuh kembali dan dipertemukan dengan kedua isterinya. Ia diterbangkan ke Syarikatan. Di suatu tempat agak jauh dari istana ayahnya, ia tinggal di sebuah istana yang dibangun oleh Dewi Hamilah. Dalam waktu singkat banyak penduduk datang bermukim di se- kitar istana Tajul Muluk. Adapun putri Meungkawali tatkala terbangun dari tidurnya heran melihat bunganya sudah hilang berikut cincinnya. Ia pergi mencarinya. Di negeri Syarikatan, Meungkawali menyamar se- bagai penjaga kuda raja. Pada suatu hari raja Zainul Muluk ber- kunjung ke istana Tajul Muluk bersama keempat orang putranya. Ikut pula penjaga kudanya, Meungkawali. Dalam pertemuan itulah, atas keterangan Janu Hati berbuka rahasia bahwa sebenar- nya yang menemukan bungà Meungkawali adalah Tajul Muluk. Dalam kesempatan itu pula Meungkawali bertemu dengan Tajul Muluk dan jatuh hati kepadanya. Taul Mulukpun kagum melihat kecantikan Meungkawali. Tetapi Meungkawali segera terbang ke negerinya. Di sana ia memarahi Dewi Hamilah yang telah membantu Tajul Muluk memetik bunganya. Hamilah me-

ngatakan bahwa ia sengaja memberi jalan kepada Tajul Muluk supaya ia jatuh cinta kepadanya. Dengan alasan itu Meungkawali tidak marah lagi. Secara menyamar Tajul Muluk terbang ke istana Meungkawali. Siang ia berupa seekor burung dan malam hari menjelma sebagai manusia. Lama kelamaan hal itu diketahui oleh ibu Meungkawali yang tidak senang melihat anaknya bergaul dengan manusia. Meungkawali di penjarakan, dan Tajul Muluk dilempar ke udara dan jatuh di laut. Berkat sebuah azimat, Tajul Muluk sampai di sebuáh kolam dan secara kebetulan bertemu dengan adik sepupu Meungkawali bernama Ruhul Afda yang menjadi tawanan Jin Hitam. Ia dapat membebaskan Ruhul Afda. Putri ini berjanji akan mengembalikan Meungkawali kepada Tajul Muluk. Dalam suatu adu sakti dengan Tajul Muluk raja Jin Hitam tewas. Mengetahui adik sepupunya sudah bebas Meungkawali bermohon kepada orang tuanya supaya ia dibebaskan, dengan janji tidak akan berhubungan lagi dengan manusia. Ruhul Afda menceritakan kepada Meungkawali bahwa ia ditolong oleh se- orang pemuda bangsa manusia dari negeri Syarikatan. Adapun Tajul Muluk sudah bertekad akan melawan ayah Meungkawali jika ia tetap melarang putrinya berhubungan de- ngannya. Akhirnya atas desakan Ruhul Afda, raja Muzafasyah menikahkan Meungkawali dengan Tajul Muluk, dan tiada berapa lama kemudian ia diangkat menjadi raja Peulinggoe Pura meng- gantikan raja Muzafasyah yang sudah lanjut usia. Tajul Muluk memerintah negeri dengan adil sehingga namanya dikenal di seantero negeri dan Peulinggoe Pura berada dalam keadaan aman dan makmur. Jakarta Nopember 1982 Diringkaskan ke dalam bahasa Indonesia dari naskah aslinya oleh Ramli Harun

日

HIKAYAT TAJUL MULUK JILID I BISMILLAHIRRAHMANIRRAHIM Bismillahi lon mula kalam Ngon nama Tuhan zat nyang Esa Ngon nama Tuhan zat nyang kadim Rahman rahim sifeuet mulia Alhamdulillah Rabbil 'alamin Lon pujoe Tuhan Rabbus sama Beurmula pujoe dum sikalian Milek Tuhan po nyang Esa Tuhan peujeuet sigala alam Jen ngon insan asoe donya Dum lat batat asoe alam Sidroe Tuhan dum nyang fana Jeuneh batee di dalam gle Naleueng awe dalam donya Apui angen neupeuhade Dum peue hase neukaronya Sigala na dum lat batat Allah nyang ahad bandum peuna Asoe laot asoe darat Hana sisat buet Rabbana Wajeb ateueh sikalian Sidroe Tuhan beu tathee na Teulheueh lon pujoe Khalikon alam Seulaweuet lheueh nyan keu saidina Seulaweuet saleuem keu Muhammad Pangulee umat dum sineuna Ya Tuhanku neutamah rahmat Ateueh Muhammad saidil anbia

Ateueh wareh seureuta sahbat Bandum umat nyang takua Agam inong dum beu habeh Sidroe sideh jeueb-jeueb donya Neubri iman dum beukhaleh Amai bak tuleh di dalam dada Oh lheueh pujoe seulaweuet sudah Insya Allah beutroh pinta Lon meungsurat saboh kisah Beuek sudah ulon rika Lon mohon tulong nibak Allah Lon meungkisah sidroe raja Haba jameun lon riwayat Treb ka lambat dilee masa Sidroe raja meusyeuhu that Timu barat meugah raya Beutuhan bri troh ban hajat Beuek tamat lon calitra Beureukat intu nabi Adam Beureukat tuan Siti Hawa Beureukat guree dilon tuan Seureuta ngon ibu bapa Beuek tamat ulon surat Deungon beureukat dum aulia

Meungna tulong po nyang ahad Cit troh hajat ban nyang pinta AMMA BAKDU ulon mula Ngo syeedara dum sinaroe Ngo lon kisah sidroe raja Meugah raya hana bagoe Lagi gagah that beurani Hana sabe jeueb-jeueb nanggroe

Hukom ade hana sakri Raja duli that jipujoe Nama geukheun Zainul Muluk Bungong tajok that seureuloe Le that nanggroe keunan taklok Wase jijok jeueb-jeueb sagoe Di raja nyan wahe akhi Na isteuri sidroe putroe Rupa indah that juhari Nan putroe ti han lon tusoe Peuet droe aneuk bak putroe nyan Sikalian ureueng lakoe Mangat hate po jonjongan Pujoe Tuhan malam uroe Lam ibadat nantiasa That takwa raja nanggroe Teutap putroe deungon raja Ngon aneukda nyan ban peuet droe Padum lawet akhe masa Poteu raja lon hareutoe Leumah pike dalam dada Bah lon mita laen putroe Bah le jinoe lon meukawen Putroe canden aneuk meuntroe Meunan leumah dalam dihen Hate meusyen raja nanggroe Teuma neukheun bak peurdana Kajak gata ubak meuntroe Peurdana jak laju sigra Haba raja geupeugah proe Peurdana jak keu teulangke Geupeugah le ubak meuntroe

Jeuet le laju han peue pike Meukawen le raja nanggroe Oh lheueh kawen poteu raja

Meuseusuka geunap uroe

Sajan putroe nyang jroh rupa Poteu raja sinan laloe Dalam kuta tan neuwoe le Sinan sabe sajan putroe

Teukeudi Tuhan rabbul kade

Putroe hame lam meuligoe Troh nam buleuen hame nyang ka

Susah teuka raja nanggroe Han tom teungeut poteu raja

Ret ie mata geunap uroe Uroe malam neumoe sabe Kadang pakri teuma dudoe

Yoh nyan raja leumah pike Raja hei le nujum sidroe Teungku nujum troh le teuka U astana neuek sampoe

Nujum peurab laju sigra Deungon raja mumat jaroe Lheueh nyan neuduek rab sulotan Troh le hidang keunan sampoe

Teungku nujum buka hidang Ngon sulotan makeuen jinoe Raja makeuen sinan sapat Mulia that hana bagoe

Oh lheueh makeuen raja deelat

Peugah leugat haba lumpoe

Wahe teungku guree hamba Leumah rahsia malam baroe

Han lon tupeue takbi makna Hai syaikhuna deungo jinoe

Uroe Jum'at teubiet faja

Sang-sang geumpa reuloh nanggroe

Teuka reudok ngon seupot klam Tujoh malam tujoh uroe Kuyut hate lon han macam Ngon ija plang ulon tob droe

Teutap ulon lam dukaan Jaga yoh nyan ulon sidroe

Oh ban jaga lon hai syaikhi

Teuloh hate hana bagoe

Saleh peue-peue keu lon neubri Uleh Rabbi po geutanyoe Teungku kalon ngon muslihat Peue alamat ateueh kamoe

Teungoh marit raja deelat Rioh sangat sare neumoe Teungku nujum buka kitab Neukalon bab takbi lumpoe

Leumah neungieng dalam kitab Aneuk deelat lahe jinoe Meutuah that hana tara Jeuet keu raja akhe dudoe

Rupa pi jroh that peurkasa Le that raja taklok keunoe

Salah bacut po męukuta Seupot mata tuanku droe

Oh neukalon bak aneukda Po meukuta roh meupaloe Cit seupot le mata dua

Nyankeuh makna tuanku droe

Nyankeuh makna po meukuta

Meunan nyata takbi lumpoe Ban neudeungo haba meunan Neukheun yoh nyan raja naggroe

Kon meutuah aneuk laman Paleh jih nyan hana bagoe Bah le lon boh dalam rimba Hana laba tinggai sinoe

Meunan neukheun uleh raja Ubak nisa han le neuwoe Peuek peusan bak peurdana Beutroh raja neuwoe keunoe

Han cit neuwoe poteu raja Hingga nyata po samlakoe Oh ban lahe po jroh rupa Teuma sabda raja naggroe

Hai peurdana nyang seutia Dalam rimba jak ba jinoe Bek le tinggai lam astana Kajak lanja wahe meuntroe

Peurdana jak laju sigra Neucok lanja bungong geutoe Lheueh nibak nyan padum lama Troh lom haba bak sulotan

Neuyue pangge dum panglima Bentara syahbanda peukan Uleebalang dum sineuna Lom ulama sikalian

Hingga teuma troh le teuka Ubak raja nyang analan Peuek seumbah le peurdana Ampon hamba syahi alam

Kamoe bandum ka troh teuka Saleh peue na nyang syugolan Peue tuanku nyang na susah Cuba peugah hai jonjongan

Poteu raja seuot pantaih

Insya Allah meuntroe intan

Nyang lon pangge bandum gata Guree hamba sikalian

Lon meungpeugah aneuk hamba Uroe nyoe ka keulaheran Jinoe teungku peue bicara

Neupeunyata keu lon tuan

Ulon teungku susah raya Oh ban nyata aneuk badan Sabab ulon ingat keu takbi Nyang neurawi dilee nyoe ban

Meunyo lon eu nyan aneukda Cahya mata ulon hilang Oh ka han le cahya mata

Keupeue guna udep badan

Oh lon ingat meunan rupa Got lon yue ba dalam hutan

Supaya ulon lheueh bak bahya Nyankeuh haba bak lon tuan

Ban geudeungo sabda raja Ret ie mata dum sibarang Wazi meuntroe ngon bentara Hate rukha hana lawan

Weueh hate keu aneuk raja Bandua ngon Kande lilan Teuma seuot sidroe meuntroe Geukheun meunoe bak sulotan

Deelat ampon payong nanggroe Deungo kamoe sikrak kalam Ulon peugah nyang meutakwi Wahe duli deungo hamba Fireuman Tuhan hadih Nabi Bek neuungki hai jonjongan Iza jaa ajaluhum Meunan muphom kalam Tuhan Oh ka troh had sampoe janji Beurangkari han leupasan Meung ka troh hak nibak Rabbi Meusti jadi cit han jeuet tan Beuthat neujak beurangkaho Beuthat tapo dalam awan Beuthat talob dalam peutoe Nyawong geutanyoe jadeh hilang Ban nyang kheundak Tuhan sidroe Beurangkasoe han ek lawan Beuthat taboh dalam rimba Ban dua ngon Kande Lilan Akhe dudoe saboh masa Po meukuta roh jak keunan Meungka kheundak Tuhan Esa Beurjumpa ngon aneuk badan Meunyo meunan po meukuta Peuekeuh guna taboh intan Meulaenkan nyang na meudeesya Bak Rabbana that salahan

Hana patot taenanya Wahe raja nyang budiman Meunyo taboh dalam rimba Keuji nama syahi alam

Salah bak Allah deungon Nabi Aib keuji hai sulotan Troh meusyeuhu jeueb-jeueb nanggroe Raja duli neuboh intan Deungon Allah tameupake Hana mise.ngon teuladan Meunan jikheun jeueb-jeueb nanggroe Aeb han soe tadeungoran Nyankeuh lon kheun hai khalifah Beuna salah bak jonjongan Di lon tuanku lon peuingat Saket mangat ulon paban Habeh haba nibak nujum Habeh maklum sikalian Sabet beuna ban kheun teungku Han sigeutu na salahan Nyankeuh ureueng mat hakikat Beuna sangat ban neukheun nyan Meunan neukheun poteu raja Bak peundita sidroe yoh nyan Sira neujak meunan haba Wahe raja nyang budiman Lheueh lon tuan deungon raja Allah Taala nyang timbangan Lheueh nyan teuma neuwoe laju Sabab teungku beungeh han ban Poteu raja hate ragu Neuhei laju dum sibarang Wahe meuntroe ngon bentara Jak cok sigra kande Lilan Dum beuhabeh ngon peukakah Kajak keubah dalam hutan

Oh lheueh titah nibak raja Peurdana beudoh le rijang Uleebalang ngon panglima Jak seureuta bandum sajan Oh troh ubak putroe muda Lem peurdana marit rijang Wahe putroe nyang jroh rupa Suroh raja bak lon tuan Neuyue jak tueng putroe muda Ngon aneukda dua sajan Jinoe laju sajan hamba Neuyue jak ba dalam hutan Lon pabanbah po jroh rupa Hana daya bak lon tuan Lon meusageueng han kuasa Sabab raja keubeusaran Leubeh that kreueh teungku pandita Neupeugah ka bak sulotan Neutham putroe han neubri ba Habeh rupa neubri jalan Han neupateh poteu raja Pihak kuasa jeuet beurangban Wahe putroe nyang johari Jok bak Rabbi dum sibarang Beudoh jinoe tapeureugi Hai putroe ti Kande Lilan Putroe deungo kheun peurdana Ret ie mata meugeulumbang Allah Allah ya Rabbana Pakon raja buet meunan ban Neuboh ulon tan keureuna Wahe raja nyang budiman

Pakon neuboh lon hai duli Pakon beunci keu lon tuan Hana sayang keu aneukda Pakon raja sang binatang

Pakon raja hate lupa Neubeh hamba tan salahan Han teuringat peutang pagi

Wahe duli lon rah tangan

Beungoh seupot lon rah gaki Malam hari lon eh sajan Ija bajee lon srah ngon gleh Oh neueh lon ceupet badan

Pakon keu lon han neugaseh Neubeh keudeh dalam hutan Teungoh malam neulakee bu Neukheun teungku keulaparan

Meunoe meudeh lon peulaku Bak tuanku leumah cit tan Kukuek manok ranub sinulang Patna ureueng meunan macam

Han neuingat guna jameun Dalam uteuen lon neubuang Adat binatang nyang peuet gaki Na cit hate geukasehan

Laba rugoe na jipike Han beurangri bri antusan That jisayang keu aneukda Jipeulara beurangkajan

Hantom siat hate lupa Beungoh sinja bri makanan Seudang binatang na seutia Pakon raja keulupaan

Hana patot po meukuta Neuboh hamba dalam hutan Ya Allah Wahidul Kahhar Neupeulara aneuk laman Lon seurah droe ubak gata Ngon aneukda dua sajan Sira bae po jroh rupa Neucok lanja aneuk badan Tingkue aneuk sawak ija Ro ie mata han muban-ban Oh lheueh tingkue cahya mata Beudoh lanja Kande Lilan Sira beudoh peugah haba Hai aneukda cahya intan Lon pabanbah bijeh mata Geuboh gata hai bangsawan Geuyue jak boh dalam rimba Buet ayahanda nyang sulotan Bukon sayang putik sukon Didalam on ret meukarang Wahe judo neupeuampon Nyang salah lon dilee jameun Bukon sayang bungong jeumpa Habeh mala dalam karang Wahe judo po meukuta Meuah deesya ulon tuan Putroe neumoe sare rioh Ma teungku boh bukan sayang Wahe aneuk nasib tuboh Geutanyoe roh dalam hutan Karoh untong dalam rimba Meunan kada nibak Tuhan

Cut putroe moe hate rukha Ret ie mata han muban-ban Cicempala bulee soebroe Meurubok manoe dalam taman Han neungieng le ateueh kamoe Ngon samlakoe aneuk badan Bukon sayang mirahpati Rajawali jeuet keulawan Wahe Tuhan po ku Rabbi Hanco hate lon ngieng intan Bukon sayang bak rangkileh Boh habeh peulandok seuba Wahe aneuk bungong puteh Nyoe keuh gaseh bak du badan Digob aneuk diastana Geutanyoe ka dalam hutan Wahe aneuk tangke nyawa Meunan jeumba naseb badan Hanco rusok dalam dada Neutueng hamba wahe Tuhan Putroe neumoe hana reuda Ret ie mata basah badan Teungoh bae putroe muda Troh peundita neujak keunan Dipeundita pika neumoe Weueh keu putroe Kande Lilan Tungku marit teuma meunoe Deungo kamoe putroe intan Kada kadar nibak Rabbi Cit ka janji dilee meunan Saba beuthat po juhari Po ku Rabbi peulahraan

Beuthat taeu jinoe bala Nekmat teuka oh komdian Tuhan sidroe tulong gata Ngon aneukda dua sajan

Meunyo got niet dalam dada Tuhan peulara dalam hutan Bah han jibri bu sibabah Bah jikeubah bak umpung syeetan

Neupeulara uleh Allah Ngon meutuah cut bangsawan Meutuah that bungong geutoe Akhe dudoe meugah han ban

Jeuet keu raja lam donya nyoe Le that nanggroe takluk keunan Pinta hajat po samlakoe Neumohon droe ubak Tuhan

Ya ilahi wa ya Rabbi Po ku neubri sampaikan Ngon syafaat Muhammad Nabi Beuroh neubri lam seunangan

Bumeuteumeung pangkat tinggi Po ku neubri bahgiaan Tajul Muluk nan lon rasi Hai ya Rabbi neukabuikan

Lheueh neuboh nan le peundita Beudoh sigra putroe intan Seumbah tuot teungku peundita Di Syeekhuna sambot rijang

Teuma marit bungong meulu Wahe teungku guree laman Neumeulakee bak Tuhanku Beulanjot umu aneuk badan

Seureuta lom hai Syeekhuna Izin sigra keulon tuan Neupeumeuah dumna deesya Hai Syeekhuna nyang budiman

Nyoe seuneulheueh lon ngieng rupa Izin hamba masok hutan Sira marit sira geumce Sang geumanoe basah badan

Dipeundita deungon meuntroe Neulungkob droe ateueh intan Han jeuet meueu ateueh putroe Ngon samlakoe dua sajan

Lheueh nyan putroe beudoh leugat Neupeuteupat dalam hutan Hana sapeue le teuringat Bak hadarat neujok badan

Hanle pike dum sinaroe Neupeujok droe ubak Tuhan Panglima ngon wazi meuntroe Geusyik sagoe huleebalang

Ireng sajan tuan putroe Geujak sampoe dalam hutan Uroe malam geujak sabe

Tan peuduli dum sibarang

Leumoh asoe bungong pade Han mumet le gaki tangan Deuek deungon grah hana sakri Sang-sang hanle meugrak badan

Putroe piyoh diyub kayee Tumpang ulee bungong rihan Neucok aneuk boh lam pangkee Nibak kayee sadeue badan

Ngon ie mata ret meuree-ree Basah bajee bungong peukan Ureueng ireng tuan putroe Habeh jimoe sikalian Teuma tanyong po sambinoe Ho ret jinoe tabeurjalan Yoh nyan seuot teungku meuntroe Ampon kamoe bungong karang Tan ret laen pike pake Meung kon taek gunong manyang Ban neukalon gunong rubek Meuhasek ulee cut intan Gunong teudong miseu kayee Pucok nyum bee sampoh awan Kuyut hate bungong keumbee Ek leupah kee bak beurjalan Sira neumoe putroe siti Neutinggai le aneuk badan Putroe ek le buket tinggi Meuntroe wazi ireng sajan Uroe malam neuek sabe Darah ile gaki tangan Tujoh malam tujoh uroe Troh le sampoe geuek keunan Beudoh sinan geujak laju Troh bungsu bak saboh taman Kuta pi jroh that seureuloe Ngon meuligoe indah han ban

Cit geupeugot yoh saboh roe Teumpat putroe Kande Lilan Hiran hate cut sambinoe Ngieng meuligoe indah han ban

Kheun peurdahna ubak putroe Tamong keunoe bungong rihan Putroe tamong laju bagah Sabab payah leumoh badan

Huleebalang ngon bintara Peurdahna dum sikalian Geuek laju ban sineuna Lam astana piyoh rijang Teuma marit meuntroe wazi Ngon putroe ti Kande Lilan Wahe putroe nyang juhari Izin neubri keulon tuan

Izin kamoe woe keumbali Hai putroe ti cahya intan Putroe jaweueb insya Allah Bumeutuah sikalian

Jak hai meuntroe beuseulamat Beuta ingat keulon tuan Takheun saleuem lon keu deelat Doa beule that keubajikan

Neumeulakee bak hadarat Beuseulamat lon lam hutan Beujeuoh laknat jarak mara Ngon aneukda dua sajan

Lheueh nibak nyan ban sinaroe Com bak jaroe putroe intan Oh lheueh geucom jaroe putroe Laju geuwoe sikalian

Habeh geutren bandum geuwoe Tinggai putroe Kande Lilan Deungon aneuk nyang samlakoe Bandua droe teutap sinan

Laen bandum ka habeh woe Troh u nanggroe dum sibarang Oh troh keudeh geuhareutoe Dum sinaroe bak sulotan Keu hai aneuk raja nanggroe Deungon putroe Kande Lilan Raja seuot laju bagah Bumeutuah meuntroe intan Oh ka han le jih disinoe Hate lon nyoe seunang han ban Meunan neukheun po teuraja Bak bintara huleebalang Peuek seumbah lom peurdahna Ampon hamba syahi alam Woe u teumpat kamoe dumna Treb ka lama dalam hutan Teuma sabda nibak raja Izin lon ka wahe teelan Lheueh nibaknyan bandum sare Geubeudoh le geuwoe rijang Woe u teumpat bak isteuri Teuduek rawi keu sulotan Bit ceudah that mirahpati Keudidi meuen dalam blang Meuwoe kisah cut putroe ti Nyang juhari Kande Lilan Deungon aneuk Tajul Muluk Sinan neuduek dalam hutan Hana susah bungong tajok Sabe daok pujoe Tuhan Lam ibadat hana khali Pujoe Rabbi Nabi sajan

Tajul Muluk nyang juhari Tuhan neubri rayek rijang Ho siuroe rayek leugat Tamse kulat ujeuen beuklam Hana sapeue na meularat Allah ahad peularaan Sijuek tuboh asoe mangat Cit lam nekmat beurangkajan Sajan bunda malam uroe suntok laloe pujoe Tuhan Troh tujoh thon umu sampoe Akai ragoe banta seudang Ho siuroe maken leubeh Tamse bijeh musem hujan Tuan putroe that neugaseh Bungong puteh that analan Padum lawet teuma dudoe Tuan putroe neukheun nyoe ban Putroe marit ngon aneuk droe Deungo kamoe cahya intan Puji Allah deungon Nabi Malam hari bek lupaan Tameungucap dua kalimat Syahadah Allah ngon Muhammadan Asyhadu alla ilaha illallah Sidroe Allah nyang laen tan Wa asyhadu anna Muhammad Rasulullah Muhammad sah peursurohan Ingat beuthat hai meutuah Hate ngon lidah bek lupaan Poteue Allah peujeuet donya Laen dumna sikalian

Tuhan peujeuet langet bumoe Lom geutanyoe bandum insan Dum lat batat ban sinaroe Tuhan sidroe nyang jadikan Meunan neukheun tuan putroe Bak aneuk droe bri ajaran Teuma seuot po samlakoe Ampon kamoe hai ma badan Rindu hate malam uroe Nyang sibagoe ma ajaran Yakin lon that dalam fuad Hai ma pocut ngo lon tuan Jinoe hajat jak meununtut Lon meungjak beuet hai ma badan Teuma seuot tuan putroe Deungo kamoe bungong peukan Bak soe tabeuet bungong geutoe Tanyoe sinoe dalam hutan Teuma seuot Tajul Muluk Bek that daok hai ma badan Nakeuh Allah deungon Nabi Nyang pumeuri guree laman Meungna izin nibak umi Singoh hari lon beurjalan Bek neugundah wahe bunda Tuhan esa peularaan Putroe deungo kheun aneukda Han le haba bungong peukan Lagi malam pi ka jula Bandua geujak tidoran Kukuek manok saboh-saboh Banta beudoh laju rijang

Lheueh srah muka po banta jroh Ek u rumah cok peukayan Oh lheueh meungui po samlakoe Ubak ma droe neukheun nyoe ban Wahe po ma izin kamoe Bak uroe nyoe lon beurjalan Teuma seuot tuan putroe Izin kamoe aneuk badan Banta peurab keunan laju Seumbah ibu gaki tangan Oh lheueh seumbah teuot ibu Neutron laju neubeurjalan Tajul Muluk neujak lanja Neujak mita ileumee Tuhan Oh ban leupah pinto kuta Meuteumeung ka syiah yoh nyan Tan neuturi po samlakoe Teudong sidroe dalam hutan Syiah peurab tanyong meunoe Hai samlakoe ho beurjalan Ho keumeung jak hai aneukda Peugah sigra bak lon tuan Teuma seuot banta muda Ampon hamba guree 'ajam Hajat ulon jak meununtut Lon meujak beuet ileumee Tuhan Meunan teungku lon meukeusud Teuma jaweueb syiah yoh nyan Meunyo meunan hai banta cut Ngon ulon jeuet tabeurjalan Riwang dilee ubak ibu Bungong meulu ulon sajan

Banta deungo narit teungku Riwang laju bungong peukan Dalam hate sangat seuu Ka na teungku soe ajaran

Teungku neuek u meulingoe Ubak putroe Kande Lilan Seureuta deungon po samlakoe Beudoh putroe mumat tangan

Teungku tapa marit meunoe Deungo kamoe putroe intan Neubri izin keulon jinoe Po banta nyoe lon ba sajan

Ulon pubeuet po samlakoe Tuan putroe bek susahan Tuan putroe seuot pantaih Ngon ijazah guree laman

Ban nyang nafsu teungku syiah Bak ulon sah seunang han ban Teungku syiah seuot bagah Beumeutuah putroe intan

Oh lheueh izin putroe indah Teungku syiah neutren rijang Teungku neujak deungon banta Dalam rimba neubeurjalan

Troh bak teumpat teungku tapa Banta muda hireuen han ban Neungieng bale jroh that rupa Hireuen raya cut bangsawan

Dileuen bale saboh kulah Meutatah ngon batee rukham Tajul Muluk neutron bagah Dalam kulah nyang analan

Tueng ie seumbahyang po juhari Neutiti u bale rijang Dua sajan deungon syaikhi Neupiyoh le laju sinan Na sikeujab duek mupioh Makanan troh dalam hidang Teungku tapa neupeugah troh Puteh lusoh makeuen rijang Buka hidang uleh banta Sinan pika tahe mandang Sie peulandok daging rusa Daging rawa cicem hutan Sie rampeuneung mirahpati Laen lagi le that macam Leumak mameh hana sakri Banta ahli makeuen rijang Po samlakoe makeuen laju Ucap syuko pujoe Tuhan Oh lheueh makeuen bintang timu Beudoh laju cok Quruan Teungku pubeuet banta indah Ngon bismillah puphon mulaan Lheueh nibak nyan alhamdulillah Jeuet le bagah bungong peukan Tajul Muluk neubeuet pantaih Hana ubah bak bacaan Peungeuh hate han peue peugah Teungku syiah that sukaan Meung sigeutu hana ubah Sangat ceudah cut analan Hingga seupot uroe asa Teungku tapa neukheun yoh nyan

Jak hai aneuk woe bak badan Bek oh sinja susah jalan Singoh uroe lom tateuka Wahe banta nyang budiman

Tajul Muluk teuma neuwoe Meujak sidroe ret lam hutan Siat ka troh u meuligoe Bak rumoh droe bungong peukan

Peurab laju bak bunda droe Seumbah jinoe gaki tangan Teuma marit tuan putroe Ka troh tawoe cahya intan

Bumeutuah po samlakoe Beuek sampoe beuet Quruan Peue na neukheun teungku tapa Ubak gata wahe intan

Tajul Muluk seuot sigra Ubak hamba na ajaran Beungoh lon jak seupot lon woe Geunap uroe yue beurjalan

Meunan hamba po samlakoe Galak hansoe Kande Lilan Uroe suboh beudoh laju Jak taguen bu aneuk badan

Oh lheueh banta neupajoh bu Neujak laju rot lam hutan Oh troh keudeh bungong meulu Seumbah teungku gaki tangan

Teungku peubeuet teuma laju Seun sigeutu na ajaran Meunan sabe geunap uroe Han peue adoe le lon peutrang

Beungoh neujak seupot neuwoe Hana laloe cut bangsawan Daok sabe lam neujak beuet Meununtut ileumee Tuhan

Trang that hate samlakoe cut Ngon siat jeuet tamat Quran Tamat Quran beuet Bidayah Sangat ceudah cut analan

Teuma neubeuet Jarumiah Ngon Kifayah dua sajan Ileumee Maknun nahu fiqah Maklum sudah sikalian

Ileumee mantra ngon falakiah Nyan pi ceudah cut bangsawan Ileumee nujum ngon lazini Taki maki lam peupeurangan

Sangat utoh po juhari Han sapeue le keukurangan Di teungku pi habeh neubri Sampoe hate gaseh sayang Saraf nahu habeh meuri Banta ahli habeh neupham Seureuta neubri ngon ijazah Uleh syiah nyang budiman

Teuma marit teungku syiah Hai meutuah deungo laman Deungon tulong po nyang Esa Ka mumada lon ajaran

Jinoe aneuk tajak gisa Ubak bunda tapeugah ban Takheun saleuem ubak bunda Lon kuteuka ngon grak Tuhan

Meungna izin po nyang Esa Singoh teuka ulon tuan Tajul Muluk neuwoe pantaih Neujak peugah bak ma badan

Ban neudeungo narit syiah Neuwoe pantaih bungong peukan Wahe ma po ma teungku droe Teungku keunoe neubeurjalan

Singoh teungku neujak keunoe Bak geutanyoe hai ma badan Putroe deungo meunan haba Hate suka hana lawan

Singoh uroe watee duha Teungku tapa troh le keunan Neuek laju teungku tapa Putroe muda seumbah rijang

Tajul Muluk pi seureuta Seumbah sigra guree 'ajam Teuma marit teungku tapa Deungo hamba wahe intan

Tajul Muluk nyang bahgia Po jroh rupa umu seudang Bak pike lon wahe putroe Patot jinoe tapeukhitan

Teuma seuot tuan putroe Ban pike nyoe guree laman Wahe teungku guree hamba Bak lon kira sabet meunan

Akan teutapi peue lon peugah Ka grak Allah nasib badan Di gob teutap dalam nanggroe Kamoe sinoe dalam hutan

Wahe teungku guree hamba Hana daya bak lon tuan Ban nyang pike bak syeekhuna

Teungku teuma peugah rijang

Grak teukeudi po nyang Esa Beuek saba putroe intan Lahe baten niet beuteupat Grak hadarat sikalian

Bek le susah cut meuubon Bahle ulon nyang peukhitan Yoh nyan teungku meuhei banta Ngon siat ka keunan datang

Neuduek laju rab Syeekhuna Banta muda nyang analan Bak masa nyan teungku tapa Laju sigra neupeukhitan Oh lheueh khitan banta muda Teungku tapa neukheun yoh nyan Izin keu lon hai samlakoe Jinoe lon woe dalam hutan

Banta seuot neukheun meunoe Izin kamoe guree ajam Oh lheueh izin teungku neuwoe Neujak sidroe rot lam hutan

Tinggai banta lam meuligoe Sajan putroe nyang analan Kande Lilan ngon samlakoe Sajan putroe nyang analan

Uroe malam lam ibadat Hate mangat bungong peukan Hana sapeue le teuringat Dalam taat beurangkajan

AMMA BAKDU teuma dudoe Laen jinoe lon peugisa Zainul Muluk raja nanggroe Geunap uroe meuseusuka

Oh lheueh geuboh Kande Lilan Dalam uteuen ngon aneukda Han sapeue le keususahan Lam seunangan rok-rok masa

Padum lawet dudoe akhe Ngo boh hate lon calitra Teukeudi po Rabbul kade Leumah pike po teuraja

Bahle jinoe lon jak meuen Jak meuramien paroh rusa Meunan leumah dalam hate Neuyue pangge pawang dumna

Uleebalang meuntroe wazi Tandi waki ngon beuntara Hingga habeh dum meusapat Neukheun hajat jak meurusa

Pawang rusa nyang utoh that Ka meusapat dum sineuna Oh ka cukop sileungkapan Sulotan yoh nyan neubungka

Deungon rakyat ireng sajan Uleebalang ngon bintara Sira geujak dalam hutan Peurasan meugura-gura

Jipeh tambo palee geundrang Sare kiam tango subra Jiyub suleng deungon bangsi Rapai deungon biula

Surak deumpek jihei sare Ulah mise sang prang raya

Geunap uroe meunan sabe

Didalam gle jak meurusa

Dumna pawang gadoh pike

Gadoh syawe dalam dada

Saboh rusa han meuteumee

Gadoh lagee pawang dumna

Han tom meunan nyang ka dilee

Meubulee tan leumah rupa Padumna treb meunan sabe Didalam gle uteuen rimba

Teukeudi Allah Rabbul kade Jibeudoh le saboh rusa Rusa jiplueng pantaih han ban Rot hadapan raja raya

Zainul Muluk neukalon ban Beudoh yoh nyan pantaih sigra

Yoh nyan neulet le neukarat

Tinggai rakyat han neukira

Rusa jiplueng pantaih sangat Raja deelat let meutaga Hingga troh bak saboh gunong

Rusa teudong payah raya Raja pi troh keunan mamong

Neutop keunong teuntang dada

Rusa reubah ka meugule Yoh nyan neusie uleh raja

Takue rusa pika putoh

Rakyatpi troh keunan teuka Tango a'u sare rioh

Sang seunujoh kiam subra

Rusa reubah sinan rab toe Ngon meuligoe Kande Lilan Tajul Muluk nyang samlakoe Tanyong meunoe ubak bunda Peue jih rioh ma teungku droe Kiam bunyoe dalam rimba Teuma seuot tuan putroe Ureueng nanggroe jak meurusa Bek tajak-jak aneuk keunan Ureueng dum nyan han got basa Jipoh gata bungong keumang Han soe sagang tan syeedara Tajul Muluk marit sikrak Bah le lon jak siat hai ma Lagi pi rab hana jarak Di lon galak kalon rusa Meunyo tajak aneuk badan Bek rab intan tadong gata Tajul Muluk neujak rijang Jak pandang ureueng sie rusa Oh troh keunan bungong meulu Leumah neueu rakyat that bha Dalam kawan tamong laju Meukeusud eu pakri rupa Neutanyong bak ureueng nanggroe Pat teungku droe reubah rusa Rakyat seuot jikheun meunoe Jeh bak sagoe ulee paya Neujak laju putik langsat Nibak' teumpat reubah rusa Teukeudirollah po nyang ahad Ngon deelat meuteumee muka

Oh ban neungieng banta seudang Laju hilang cahya mata Raja reubah le meulayang Keunong pacang kayee rimba Teutop mata deungon duroe Neukheun meunoe po teuraja Allah hai po Tuhan sidroe Lon ka paloe hai peurdana Teungoh lon eu rusa teumbon Mata ulon gadoh cahya Saleh na soe keunoe jitron Hana makon lon binasa Saket kuthat hana bagoe Pakri jinoe hai peurdana Neupareksa bak teumpat nyoe Soe na keunoe ureueng teuka Jibeudoh le meuntroe bujang Uleebalang ngon panglima Jipareksa laju rijang Soe na keunan ureueng teuka Ka jikalon keudeh keunoe Jitanyong soe keunoe teuka Tajul Muluk seuot keudroe Nyoe pat kamoe peue tamita Ulon nyang na tamong keunoe Meuteumeung nyoe deungon raja Wazi meuntroe teuma kheun le Kah nyang ruge mata raja Jidrob laju bungong pade Ka jiba le ubak raja Oh rab keunan po samlakoe Raja nanggroe susah teuka

Maken saket nibak bunoe Meutumbok droe hana reuda Neupoh-poh droe hana macam Hingga pangsan po teuraja Teuma beungeh dumna rakan Jicok yoh nyan banta muda Jitrom sipak ngon jitumbok Ka jiantok hana reuda Bukon sayang bungong tajok Sret meutumpok uyub ara Bukan sayang Tajul Muluk Ka jiantok bak-bak muka Bukon sayang cicem murong Sideh umpung dicong para Pihak hana wali karong Han soe tulong banta muda Bukon sayang bak sijaloh Han tom meuboh rok-rok masa Tajul Muluk laju jipoh Hana saboh soe tem publa Neupeujok droe ubak Allah Bah peurintah po nyang Esa Tajul Muluk nyang meutuah Droe neuh seurah bak Rabbana Lheueh nibak nyan teuma dudoe Gaki jaroe jiboh singkla Ka jiikat gaki jaroe Dalam uroe laju jiba Hana inseueh ube pade Jipoh mate banta muda Laju jiba u ateueh gle Jaroe gaki ka meusingkla

Di ateueh kon phon jigule Hingga sampe troh u data Saleh udep saleh mate Hana deuh le lon eu rupa Bandum rakyat ka jipike Sangka mate bak jikira Teuma jikheun uleh meuntroe Beudoh jinoe tajak gisa Jicok raja boh lam usong U gampong jipuwoe lanja Uleebalang nyang mat payong Jipeutudong raja raya Hana neuthee malam uroe Daok poh droe hana reuda Tuan putroe judo duli Nyanpi akhi sang ka gila Ro ie mata tan beureunti Neutanyong kri bak peurdana Hai peurdana meuntroe wazi Pakon duli jeuet binasa Teuma seuot meuntroe wazi Deungo cut ti lon calitra Rusa reubah sinan teudu Kamoe lalu keunan sigra Teungoh-teungoh kamoe peulaku Tuanku ka buta mata Yoh nyan neumoe tuan putroe Aneuk peuet droe keunan teuka Ngon ie mata sret meutaloe Jiduek rab toe deungon raja Wahe ayah pakon meunan Han get bagoe lon eu rupa

Masa neujak jroh samlakoe Watee neuwoe hanle mata Raja neukheun teuma meunoe Wahe putroe panyot peulita Wahe aneuk lon nyang peuet droe Bek le tamoe bijeh mata Tapabanbah kheundak Rabbi Grak teukeudi ateueh hamba Jinoe tahei ahli nujum Nyang ek maklum dum peukara Cuba tanyong ubak nujum Pakri maklum ubat mata Banta peuet droe beudoh rijang Meuhei bujang keunan sigra Oh sare troh keunan bujang Banta seudang peugah haba Teungku nujum neujak pangge Beurijang le keunoe teuka Takheun raja neumoe sabe Saleh pakri akhe masa Bujang beudoh laju jiplueng Ahli nujum jijak mita Ban meurumpok deungon nujum Jibri maklum haba raja Nujum beudoh laju pantaih Neumeulangkah ubak raja Oh sare troh teungku syiah Banta peugah meunoe haba Wahe teungku guree kamoe Raja nanggroe ka binasa Neujak u gle yoh saboh roe Padum uroe jak meurusa

Teukeudi po Tuhan sidroe Oh troh neuwoe han le mata Uroe malam daok neumoe Pakri jinoe hai syeekhuna Cuba kalon dalam kitab Peue na ubat mata raja Teungku nujum buka kitab Neukalon bab pupoh angka Habeh neungieng sigala bab Deuh neukalon bintang raja Leumah sinan dalam kitab Didalam bab nyang keulima Sinan nyang na neueu lahe Cut putroe ti nyang eumpunya Akan teutapi that meuseuke Beuranggasoe le han ek daya Meulainkan ureueng nyang meutuah Nyang ek leupah nibak bahya Dalam surat meunan leumah Teungku syiah kalon nyata Teungku nujum hanle kalam That neusayang po meukuta Tob ngon kitab laju rijang Hate leukang nyum lam dada Banta peuet droe tanyong laju Wahe teungku peue na haba Na lom ubat keu tuanku Peugah laju.ubak hamba Bah dibarat get ditumu Kamoe teungku nyang jak mita Teuma jaweueb uleh teungku Leumah lon eu ubat raja

Mantong ubat di sulotan Meung ek na nyan puleh sigra Akan teutapi susah han ban Payah jalan tajak mita Peue nan ubat hai teungku droe Di pat nanggroe peue bu nama Beuthat jeuoh jarak nanggroe Ubat nyoe kamoe jak mita Teuma jaweueb nujum ahli Neupeugah kri ubak banta Nyankeuh bungong meungkawali Nyang ek rasi ubat mata Puleh laju po jonjongan Ngon ubat nyan soe ek peuna Akan teutapi jarak han ban Siulah nyang han troh bungka Jeuoh teumpat hana bagoe Nibak nanggroe Pari Diu Nyankeuh bungong indah hansoe Ayeuem putroe indah rupa Meuploh ribee pari mambang Jaga bungong putroe muda Biek raksasa nyang kreueh ceukang Han tom reunggang sikutika Saboh kawan bangsa Milon Jiek jitron keunan mata Uleue ngon naga teungku ampon Meuron-ron han ek takira Rimueng badeuek singa gajah Subhanallah laksin laksa Beurangkasoe han ek ilah Siya payah tauseuha

Nyankeuh lon kheun that meuseuke Wahe duli banta muda Teungku nujum meunan rawi Raja duli deungo haba Wahe aneuk lon nyang peuet droe Wahe meuntroe nyang seutia Tayue mita ubat ka noe Bak beurangkasoe nyang ek daya Soe ek teumeung bungong putroe Nanggroe nyoe bahle jih raja Meunan neukheun raja nanggroe Sira neumoe hana reuda Teuma nujum jaweueb neubri Wahe duli deungo hamba Meung kon bungong Meungkawali Bek hai duli neuyue mita Laen nibak nyan hana ubat Wahe deelat neupeucaya Lon peugah nyoe jalan teupat Bukon deelat lon dusta Meung kon bungong nyang lon rawi Hai duli beurayek saba Neupeujok droe ubak Rabbi Ban nyang neubri beuna rila Meunan nujum neuhareutoe Raja nanggroe hanle haba Po teuraja teutap neumoe Aneuk peuet droe beudoh sigra Jimarit le haba meunoe Ampon kamoe po meukuta Beule doa nibak duli U nanggroe han le lon gisa

Nibak udep bahle mate Nibak keuji aib nama Meunan narit banta peuet droe Raja nanggroe ro ie mata

Raja neukheun haba meunoe Gata peuet droe bek tabungka Piyoh dilee hai samlakoe Lon hei meuntroe ngon panglima

Yoh nyan raja yue krah rakyat Timu barat dum sineuna Hingga troh le keunan leugat Meusapat u mideuen raja

Uleebalang wazi meuntroe

Geusyik sagoe ngon bentara

Laen rakyat dum sinaroe Peunoh asoe kuta raja

Leumbeng tumbak jiba sajan Ngon seunapang bandum rata Lom keureupoe dum jisandang Peudeueng panyang cokma khanja

Peurdana meuntroe peuek seumbah Ampon maaf po meukuta Bandum rakyat hase sudah Peue na titah bak sroepada

Sabda raja neukheun meunoe Banta peuet droe keumeung bungka Ulon harap dum geutanyoe Pakon jinoe banta muda

Meunyo banta gohlom jiwoe Gata dum nyoe bek tagisa Teuma seuot peurdana meuntroe Nibak kamoe di jeumala

Meung mantong nyawong lam badan Meuubah han ban nyang sabda Habeh haba ngon sulotan Beudoh yoh nyan peuet droe banta Peurab laju ubak duli Com di gaki po meukuta Lheueh nibak nyan beurangkat le Rakyat sare dum seureuta Poteu raja lam meuligoe Deungon putroe nyang jroh rupa Putroe bae hana bagoe Hai aneuk droe ka tabungka Ho troh ulon bungong pade Gata han le hai bentara Teungoh bae putroe siti Banta ahli laju bungka Deungon rakyat meuntroe wazi Geusyik waki ngon bentara Ret dalam gle geubeurangkat Geujak leugat hana reuda Hana pioh meungsikeujab Aneuk deelat laju bungka Laju geujak hana piyoh Habeh geubloh lam beuluka Dalam uteuen dalam paloh Habeh geubloh alue paya Pat nyang malam sinan piyoh Oh ka beungoh lom geubungka Meunankeuh hai geujak sunggoh Hingga troh bak saboh data Teumpat jitiek Tajul Muluk Keunan ka troh balatandra

Kiam subra miseue reudok Rakyat kaok peugah haba Sira jijak poh beurakah Khem meuhah-hah sare subra Tajul Muluk lam beureukah Jikeubah yoh dilee masa Sinan jitiek lam lungkiek gle Sang ka mate nyawong fana Teukeudi Allah Rabbul kade Uroe nyan le banta jaga Keureuna suara rioh han ban Ngon sabab nyan jaga banta Ban teukeujot nibak pangsan Han meuban-ban ro ie mata Sira neumoe po bangsawan Neuhei Tuhan hana reuda Ya Tuhanku po di kamoe Pakon meunoe untong hamba Tan salah lon bak barangsoe Pakon kamoe jienanya Ya Tuhanku lon meulakee Gata nyang mee kaboi pinta Beureukat Muhammad Nabi panghulee Beureukat guree teungku tapa Poku neubri beutroh hajat Ngon beureukat ayah bunda Neubri beulheueh lon lam ikat Rabbul abad nyang kuasa Lheueh meulakee bungong riwat Taloe ikat rhet meuleua Hana meukon putoh taloe Sang sinyak nyoe ureueng buka

Teuma beudoh po samlakoe Neujak sidroe dalam rimba Teungoh jak-jak bungong seumpeueng Ka meuteumeung aneuk raja Deungon rakyat han teubileueng Leumbeng peudeueng jieu jiba Ban neukalon tahe hireuen miseue ureueng jak poh bila Tajul Muluk tanyong laju Wahe teungku pane teuka Pat bu nanggroe di tuanku Ho meunasu keumeung bungka Peugah bak lon meung sigeutu Peue hai teungku neujak mita Teuma seuot peurdana meuntroe Deungo kamoe ureueng muda Nyang jeuet meujak bandum kamoe Sampoe keunoe ka troh teuka Kamoe bandum mita ubat Raja deelat lam naza'a Zainul Muluk raja deelat Mata meuhat ka binasa Daok neumoe neupoh-poh droe Malam uroe hana reuda Nujum peugah yoh saboh roe Ubak kamoe dum sineuna Saboh bungong meungkawali Ayeuem cut ti nanggroe Diu Meung ek na nyan Tuhan neubri Mata duli puleh sigra Meunan nujum nyang hareutoe Ubak kamoe dum sineuna

Teuma beudoh banta peuet droe Jak com jaroe poteu raja Lakee izin bandum kamoe Jeueb-jeueb nanggroe meujak mita Nyankeuh sabab jeuet troh keunoe Gohlom sampoe ban nyang pinta Tajul Muluk deungo meunan Sret meugram le ie mata Sabab sayang bungong peukan Keu sulotan nyang ayahanda Teuma neukheun haba nyoe ban Neutueng laman hai peurdana Bah le neuba ulon sajan Keu teubosan namiet gata Bek neutinggai lon lam uteuen Jimakeun le badeuek singa Teuma seuot peurdana meuntroe Nibak kamoe that mulia Akan teutapi hai samlakoe Kheun bak kamoe nyang sijahtra Pat bu gampong deungon nanggroe Peue buet sinoe dalam rimba Soe nan ayah bungong geutoe Gata sidroe soe bu nama Tajul Muluk deungo meunan Han muban-ban ro ie mata Ka teuingat nasib badan Dalam hutan dilee geuba Sira neumoe po samlakoe Neukheun meunoe bak peurdana Wahe teungku deungo kamoe Han lon teusoe ayah bunda Oh teuingat ulon sidroe Cit ka sinoe dalam rimba

Seuntok lazim lam rimba nyoe Han tom kamoe geuhei nama Saleh pakri masa dilee Geuboh euntee le ayahanda Saleh geuboh lon di nanggroe Hai teungku droe lon thee hana Han lon tukri han lon tuban Poku Tuhan thee sibeuna Ngon mukzijat Muhammad Nabi Tuhan neubri udep hamba Han tom lon eu meung makanan Lon makan on kayee rimba Nyankeuh teungku lon peugah ban Hanco badan beukah rasa Meung na gaseh keu lon tuan Neuba sajan neupeu hamba Peurdana deungo haba meunan Teuka sayang dalam dada Teuma geukheun laju yoh nyan Tajak intan sajan hamba Tajul Muluk that sukaan Teuma yoh nyan laju bungka Sajan rakyat meuploh katoe Malam uroe geujak lanja Padum lawet teuma dudoe Troh sampoe bak saboh banda Ban troh keunan dum sinaroe Piyoh jinoe bala tandra Geupeudong le deungon kemah Piyoh payah aneuk raja Nyang di rakyat sabe rakyat Peugot teumpat maseng kada Ureueng nanggroe hireuen tahe Jieu that le jamee teuka

Dalam hate jikheun meunoe Angkatan nyoe aneuk raja Teuma beudoh peurdana meuntroe Geujak sidroe dalam banda Teungoh jak-jak dalam peukan Ka meuteumeung ngon syahbanda Mubri saleuem mumat jaroe Ban dua droe that mulia Syahbanda ba ubak teumpat Geubri adat jamee teuka Piyoh sinan na sikeujab Tanyong leugat le peurdana Wahe teungku deungo kamoe Nanggroe nyoe peue geukheun nama Soe nan raja nyang sulotan Peugah tuan ubak hamba Kheun syahbanda peugah rijang Deungo teelan lon calitra Nama nanggroe Buni Yaman Luah han ban ngon tapeusa Hana raja wahe tuan Meulaenkan cut putroe muda Janu Hate nama putroe Lam nanggroe nyoe nyankeuh raja Sinan teutap lam meuligoe Geunap uroe meuen muda Rupa indah hana lawan Tamse intan cahya muka Taeu tuboh pi jroh jeunjang Bangon nyum sang lheueh geuupa Soe nyang kalon tahe mandang Sang buleuen trang malam jula

Kulet puteh sang keululu Lam seupot hu deuh meucahya Beurangkasoe hate rindu Meunyo jieu putroe muda Ngon suara sang manisan Soe deungoran pungo gila Oh jimarit mameh han ban Hate deundam agam muda Suntok sabe beursukaan Peurasan meubagoe rupa Tunong baroh troh dum keunan Bak peurasan dum jiteuka Le that paloe oh troh keunan Ngon cut intan putroe muda Aneuk raja aneuk meuntroe Le that paloe dum binasa Habeh bandum geupeugah proe Ubak meuntroe le syahbanda Lheueh nibak nyan geulakee droe Meukeusud woe teumpat nyang ka Kheun syahbanda izin kamoe Teungku meuntroe laju gisa Oh sare troh peurdana woe Geukheun meunoe ubak banta Bunoe ulon jak u peukan Meurumpok lon ngon syahbanda Peugah haba deungon kamoe Keu putroe nyang ceudah rupa Rupa indah hana bagoe Dalam nanggroe hana ngon sa Ngon peurasan le that sinan Peurmainan putroe muda

Beurangkasoe jijak keunan Ngon cut intan gadoh daya Banta deungo haba meunan Geukheun yoh nyan pantaih sigra

Bahle tajak bak teumpat nyan Takalon ban pakri rupa Banta peuet droe geujak kéunan

Sajan-sajan ngon peurdana

Na sikeujab baro geujak Ka meurumpok saboh kuta Ngon meuligoe that meusigak Keupucak batee beulanda

Bak binteh geuboh ceureumen Tulak angen ie peureuda Soe nyang kalon hate ingen Jroh that reunem taeu rupa

Di leuen meuligoe saboh bale

Bak beureunti jamee teuka

Di leuen bale saboh kulam Batee rukham geuboh lingka

Meuturab jroh batee rukham Soe ngieng deundam hate suka Lingka bale jroh meukeunong Sinan bungong dum geupula

Sigala dum jeuneh bungong Han peue tanyong di sinan na Bungong rumi bungong rawatu Bungong meulu dum aneka

Banta kalon jroh that laku Geujak laju sigra-sigra Oh troh keunan banta lalu Leumah neueu saboh rupa

Saboh surat nibak pinto Banta tajo jak peunyata Haba surat jroh meulaku Hate rindu soe nyang baca Ngo lon peugah meung sigeutu Hai teungku nak meuho punca Seumbah saleuem Janu Hate Beurangkari jamee teuka Beuthat aneuk raja duli Walee meuseuki aneuk peurdana Bak bale geupiyoh dilee Bungong keumbee keunan teuka Gong bak sagoe teungku palee Mangat meuthee u astana Meunan haba dalam surat Meulakab bak pinto kuta Banta muda hate mangat Kheundak leugat putroe muda Hamidasyah hate beureuhi Cut putroe ti meungieng rupa Tron bak kulam neusrah gaki Neutiti u bale raya Teuma geupeh gong bak sagoe Sinyak putroe tupeu bahsa Putroe marit ngon deundayang Tajak rijang gata hai da Jibeudoh le dum sibarang Deundayang nyang muda-muda Jingui ija sawak pinggang Sikalian jeuneh sutra Boh ngon ranub dalam bate Jiteubit le pantaih sigra

Deundayang dum sabe-sabe Sang seurungkhe muda-muda Nyang jak dikeue sinyak Lambot Jak dilikot sinyak Jeumpa Jitiek aleh jroh meusambot Sang angen pot pucok u dara Dilikot nyan sinyak Kandi Rupa na ri meuh geuteumpa Jipoh linggang jroh han sakri Beureuhi hate lam dada Di likot nyan sinyak Isah Rupa indah hana ngon sa Di likot nyan sinyak Ibah Nyang that ceudah peugah haba Taeu jijak leuntek leunto Ulee baho sang meugisa Soe nyang kalon tahe gante Bee meuhambo gaharu jeumpa Jitiek aleh jroh meupatah Jicok langkah peuet sibanja Oh takalon teuhah babah Sang aruah ka keulua Oh troh keunan jijak laju Leumah jieu aneuk raja Jimarit le bungong meulu Tadeungo su sang biula Deungon jaroe angkat laju Tuanku peuampon deesya Kayee ramphak jroh ijo on Meuhimpon cicem lam rimba Naneu keunoe teungku ampon Ulon seuon di jeumala

Cicempala bulee soebroe Meureubok manoe dalam ceuntra Tuanku langkah u meuligoe Ubak putroe nyang jroh rupa Meunan jikheun sinyak Lambot Leumah leumbot ngon suara Hamidasyah laju seuot Samlakoe cut hate suka Di ateueh gle timoh cuko Seurungkhe ngon bak kupula Nyang troh keunoe ulon lalu Bungong keundo lon jak mita Puteh-puteh bungong meulu Meujampu ngon minyeuk ata Hate lon nyoe sabe tunu Meunggoh lon eu putroe muda Meunan narit po samlakoe Deundayang nyoe hate suka Lheueh nibak nyan teuma dudoe U meuligoe geujak lanja Geuek laju u meuligoe Ubak putroe nyang jroh rupa Tilam kaso nyang meusujoe Cit ka bunoe hase lingka Hamidasyah piyoh rijang Hate seunang hana tara Janu Hate putroe seudang Beudoh rijang peumulia Jiboh ranub dalam grah Putroe indak jok keu banta Lheueh jok ranub po sambinoe Jiduek le toe sapat dua

Pajoh ranub na sigapu Teuma meusu putroe muda Suara mangat sang ie madu Bungong meulu panton jiba Rampeuneung meuen cong iboh Lheuek utoh meuen bak data Hanco hate pijuet tuboh Lom preh-preh troh po meukuta Meunan jikheun Janu Hate Bungong giri hate suka Hamidasyah jiseuot le Hai putroe ti bungong jeumpa Aneuk rampeuneung keunong geutah Teuka siwah jak peufana Uroe malam ate bicah Suntok payah rok-rok masa Di ateueh gle cot sikurah Kayee reubah dum meutimpa Pihak hate lon that gundah Lon langkah hana soe maba Bak lon sangka puleh hate Ek meusampe ban nyang pinta Oh troh keunoe ulon tuan Han soe sayang ube seuma Pihak lon ureueng meuladang Han soe pandang siblah mata Meunan narit po samlakoe Sinyak putroe jaweueb sigra Ceundana timoh di buket Meuapet ngon meudang ara Pakon tuanku hate saket Ban kheundak sabet ulon rila

Beuriweueng timoh di pante Meurante timoh bak data Bek tuanku saket hate Rila lon cre tuboh ngon nyawa Takoh tampu plah keurujee Peugot bajee ija sutra Hai Tuanku saba dilee Bek jithee le ureueng lingka Bukon sayang bungong seuruni Ayeuem putri di astana Bek le susah tuanku droe Taboh lon nyoe neupeu hamba Jinoe tuanku dang masak bu Tameucato sikleb mata Got ngon jeuheut meunang talo Bek tuanku hate luka

Meung na hajat ngui peukayan Jak u peukan meuniaga Meungna hajat putroe intan Jak maenan dilee mula Meung na hajat tacok unoe Ek jinoe cong kayee raya Meung na hajat meutueng kamoe Laba rugoe bek neukira Meunan narit Janu Hate Banta ahli malee raya Teuma beudoh po juhari Ngon putroe ti meuen dua Putroe tanyong padum taroh Tuanku boh phon tamula Hamidasyah hate sunggoh Puteh lusoh dum nyang suka

Meunyo meunan hai panghulee Siribee taroh tamula Han peue salah bungong keumbee Siploh ribee pi lon rila Putroe meuen yoh nyan laju Ngon tuanku sajan dua Talo putroe bungong meulu Hate seuu banta muda Keureuna phon talo putroe Mangat asoe seunang teuka Oh ka talo tuan putroe Taroh bunoe jok keu banta Hamidasyah galak hansoe Meuen lom nyoe miseue nyang ka Ingat jih that bungong keundo Aneuk cato sabe jijaga Teungoh hibat meuen cato Meunyum talo putroe muda Putroe kalon han got laku Troh le laju kucing teuka Sinyak putroe bri isyarat Kucing sangat tupeue basa Jilumpat le keunan pantaih Lampu bicah han le cahya Sret le panyot ka meuhambo Tikoh tajo pantaih sigra Ka jituka aneuk cato Putroe a-o pura-pura Pura-pura peubungeh droe Bek gob tupeue nyan rahsia Putroe meuhei le deundayang Keunoe rijang panyot taba

Deundayang me lampu rijang Ka trang bandrang miseu nyang ka Meuen laju miseue dilee Ka lam tipee banta muda Bit pi meunan hana jithee Bungong keumbee bingong raya Hingga talo Hamidasyah Habeh sudah dum hareuta Teuma marit putroe indah Piyoh payah po meukuta Bahta piyoh siat jinoe Tuanku droe malam jula Seuot banta neukheun meunoe Hajat kamoe lom ngon gata Meung sigo treuk wahe putroe Lheueh nibak nyoe ka mumada Ban jideungo meunan bagoe Meuen jinoe laju sigra Rakyat han le banta seudang Peukayan laju jibuka Ukeue putroe tumpok rijang Banta seudang nyankeuh banda Meuen laju bungong keundo Nyan pi talo miseu nyang ka Sang han jeuet le geujak cato Tahe gante banta muda Bukan sayang bungong peukan Dalam karang habeh mala Bukon sayang banta seudang Meubacut tan le hareuta Geucre gampong tinggai teumpat Mita ubat keu ayahanda

Oh troh keunan bungong riwat Keunong leugat tipee daya Teuma marit tuan putroe Tuanku droe ka mumada Malam jula beungoh ka toe Ulonteu nyoe teungeut mata Seuot banta teuma leugat Nyoe ka rab that uroe faja Bah le beungoh uroe meuhat Lon hajat that meuen ngon gata Putroe deungo haba meunan Meuen yoh nyan miseue nyang ka Hamidasyah marit yoh nyan Deungo laman putroe muda Hareuta di lon cit hana le Ka meusampe keu gata lon ba Meunyo talo lon watee nyoe Tuboh kamoe tapeuhamba Teuma meunyo meunang kamoe Ban sinaroe pulang hareuta Meunan narit po samlakoe Sinyak putroe kaboi sigra Meuen laju miseue bunoe Meunang putroe talo banta Hireuen tahe po samlakoe Hana sapeue pi le haba That teupike dalam hate Sang ka cre tuboh ngon nyawa Janu Hate yoh nyan hei le Si pai nyang kawai kuta Oh troh keunan jikheun meunoe Taba gob nyoe lam peunjara

Lheueh peurintah nibak putroe Jiba jinoe laju sigra Teutap jiba po samlakoe Hana sapeue pi le haba Bukon sayang taeu seulayang Angen timang rok-rok masa Bukon sayang banta seudang Ka meulang-lang lan peunjara Pihak nafsu putroe bungong Habeh nyawong ngon hareuta Nyankeu rakan ingat keudroe Barangkasoe tuha muda Peuturot nafsu malee han le Peuturot hate hilang nyawa Peuturot angen putoh taloe Peuturot putroe malee raja Hamidasyah ka meusampe Dalam rante nantiasa Dum na rakan woe keumbali U keude bak teumpat nyang ka Oh troh keudeh jikheun meunoe Ubak adoe banta muda Ampon maaf tuanku droe Bandum kamoe ka meugisa Hamidasyah nyang samlakoe Ka jipasoe lam peunjara Habeh hareuta dum sinaroe Tueng le putroe nyang jroh rupa Hareuta habeh ngon peukayan Geujok badan geupeuhamba Ban jideungo haba meunan Beungeh yoh nyan hu ngon mata

Jibeudoh le pantaih rijang Jipeuseunang dalam kuta Geujak laju banta seudang Sabab sayang keu seedara Oh troh keudeh po samlakoe U meuligoe ek le sigra Janu Hate nyang sambinoe Di meuligoe meusuka-suka Teungoh duek-duek tuan putroe Ka troh sampoe banta muda Oh sare troh u meuligoe Beudoh putroe po mulia Jok ngon ranub mumat jaroe Ampon kamoe po meukuta Ho bu langkah payong nanggroe Nyang troh keunoe peue na haba Banta seuot laju meunoe Wahe putroe nyang jroh rupa Lon ngo sinoe na peurasan Ulon tuan galak suka Meunyo cit na bungong peukan Ngon lon tuan meuen dua Teuma seuot putroe intan Jeuet jonjongan han peue mara Teuma meuen laju yoh nyan Cut budiman deungon banta Nyan pi talo miseue bunoe Han peue adoe lon calitra Hana peue le lon hareutoe Buet cut putroe tipee daya Hingga ban peuet ka meupaloe Ka jipasoe lam peunjara

Tinggai rakan dum sinaroe Banta peuet droe ka binasa Uleebalang meuntroe wazi Woe keumbali dum u tangga Bandum rakyat habeh cre bre Hana soe le nyang panglima Maseng-maseng ban nyang pike Ladom u gle jak meudama Ladom u timu ladom barat Ladom rakyat jak seumuga Teuma ladom woe u teumpat Ladom meuhat meuniaga Meunankeuh hai wahe sahbat Maseng rakyat ho nyang suka Bukon sayang taeu kandeh Boh jih habeh musang seuba Teuduek oh noe saboh lapeh Jinoe keudeh lon calitra Seureuta lon balek ayat Deungo sahbat dum beurata Meunyo sot-sot ujong ayat Kureueng mangat galak tabaca Bukon sayang bak seumantok Habeh pucok ulat seuba Meuwoe kisah Tajul Muluk Bek le daok ngo beurata AMMA BAKDU kisah rawi Banta ahli ulon peugah Tajul Muluk nyang juhari Dalam hati sangat gundah Oh leupah woe meuntroe wazi Hana sakri hate susah

Ingat aduen bungong giri Keunong taki putroe ceudah Sret ie mata tan beureunti Bak ilahi droeneuh seurah Hana guna lon duek sinoe Hate lon nyoe sabe bicah Teuma beudoh po samlakoe Neujak sidroe seutot langkah Neujak laju taloe jalan Troh u peukan bungong mirah Meuteumeung le sidroe insan Rupa na ban meuh keureutah Nibak tuboh dum peukayan Pudoe intan hu meutatah Tajul Muluk ngieng lakuan Pike yoh nyan banta indah Nibak adat lon eu bagoe Sang gob nyoe ureueng meutuah Bah le jinoe ulon peutoe Lon peugah proe jalan susah Kadang cit na inseuh hate Geutem bri keu lon isyarat Meunan leumah dalam hate Neupeurab le keunan pantaih Oh troh keunan po samlakoe Sujud jinoe deungon reundah Syeedaga ngieng meunan bagoe Ngon jaroe neusambot bagah Oh ban neungieng banta muda Tanyong lanja pane langkah Datok meuntroe ureueng kaya Ngon hareuta that barullah

Ho bu langkah hai aneukda Lon eu rupa sang beulisah Tajul Muluk seuot sigra Ngon ie mata peunoh limpah Oh ka han le ayah bunda Jeueb-jeueb donya lon meulangkah Manyak lon kon meunan sabe Allah wahe teungku ayah Ka grak Tuhan Rabbul Kade Meunan neubri lon paban bah Meunan neukheun bungong meulu Syeedaga eu sayang leupah Teuka inseuh neungieng laku Neukheun laju meunoe ilah Meunyo meunan bungong geutoe Tadong sinoe sajan ayah Gata lon tueng keu aneuk droe Sampoe dudoe hana ubah Meunan neukheun datok meuntroe Po samlakoe hate dasyah Teuma seuot bungong keumbee Ateueh ulee ulon keubah Ubak Allah lon meulakee Bu meuteumee tanom ayah Phon jinoe kon troh ngon page Bek Tuhan bri roh lon ubah Meunan narit banta muda Syeedaga hate that dasyah Tajul Muluk nyang bagia Keu syeedaga neukheun ayah Teutab sinan bak syeedaga Banta muda nyang meutuah

Datok meuntroe ureueng kaya Dum hareuta han ek peugah Troh meusyeuhu jeueb-jeueb nanggroe Syeedaga nyoe kaya limpah Sangat kaya datok meuntroe Lom jipujoe jeueb meunasah Teutab sinan po samlakoe Datok meuntroe nyang peurintah Phon-phon geuyue jak sikula Geubri aja meuh meutatah Geuyue peubeuet jeueb-jeueb basa Bak keunira pi ka ceudah Tuleh muleh dum peukara Pupoh angka utoh leupah Habeh maklum dum sigala Syeedaga ka galak leupah Lheueh nyan geuyue meuniaga Banta muda nyang meutuah Dum meuneukat keunan jiba Singapura nanggroe indah Oh troh keunan habeh saja Syeedaga ka teuhah babah Han ek lawan banta muda Tiep peurkara deungon mudah Padum lawet teuma akhe Leumah pike banta indah Keupeu guna lon duek sabe Malam hari hate dasyah Ayah di lon lam nazaa Ubat hana lón seuleuah Lom ngon aduen lam peunjara Rok-rok masa keulu keusah

Allah Allah ya Rabbana Pakri daya deungon ilah Meunan neukheun po jroh rupa Ngon ie mata peunoh limpah Ho ulon jak ya Rabbana Akai beuna keu lon tuan Bumeuteumeung Meungkawali Ubat duli teungku ayah Tan pat laen ulon kheun ban Meulaenkan bak po ku Allah Aduen ulon nyang jitawan Neubri jalan beuek leupah Ya Ilahi poku Tuhan Neubri jalan deungon mudah Meunan neukheun banta seudang Ie mata ban ujeuen bicah Teungoh duek-duek banta muda Ureueng tuha sidroe langkah Oh ban neueu urcueng tuha Po jroh rupa meuhei pantaih Ureueng tuha keunan peutoe Mumat jaroe neupeuindah Teuma marit po samlakoe Hajat kamoe poh beurakah Nyang jeuet lon hei siat keunoe Deungo kamoe teungku ayah Lon meutanyong saboh haba Neupeunyata asaliah Bek na bacut musom punca Neucalitra deungon ikhlaih Janu Hati putroe muda Pakri rupa teungku peugah

Teuma jaweueb ureueng tuha Deungo hamba kheun sipatah Janu Hati nyang sambinoe Hana bagoe utoh leupah Raja-raja wazi meuntroe Le that paloe nyak meutuah Nyang jak keunan hana le woe Beurangkasoe hina meugah Habeh hareuta dum keu putroe Ladom droe-droe peusambot sah Le that ureueng ka meupaloe Hai aneuk droe tapabanbah Teuma seuot po samlakoe Hai ayah droe lom neupeugah Janu Hati le hikeumat Neupeugah hat teungku ayah Ureueng tuha teuma seuot Hai aneuk cut nyang meutuah Lahe baten got ngon jeuheuet Meung bacut hana tom leumah Tan lon teupeue meung sigeutu Aneuk teungku nyan peurintah Nyang na teupeue aneuk teungku Sidroe nek tu nyang meutuah Nama geukheun nek Kubayan Nyang na tuban bungong lipah Cuba tajak gata keunan Troh bak gobnyan kadang leumah Kamoe laen han troh juga Rahsia cut putroe indah Meunan narit ureueng tuha Seungab haba oh nan sudah

Tajul Muluk nyang bahgia Beudoh sigra neucok langkah Ngui peukayan ban sikada Bak nek tuha neujak bagah Bak teumpat ni ka troh sampoe Asa uroe sampoe langkah Nek Kubayan teungoh manoe Po samlakoe neueu leumah Neupeurab le po samlakoe Jak com jaroe laju pantaih Nek Kubayan tahe hireuen Neungieng bagoe banta indah Oh sare lheueh mumat jaroe Nek tanyong proe meunóe ulah Wahe aneuk bijeh mata Pane teuka ho bu langkah Pat bu gampong keunoe teuka Hai aneukda beuta peugah Banta jaweueb meusom punca Wahe bunda nyang meutuah Gampong nanggroe han lon tupat Lon ka treb that cre ngon ayah Habeh lon jak jeueb-jeueb donya Hingga teuma nyoe ho sudah Meung na gaseh nek teungku droe Neutueng kamoe namiet nyang sah Meunan narit po samlakoe Po nek sidroe inseuh leupah Teuka sayang dalam hate Neupeugah le meunoe ulah Wahe aneuk nyang samlakoe Tapeujok droe ubak Allah

Bek tajak keudeh keunoe Bah bak kamoe teuduek dasyah Poku Tuhan nyang peulara Hai aneukda bek le susah Tajul Muluk jaweueb sigra Nibak hamba ban nyang titah Ban nyang neukheun ulon rila Di jeumala ulon keubah Hingga teuma banta muda Bak nek tuha neuduek dasyah Neukaseh that hana tara Dum hareuta gob nyan pabah Bandum hareuta nek Kubayan Dalam tangan banta indah Hana sapeue keususahan Meulaenkan lam geuduek dasyah Padum lawet teutap sinan Sajan nek nyan bungong kipah Bak siuroe bungong pade Ka teupike banta indah Teuka susah dalam hate Ingat duli teungku ayah Ingat aduen lam peunjara Hana nyang sa hate susah Bu neupajoh han meurasa Sret ie mata peunoh limpah Nek Kubayan tanyong sigra Hai aneukda pakon susah Soe na carot soe dhot gata Nyang jeuet duka nyak meutuah Peue na hajat ta meunafsu Jinoe laju lon seuleuah

Nyang bek buleuen deungon uroe Laen sinaroe ek lon ilah Meunan po nek neupeugah proe Po samlakoe seuot bagah Bek neutanyong ma teungku droe Hate lon nyoe sang ka bicah Han le teungeut malam uroe Sang bagoe teubiet aruah Peuekeuh sabah bungong geutoe Bak kamoe bacut tapeugah Beuthat jarak jeuoh nanggroe Lon cok keunoe bek tagundah Meunan narit Po nek tuha Seuot banta laju bagah Han lon peugah wahe po ma Meunyo hana neumeusumpah Deumi Allah deungon Nabi Hai puteh di han lon ubah Meunglon peugah bak barangkasoe Beureuloh gigoe deungon babah Wahe ma po ma teungku droe Hate lon nyoe keulu keusah Rindu hate malam uroe Ingat putroe bungong kipah Silama cut meuen cato Han tom talo ma meutuah Cit lam meunang bungong keundo Padum na le uroe meugah Meunyo cit ka jilhom taroh Jisampoh le putroe ceudah Meunan bandum ma teungku beh Ladom tuboh jipubloe sah

Peuekeuh sabab nyang jeuet meunan Hai ma badan cuba peugah Meunyo hana neupeugah nyan Bah le laman nyawong sudah Meunan neukheun Tajul Muluk Nek teuseupok teuhah babah Ngon ulee meuanggok-anggok Po nek datok leupah sumpah Yoh nyan po nek le hareutoe Deungo kamoe aneuk lidah Saboh tikoh sangat ragoe Kucing sidroe nyak meutuah Janu Hati putroe ijo Panyot lampu peuduek bagah Ateueh ulee kucing ragoe Sambinoe panyot jikeubah Oh troh watee talo putroe Kucing ragoe di isyarat Kucing lumpat sang teukeujot Tikoh jigrob keunan bagah Panyot pi len teuka seupot Putroe carot han peue peugah Pura-pura peubeungch droe Tikoh ragoe laen ulah Lam seupot klam tikoh lalu Aneuk cato tuka pantaih Troh lom panyot deundayang ba Gadoh lanja tikoh indah Meunankeuh buet rok-rok masa Putroe muda raya ilah Tajul Muluk deungo meunan Sikalian meuphom sudah

Banta kheun bak nek Kubayan Izin kaman lon meulangkah Euntreuk malam lom ulon woe Meungbek paloe teuka susah Po nek seuot neukheun meunoe Hai samlakoe nyak meutuah Meunyo tajak bek treb tawoe Seupot uroe beutroh langkah Meutan tawoe bungong pade Reuloh hate lon meutuah Insya Allah hai ma badan Ulon riwang keunoe bagah Lheueh nibak nyan banta seudang Neutron rijang neucok langkah Bak seedaga. troh neuriwang Banta seudang nyang meutuah Seedaga neutanyong yoh nyan Aneuk badan pane langkah Pane tajak bungong peukan Ulon tuan hate bicah Teuma seuot banta muda Payah raya lon seuleuah Meunan narit banta muda Syeedaga ka hate dasyah Singoh uroe po jroh rupa Beudoh lanja neucok langkah Aneuk musang neujak mita Jeueb-jeueb rimba jak seuleuah Meuteumeu le musang rimba Neupeulara jroh neupapah Ho nyang neujak bungong keumbee Dalam bajee nyan neukeubah

Han meusidroe na ureueng thee Dalam bajee han tom leumah Uroe malam sajan banta Musang rimba lam neupapah Hingga utoh musang ragoe Geunap uroe bri isyarat Padum lawet teuma dudoe Bak siuroe banta indah Laju neujak u meuligoe Ubak putroe sampe langkah Ban jikalon uleh putroe Rupa bagoe buleuen peuet blaih Rupa elok hana nyang sa Han tom nyang ka meunan ulah Leubeh ribee aneuk raja Keunoe teuka lon kalon sah Hana meunoe indah rupa Ube nyang ka lon eu leumah Janu Hati hate suka Sang beujiwa banta indah Teuma leumah dalam hate Gotkeuh bah le lon jak seumbah Boh ngon ranub dalam bate Bungong pade jicok langkah Ban sare rab banta muda Jaroe dua beuet pantaih Ampon meuah po meukuta Patek hamba ka dilangkah Di leuen rumoh pula giri Di pasi geupula lipah Teurtib majlih han lon turi Ampon duli neupeumeuah

Meunan jikheun Janu Hati

Po juhari jaweueb bagah Bak bineh blang pula campli Bak bineh gie pula birah

Ampon bak Allah deungon Nabi Bak lon cut ti hana salah Lheueh nibak nyan teuma dudoe Po samlakoe duek le bagah

Ateueh tilam nyang meusunjoe Kasab rumboe meuh meutatah Janu Hati jiduek le toe Miseue lakoe meunan ulah

Jijok ranub jiboh gapu Keu tuanku suleueng pantaih Banta pajoh ranub sigapu Teuma meusu putroe ceudah

Suara sang buloh meurindu Soe deungo su pangsan reubah Cok beuliong koh ceundana Peusapat lha peugot rampah

Rindu hate hana tara Neupeunyata haba sipatah Pat bu nanggroe di tuanku Soe nan ibu deungon ayah

Nyang troh keunoe peue na nafsu

Kheun sigeutu hai deelat syah Bek neutanyong hai adekda Hana guna ulon peugah

Tinggai ibu dalam rimba Ngon ie mata peunoh limpah Lon pi adek hate luka Lam rahsia lumpoe leumah

Jeub-jeueb tabib lon pi teuka Troh bak gata lon meulangkah Bit pi baek taeu rupa Lam dada sang-sang ka bicah

Bit pi lon jak jeueb-jeueb donya Siblah mata lon klam sudah Meutan ubat nibak gata Akhe masa nyawong sudah

Janu Hati laju seuot Ban nyang patot ulon peugah Peue tuanku na meukeusud Dalam laot lon seuleuah

Kadang-kadang ek ulon bri Peugah duli bak lon pantaih Seuot banta nyang juhari Deungo cut ti ulon peugah

Ubat mata cicem nuri Rajawali nyankeuh siwah Puleh hate lon meunggeubri Mata lagi peungeuh leupah

Cicem nuri pirak hupam Bulee itam paroh mirah Ngon suara jroh that lagam Hana macam rupa indah

Nyankeuh ubat hai sambinoe Harap kamoe taseuleuah Teuma seuot Janu Hati Keu lon neubri meungna leumah

Bak peunyum lon wahe duli Keu lon neubri cicem indah Meunan di lon hate nyang brat Wahe deelat nyang meutuah

Bit pi meunan tuanku droe Na cit sinoe nuri indah Jinoe taren tuanku bri Bah le lon ci jak seuleuah

Siploh ribee ringget neuro Nireng cato nyan neukeubah Meunyo na nyan tuan ku e Nuri lalu keunan bagah Jijak meuen ngon tuanku Meunan nafsu nuri indah Meunyo talo nuri ragoe Jipubloe droe keu khalifah Jeuet neukeubah jeuet neupubloe Bah suka droe neupeurintah Meunyo talo ampon deelat Cok keu ubat nuri indah Jiteureubang gadeh bakat Deungon siat han le leumah Tajul Muluk nyang juhari Dalam hate margat leupah Neusuet ringget dalam bajee Bungong keumbee peuduek bagah Yoh nyan meuen po samlakoe Deungon putroe rupa ceudah Tet ngon panyot miseue nyang ka Putroe muda mita ilah Keumeung tipee banta muda Bak jisangka sang ek keumah Meuen laju sinan dua Talo banta nyang meutuah Pura-pura peutalo droe Sinyak putroe khem meuhah-hah

Teuma marit bungong teuprom Tameuen lom cut meutuah Taboh taroh siploh laksa Meunang gata hai cut indah Jaweueb putroe ulon rila Ban nyang suka bak khalifah Meuen laju han peue kira Bandua ceureudek leupah Tajul Muluk ceureudek han ban Sang tiwasan putroe indah Meunyum talo putroe muda Bak mie sigra jiisyarah Kucing lumpat pantaih rijang Lampu nyang trang len le sudah Banta kalon meunan macam Musang agam peulheueh bagah Musang tajo keunan curam Lam seupot klam bak mie juah Aneuk tikoh tajo rijang U hadapan putroe ceudah Yoh nyan tikoh tahe mandang Jingieng musang sinan leumah That jitakot hana macam Leungo badan sang ka bicah Aneuk tikoh jiminah le Keumbali bak asaliah Tajul Muluk narit meunoe Wahe putroe meuh meutatah Saboh panyot han tamubloe Dum na rugoe putroe indah Putroe neuhei le deundayang Taba rijang lampu bagah

Troh le panyot keunan datang Ka trang bandrang meujeureulah Aneuk cato putroe pandang Hana leukang bak keuneubah Dalam hate puteh leusoh Pakon tikoh han jipinah Aneuk cato mantong bak sot Cut putroe got hate susah Saket hate bungong teuprom Jimeuen lom ngon khalifah Tikoh paleh bu mie teugom Ka ji meusom han le leumah Padum na treb meuen cato Hingga talo putroe ceudah Pucat muka mandang tahe Bungong keundo hate susah Bayeue taroh siploh laksa Sret ie mata bungong mirah Ban nyang nafsu putroe muda Panyang sahja bek tagundah Meuen laju miseue nyang ka Hingga jula malam sudah Janu Hati lom ka talo Hate kuyu that geulisah tuan putroe hate gigeng Ubak kucing jiisyarah Ka jiiem droe hana jingieng Jiking-king hana muminah Tuan putroe kalon meunan Hana lawan hate gundah Lom ka talo putroe intan Banta seudang khem meuhah-hah

Putroe malee hana bagoe

Sang jitob droe sinan sudah

Bayeue taroh dum sinaroe Sang ka jimoe putroe ceudah

Gadoh utoh han le ragoe

Sinyak putroe malee leupah

Tajul Muluk neukheun meunoe Hai sambinoe putroe indah

Tabri izin bungong geutoe

Lon meujak woe hai meuh mirah Meung na umu buleuen peunoh

Malam singoh lom lon langkah

Tameuen nyoe hana meuoh Han lon jinoh talo sudah Peue cit adek lon ngo bunyoe Jeueb-jeueb nanggroe meusyeuhu gah

Ramphak-ramphak cabeueng murong Oh angen cron habeh reubah Rancak bijak bungong tanjong

Jeueb-jeueb gampong meusyeuhurah

Pakon meunan bak malam nyoe Sang-sang putroe han le aruah Miseue manok ka lheueh talo

Ka teuseungko ulee beukah

Hana patot bungong keundo

Sie ban tulo gah ban gajah Lom pi taroh gata bacut Hana bacut ulon ubah

Bak lon jak woe wahe po cut Di lon teungeut mata sudah Janu Hati teuma seuot

Bungong rambot malee leupah

Bek le neukheun tuan putroe Adekneuh nyoe hate bicah Jinoe nyang na wahe duli Beumeusampe hai deelat syah Tuanku jak teumpat kamoe Ka han rugoe bek na payah Bah tameuen lom sikali Mangat meuri meunang siblah Meunyo talo Janu Hati Kuta neugri jipeujok sah Lom hareuta ngon meuligoe Laen bagoe lom lon seurah Nyang laen lom tuanku droe Nyawong asoe darah gapah Neutueng ulon neupeuhamba Soe srah ija ngon neukeubah Meunan jikheun putroe muda Yoh nyan banta jaweueb bagah Taek u gle koh seumantok Peugot bidok nyang jroh indah Nafsu hate Tajul Muluk Nyoe baro troh nyak meutuah Tapok tupeuen sutra ijo Peugot boh ru meuh nyang meuntah Tajul Muluk meunyo talo Han le jieu ma ngon ayah Jeuet keu namiet Janu Hati Keu sipai nyang that reundah Meunan neukheun po juhari Bak putroe ti rupa ceudah Meuen laju ban dua droe Janji sampoe deungon sumpah

Teungoh meuen Janu Hati Leumah pike putroe indah Mita akai tuan putroe Po samlakoe beuek kalah Barangkari kubicara Beuek daya banta indah Meunyo talo banta muda Jeuet ban suka lon peurintah Janu Hati meunan pike Dalam hate meunan leumah Bak jikira ek meusampe Sang ek hase bak jigagah Han jitupeue panyot kande Hana sabe banta indah Aneuk geutue tho ka sret bak tapak Barangho jijak han jiboh kada Tatob ngon rincong mata han meukleb Aneuk manok nieb meuen bak data Adat meungkon meunan untong Pat jijeuet kong ureueng meugah Janu Hati pat jituoh Di rumoh han tom jiminah Meuen laju simalam beungoh Putroe mehmoh apoh apah Meunyum talo cut putroe ti Dalam hate hanco bicah Tuan putroe susah hate Han jitukri mita ilah Mie tiek iku leubab leuboh Han jeuet jigrob saboh langkah Tajul Muluk nyang analan Rahsia nyan neutupeue sah

Jimarit le deungon basa Musang rimba ngon mie juah Ateueh kucing musang pandang Matajih trang ijo mirah Di kucing pi keunan mata Meunyum rasa ka meubantah Badan tuboh miseue geumpa Musang rimba jitakot leupah Sinyak putroe nyang juhari Dalam hate that amarah Cukeh laju nibak badan Mie itam laju muminah Panyot ka len seupot buta Di banta ka teuhah babah Aneuk tikoh jiplueng sigra U para laju meulangkah Musang rimba that jitakot Po banta cut marit pantaih Pakon putroe peulen panyot Sang-sang han got meunan ulah Putroe meuhei le deundayang Lampu nyang trang taba bagah Deundayang ba lampoe rijang Peungeuh bandrang meujeureulah Meuen le lom miseue nyang ka Putroe muda hate susah Tan jituoh meuen cato Putroe tahe teuhah babah Sinyak putroe bungong keundo Tahe gante hireuen dasyah Hana sapeue le jeuet meututo Ie mata ro peunoh limpah

Bukon sayang cicem ujeuen Keunong peunadeuen gaki patah Janu Hati tahe hireuen Duek teujunun hate gundah Tajul Muluk nyang juhari Neumarit le meunoe ulah Dileuen rumoh pula riwat Di ateueh jeurat pula lawah Hai putroe cut pirak lipat Ka troh hajat ban neupeugah Peue lom taduek bungong keundo Ka sah talo putroe indah Janu Hati malee han soe U meuligoe jiek pantaih Jicok gunci mat bak jaroe Yoh nyan peutoe ka jipeuhah Meuh suasa intan pudoe Laen bagoe han peue peugah Peutron laju u seuramoe Sinyak putroe hate bicah Jiangkat le deungon jaroe Ampon kamoe hai deelat syah Meuah ampon po jonjongan Patek laman namietneu sah Ban peurintah po jonjongan Patek lama hana bantah Tajul Muluk jaweueb rijang Hai buleuen trang nyang meutuah Bandum hareuta ka tapulang Dum sibarang buloh bicah Lom meuligoe deungon kuta Lom droe gata tapeujok sah

Bumeutuah cut putroe ti Ban nyang janji hana ubah Lon teurimong seunang hate Ka meusampe cut meutuah Jinoe nyang got panyot kande Beujinoe le tajak keubah Bandum nyang na hareuta kamoe Tuan putroe nyang peurintah Laen nibak nyan bungong riwat Ureueng lam glap tajak peuhah Nyang keuh jinoe nyang lon harap Bek rukha that cut meutuah Maseng teumpat dum tayue woe Banta peuet droe nyang takeubah Tayue jak beulaju keunoe Lon meungieng soe pakri ubah Putroe deungo haba meunan Dalam jeuem nyan jiyue peuhah Habeh bandum ka jiyue woe Banta peuet droe jiba pantaih Oh troh keunan bak samlakoe Sujud jinoe deungon reundah Lheueh jisujud ubak raja Bandum sigra jimeu seumah Banta peuet droe teukui ulee Sabab malee keu khalifah Sang ka judo bungong keumbee Hana jithee syeedara sah Tajul Muluk tanyong meunoe Pat bu nanggroe bunda ayah Banta peuet droe seuot rijang Syarikatan nanggroe nyang sah

Kamoe ban peuet aneuk sulotan Hai jonjongan bungong kipah Dilee meujak saboh masa Meujak mita ubat ayah Nyoe goh lom troh kamoe mita Silab mata hai khalifah Neubri bala uleh Rabbi Sabab janji ka meu ayah Meunan narit banta peuet droe Bak samlakoe dum geupeugah Teuma seuot po samlakoe Neupeugah proe meunoe ulah Jinoe taduek lam kuta nyoe Deungon kamoe taduek dasyah Teuma seuot banta peuet droe Nibak kamoe ban peurintah Ban nyang sabda bak jonjongan Nibak laman hana ubah Lheueh nyan teuma po samlakoe U meuligoe neuek bagah Neujok laju dum peukayan Peutron yoh nyan keu cut indah Peuet droe aduen neubri peukayan Saban-saban rupa gagah Ban lakuan aneuk raja Duek lam tahta nyang that indah Teutap sinan peuet droe banta Putroe muda muwoe kisah Ngon samlakoe nyang jroh rupa Lam astana teuduek dasyah Ureueng lam glap habeh jiwoe Malam uroe meusyahadah

Lakee doa malam uroe Keu samlakoe nyang meutuah Sabab leupah lam peunjara Pie banta nyang seuleuah

Adat kon na banta muda Seuntok masa apoh apah Sabab talo tuan putroe

Dum geutanyoe han le susah

Beuseulamat po samlakoe Beujeuet dudoe keu khalifah Meunan narit dum sinaroe Oh troh jiwoe ubak zaujah

Teutap oh nan ureueng gisa Lon calitra banta indah Deungon putroe bintang kala Lam astana neuduek dasyah

Putroe meuhei syekh ulama Dalam kuta neuyue langkah Troh ulama keunan lhee droe U meuligoe putroe indah

Bri makanan peumulia Ban nyang kada ureueng meugah Oh lheueh makeuen dum sinaroe Neutron jinoe banta indah

Seureuta deungon tuan putroe Bandua droe keunan langkah Neupiyoh le laju sinan Di hadapan teungku syiah

Marit putroe bungong meulu Ubak teungku le neupeugah. Wahe teungku guree hamba Kamoe dua neupeunikah

Marit putroe bungong meulu Ubak teungku leneupeugah Wahe teungku guree hamba Kamoe dua neupeunikah Deelat ampon raja muda Jinoe banta jeuet keu zaujah Meunan narit po samlakoe Teungku jinoe kheun bismillah Lon peunikah tuan putroe Ngon samlakoe nyang meutuah Banta seuot laju meunoe Kabui kamoe teungku syiah Janu Hati judo kamoe Sambinoe dudoe han ubah Lheueh nyan teungku neubeuet doa Lheueh nyan teuma bri seudeukah Oh ka hase dum seuleusoe Teuma neuwoe teungku syiah Teungku syiah ka leupah woe Tinggai putroe ngon khalifah Uroe malam meuseusuka Deungon banta nyang meutuah Tajul Muluk nyang samlakoe Hana padoe pujoe Allah Putroe hana neupaduli Sabab hate that beulisah Banta neueh sajan putroe Malam uroe hate gundah Tan seutuboh deungon putroe Samlakoe lam apoh apah Janu Hati nyang sambinoe Malam uroe hate susah

Sabab nafsu hana sampoe Sinyak putroe hate bicah Hana teungeuet malam uroe Sabe putroe lam beulisah

Jimeunglahe bungong keumbee Sang-sang malee keu khalifah Teuma jikheun meunoe lagee

Hai panghulee nyang meutuah

Na lon deungo geupeugah proe Ureueng lakoe deungon zaujah

Han jeuet jarak meung sipade

Hana jeuet cre meung silangkah

Bacut han jeuet saket hate Cit salah le nibak Allah Meulaenkan meusuka-suka Seuntok masa meunan ulah

Di tuanku lon eu rupa Keu lon hamba luat leupah Saleh peue na nyang meupaloe Tuanku droe beuneupeugah

Hana guna tinggal sinoe Jeuet keu rugoe hate khalifah Bak pihak tan pie budoe Keupeue sinoe lon neukeubah

Wahe deelat payong nanggroe Bak malam nyoe beuneupeugah Bek meupaloe ampon deelat Hana mangat meunan ulah

Lon boh miseue sidroe teungku Ulon jak eu bri seudeukah Hidang raya lon bet laju U keue teungku nyang meutuah

Lom lon peugah ampon duli Lon khanduri keureuna Allah Takoh bak jok tarah keulham Peugot kulam teumpat manoe Jinoe adek balek ragam Dara agam bek taeh le Bunoe uroe sinja-sinja Hana gura haba cut ti Nyoe lon peugah puteh licen Oh lheueh kawen Janu Hati Lam meuligoe han tom jitren Peulheueh meusyen ngon suami Han sikeujab pi na jarak Meung sitapak hana tom cre Dalam hate jih that palak

Jipeusak hidang khanduri Meung jipreh preh geumat tabak

Jitalak uleh putroe ti Di tuanku hana galak Geutulak sabe raseuki Watee sinja ka geulimbot Geubalot jaroe ngon gaki Janu hate eh di likot

That meupot pot bintang pari

Sinyak putroe jikheun panton Akhe ngon phon jipeumeuri Jikheun panton jiboh mise

Keumeung lahe han beurahi

Bak u dara mate pucok Meureubok di nanggroe Hindi Wahe teungku po bintang sret Pakon likot keu lon neubri

Pakon beude han jitem tot Jitakot keu cicem nuri Saleh leumoh beusoe dalam Kon seunapang biek gumpeuni Lon boh miseue sidroe teungku Ulon jak eu bri khanduri Hidang raya lon beuet laju Ukeu teungku nyang juhari Nyang sa hidang ka teudu-du Di teungku hana paduli Pakrikeuh ek geutheun nafsu e Nyang sa bau sang kasturi Han tom lon eu ureueng lakoe Keu putroe malee han sakri Teuma seuot banta muda Bek that subra hai putroe ti Lagi malam pi ka jula Teungeuet mata lon han sakri Peue takheun sabe keu teungku Han ek geuh bu laen tabri Sabab gata han troh nafsu Habeh teungku tajak caci Kadang teungku geupuasa Han geubuka wahe nyak ti Lagi uroe mantong jula Peue ka gila teungku haji Meunan narit banta muda Seuot sigra Janu Hati Keumang-keumang bungong pandan Han ek pandang meutamah hanyi Di tuanku seuuem mantong Bungong neuprom ka bee basi

Di tuanku teungeut neueh Lon lam binteh kutiek gaki Bu lon pajoh ie na lon jeb Asoe udep keusoe lon bri

Meunan narit bungong ruseb Po banta dhiet jaweueh neubri Rame-rame keude Peudada

Nyang gura di keude Pandrah

Pajoh ranub ngon boh pala Pineung muda nyang jroh seupah Adak kon na bacut cupa Hidang gata ka lon peuhah

Gunong manyang lon niet data Uteuen rimba lon niet reudah Meung goh lom troh nyang lon cinta Han lon kira nyawong sudah

Peue lom judo bungong geutoe

Nyang sajan droe tan muminah Panekeuh ek lon theun hate Malam hari lon tapapah

Nyankeuh sabab bungong pade Malam hari lon that gundah Meunan narit teungku linto Ubak judo dum neupeugah

Teuma seuot dara baro Tuanku e pakon susah Wahe judo po meukuta Neupeuhaba meungsipatah

Masa neutren di rumoh tangga Neubungka peue na faidah Peue tuanku neujak mita Seuhingga sampoe bak sumpah

Tajul Muluk seuot sigra Deungo hamba hai meuh mirah Masa ulon tren di tangga Lon jak mita ubat ayah Sabab ayah lon ka buta Han le mata ban dua blah Uroe malam neumoe rugha Seuntok masa apoh apah Nujum peugah ubat duli Meungkawali bungong indah Ayeuem putroe nyang juhari Aneuk duli raja meugah Nyankeuh putroe bangsa diwa Aneuk raja nyang that indah Meunan nujum nyang calitra Meunyo ek na puleh bagah Akan teutapi ajaeb that Hana ek dapat meunan ulah Meunan nujum nyang riwayat Hate lon that sang ka bicah Teuma lon kheun ubak abi Izin neubri lon meulangkah Lon jak mita Meungkawali Jeueb-jeueb nanggri lon seuleuah Hareueum lon eh ngon isteuri Meunan janji lon cut indah Meunan narit lon teulanjo Wahe judo nyang meutuah Tajul Muluk meunan tuto Ie mata ro peunoh limpah Teuma seuot putroe muda Bek meukuta jak seuleuah

Bek tuanku neujak mita Han ek daya bungong indah Meungkawali jarak teumpat Hana meuhat sampoe langkah Di antara sideh teumpat Wahe deelat jeuoh leupah Nyankeuh raja nyang meupangkat Beusar deurajat deungon syaukah Nyankeuh ayah Meungkawali Nan geurasi Muzafansyah Meusyeuhu that hana bagoe Aneuk sidroe rupa indah Kulet puteh sang keululu Soe na nyang eu pangsan reubah Jeueb-jeueb nanggroe that meusyeuhu Tan sikufu putroe ceudah Geupeuduek bak saboh teumpat Hana sapat deungon ayah Nyankeuh putroe nyang indah that Timu barat meusyeuhurah Meuligoe jroh hana tara Lom ngon kuta sangat indah Sinan jiduek p'utroe muda Ureueng jaga han peue peugah Bangsa milon bangsa diwa Biek raksasa jin Hamilah Meuploh ribee bangsa diwa Biek raksasa nyang that juah Nyankeuh lon kheun po meukuta Han ek daya deungon ilah Bit pi meunan po meukuta Ulon cuba cit seuleuah

Tajul Muluk deungo meunan Han'meuban-ban hate bicah Wahe judo cut sambinoe Ngieng keu kamoe mata siblah Ngon usaha tuan putroe Beuek sampoe ubat ayah Meunan neukheun po samlakoe Sinyak putroe hate bicah Jipeugot le saboh surat Nyan alamat nama ayah Buni Yaman nama nanggroe Nyan teumpat droe putroe indah Takzim horeumat meuribee kali Di yub gaki raja meugah Hadap tuanku meuribee kali Beureukat Nabi Muhammadiah Di likot nyan ampon duli Nyoe suami ulon nyang sah Tajul Muluk nama raja Deungon hamba ka lheueh nikah Nyankeuh raja nyang juhari Deungon nanggri sangat luah Ampon maaf nibak duli Keureuna hateneuh that gundah Harap aneukda bak tuanku Meungsigeutu bek na ubah Wahe ayah meukuta nanggroe Narit lon nyoe bek na ubah Habeh haba bak aneukda Saleuem sijahtra sambot hai ayah Meunan haba dalam surat Jiboh ngon cap putroe indah

Lheueh nibak nyan ka jilipat Jijok leugat keu khalifah Tajul Muluk sambot surat Hate mangat han peue peugah

Oh troh surat dalam jaroe Neukheun meunoe banta indah Wahe judo bungong geutoe Izin jinoe lon meulangkah

Doa beule geunap uroe Beuek sampoe nyang lon ilah Beu Tuhan bri ek seuleusoe Rijang lon woe hai meuh mirah

Gata lon jok ubak Rabbi Bek weueh hate bungong kipah Meunan narit banta ahli Janu Hati hate bicah

Janu Hati bungong keundo Ie mata ro ile limpah Sinyak putroe jimeubae Su meusye-sye han peue peugah

Bukon sayang bungong macang Lam keunarang layee sudah Han jan deuh ulon pandang Hai buleuen trang tiggai zaujah

Wahe judo nyang samlakoe Keupeue sinoe lon neukeubah Bak soe lom lon peugah lumpoe Hai judo droe nyang meutuah

Bukon sayang bungong seuruni Ayeuem putri bungong indah

Janu Hati hate rangoe

Teuringat nyoe keu khalifah

Teuduek dilee putroe nyang moe Laen jinoe lon meungkisah Dalam paya pot bungong crot Pileh nyang got saboh tangke Balek ayat bek lagee sot Supaya got panton syae Mise ureueng pajoh buleukat Pane mangat meunyo sabe Oh sare troh dalam babah Masya Allah pujoe Rabbi Meunan keuh nyum wahe teungku AMMA BAKDU jinoe rawi Tajul Muluk laju bungka Rot lam rimba laju peureugi U dalam gle neupeutupat Tan neulihat kanan kiri Hana piyoh meung sikeujab Bungong kasab neujak sabe Gunong manyang neuek leugat Tan teuringat barang peue le Neuek buket neutron paloh Cut banta bloh uteuen duri Hanco gaki duroe pajoh Luka tuboh keunong awe Pat nyang malam sinan piyoh Oh ka beungoh lom peureugi Badan Lipeh sang peunyeukuet Sayang po cut bu han soe bri Habeh neubloh lam-lam urong Troh lam lingkong alue asi Neujak laju bungong tanjong Muhon tulong nibak Rabbi

Lon nyang kalon teuka sayang Banta seudang nyang juhari Meujan-jan reubah seulinteueng Keunong kareueng darah ile Neubeudoh lom mameung-mameung Bungong seumpueng lom peureugi Tujoh buleuen dalam rimba Banta muda neujak sabe Sianeuk bu tan neurasa Bak nyum rasa nyawong ka cre Karonya po Ilahul hak Troh le ubak saboh nanggri Leumah taman jroh meusigak Keunan neujak banta seudang Oh troh keunan banta seudang Neupandang saboh meuligoe Po banta cut hireuen tahe Ucap syuko pujoe Rabbi Nyan raksasa nyang po rumoh Teubiet bagah jipeureugi Jiteubiet le keunan bagah Jimeung ramah po juhari Raseuki kee nyoe ho teuka Troh bak masa kukhanduri Padum na treb tan kurasa Nyoe baro na Tuhan neubri Keunan laju ka jipeutoe Bak samlakoe bintang pari Jitanvong le bak samlakoe Peugah jinoe ho peureugi Banta seuot neukheun meunoe Keupeue kamoe gata sudi

Meunyo gata meupoh kamoe Peurab keunoe bek treb lawi Badan lon nyoe that seungsara Hana guna lon udep le Oh ka mate gadoh nama Di gata ka seunang hate Meunan neukheun pirak lipat Deungon surat mat di jari Raksasa ngieng leumah surat Peurab leugat jitanyong le Ka jitanyong pantaih rijang Jaweueb yoh nyan po juhari Tajul Muluk peugah yoh nyan Kireman bak janu Hati Jilakee le teuma sigra Banta muda laju neubri Jiploh surat yoh nyan lanja Jingieng haba peue geurawi Oh lheueh habeh baca surat Jaroe jimat bintang pari Wahe aneuk bungong kasab Lon ka silab po juhari Tan lon turi putik langsat Aneuk deelat ceudieng pade Tajul Muluk nan teuseubut Judo po cut janu Hati Ho keumeung jak bungong rambot Peugah bacut lon deungo kri Tinggai ayah deungon bunda Peue jak mita bungong pade Tinggai judo lam astana Nyang jroh rupa Janu Hati

Nanggroe nyang toh takeumeung prang Peugah rijang hai boh hate Teuma seuot banta seudang Lon talo prang wahe duli

Meunyo geuprang lon that gundah Meung na ayah lon bek mate Nyang jeuet keunoe lon meulangkah Ubak ayah jak jok diri

Meunan neukheun banta muda Raksasa peunoh that hate Han tom lon eu dilee nyang ka Ureueng teuka mangat hate

Wahe aneuk buleuen peunoh

Jak u rumoh ceudieng pade

Banta muda laju beudoh

U rumoh laju peureugi

Teutap sinan banta muda Bak raksasa malam hari Oh ka beungoh di raksasa Dalam rimba jipeureugi

Watee seupot jilob uroe Baro jiwoe jibeureunti Bak siuroe banta muda Peugah haba deungon abi

Raya hajat lon ayahanda Teupong neumita saboh guni Laen nibak nyan dum sibarang

Leumo bawang minyeuk sapi Kheun raksasa hai buleuen trang

Deungon rijang ek ulon bri Hingga beungoh uroe faja Raksasa ka jipeureugi

Oh troh watee asa uroe Ka jipuwoe sigala be Tajul Muluk neucok keudroe Dum sinaroe cukop hase Cit utoh that bak seumeugot Po bungong crot peugot ruti Sie leumo taguen ngon reundang Neuboh bawang siploh hati Laen nibak nyan sie neupanggang Neureundang ngon minyeuk sapi Cukop hase sileungkapan Po bangsawan jok keuduli Peuduek laju u hadapan Raksasa nyan teukab bibi Wahe aneuk bungong geutoe Makanan nyoe lazat han sakri Peue geupeunan makanan nyoe Kheun bak kamoe bintang pari Teuma jaweueb banta seudang Sie teureundang deungon ruti Nyan makanan bangsa insan Pakri macam wahe duli Teuma jicok le jimakan Lazat han ban hai boh hate Wahe aneuk bintang kala Han tom nyang ka miseue ini Jipajoh le ngon seureupha Tan jikira barang peue le Pruet pi ka troe lazat teuka Ubak banta lom jisudi Wahe aneuk bungong tanjong Peugah bak lon bintang pari

Tacre nanggroe arong gunong Intan bungong peue tacari Peugah aneuk pirak lipat Peue na hajat bungong giri Bak lon pike na peue hajat Sayang lon that keu boh hate Peugah bak lon jalan teupat Lon meuhat gantoe abi Gata aneuk beulisah that Lon kalon brat bak laku ri Gata aneuk lon gaseh that Sang malakat Sulaiman Nabi

Walee beuthat laot meulinteueng Bungong seupeueng lon nyang cari Raksasa ka meunan jikheun Seuot mameung banta ahli Han jeuet lahe haba teusom Meunyo goh lom sumpah abi Meunan janji dilee sudah Wahe ayah bek weueh hate Po raksasa seuot bagah Deumi Allah deungon Nabi Meuhan lon peutroh hajat gata Jinoe sigra lon beumate

Lheueh raksasa jimeusumpah Banta peugah awai akhe Rindu hate lon hai ayah Lon meulangkah jeuoh nanggri Seuntok hate lon teugoe-goe Taman putroe meungkawali Adak han treb sikleb mata Lheueh nyan teuma lon keumbali

Meunan narit banta muda Raksasa ka teuhing gigi Hana sapeue jeuet jipeugah Sinan reubah ka meugule Teuma jikheun laju pantaih Hai meutuah bungong pade Ulon pike ka lheueh sumpah Leubeh tuah jantong hate Han lon peutroh jeuet keu salah Nibak Allah deungon Nabi Jinoe aneuk saboh padan Hai intan tapeugot ruti Bah lon jak tueng keunoe abang Ubak gob nyan gata lon bri Nibak gob nyan sang ek mudah Rijang leupah u taman sari Teuma beudoh banta indah Peugot pantaih laju ruti Hana piyoh bungong geutoe Hingga sampoe cukop hase Tajul Muluk marit meunoe Ka seuleusoe wahe duli Po raksasa jaweueb bagah Beumeutuah bintang pari Teuma jihei sidroe rakan Troh le keunan jipeureugi Jipeugah le teuma rijang Jak eu abang siat mari Teuma beudoh sidroe rakan Rot lam awan jipeureugi Han padum treb jibeurjalan Troh rijang bak raja Nahi

Deelat ampon teurpanggilan Deungon laman beusajan le Nahi deungo haba meunan Tatkala nyan le peureugi Jiplueng laju bagah han ban Siat keunan teuma troh le Wahe aneuk bungong teuprom Tajak meusom hai boh hate Sabab abang makeuen goh lom Bah tameusom bintang pari Oh lheueh makeuen teungku abang Ulon tuan nyang peugah kri Nahi jiek laju keunan Banta seudang le peureugi Jiduek laju sinan dua Po raksasa deungon Nahi Sie ngon ruti dum anika Ateueh mija ka meuriti Adek raksasa marit rijang Makeuen abang sie ngon ruti Teuma makeuen le ban dua Po raksasa dengon Nahi Nahi tanyong hai adoe beh Pajan troh sibagoe ini Han tom di lon na kupajoh Peue adoe beh nan geurasi Teuma jaweueb le raksasa Hai kakanda nyankeuh ruti Nyoe makanan bangsa insan Lazat han ban sie ngon ruti Sidroe insan teuka keunoe Keu kamoe jiseubut abi

Rupa indah that samlakoe Ubak kamoe jipeureugi Sayang lon that hana bagoe Sang aneuk droe baro lahe Nahi tanyong laju rijang Pat aneuk nyan wahe akhi Aneuk gata aneuk laman Di lon meunan han ubah le Raksasa hei teuma rijang Aneuk badan keunoe mari Teuma peurab banta indah Sujud bagah nibak gaki Nahi kalon rupa ceudah Sayang leupah dalam hate Teuma jikheun meunoe haba Hai aneukda nyang juhari Pat bu gampong bijeh mata Soe ayahanda nan geurasi Gata aneuk soe bu nama Peue tamita tinggai nanggri Peue aneuk hajat gata Tayue mita ubak abi Nyang bek buleuen deungon bintang Laen sibarang ek ulon bri Tajul Muluk jaweueb rijang Ampon laman payong nanggri Zainul Muluk ayah laman Syarikatan gampong duli Tajul Muluk nama hamba Treb ka lama lon peureugi Masa lon jak wahe ayah Leupai sumpah lon duli

Meunyo goh troh nyang lon cinta Han lon gisa le keumbali Adak mate pi lon rila Hana guna hudep kami Akan teutapi hai ayahanda Nyan rahsia han jeuet lahe Meulaenkan ka lheueh sumpah Beuthat ayah di lon duli Meunan janji lon ka leupah Lon pabanbah wahe abi Meunan narit banta indah Jaweueb pantaih teungku Nahi Deumi Allah hai bangsawan Lon ubah han ban nyang janji Meunyo ka lheueh lon meusumpah Beureuloh babah teuhing gigi Meunan Nahi ka jipeugah Banta indah jaweueb neubri Meuna gaseh deelat ampon Neuba ulon u Taman sari Nyan hajat lon po jonjongan Lon ngieng Taman Meungkawali Meuhan neuba ayah badan Got lon tuan neupoh mate Meunan narit po samlakoe Sira neumoe bungong pade Nahi deungo meunan haba Pangsan sigra ka meugule Oh ban puleh nibak pangsan Jikheun yoh nyan uleh Nahi Wahai aneuk lon pabanbah Leupah sumpah lon boh hate

Han lon peutroh ulon salah Nibak Allah deungon Nabi Kamoe aneuk sinoe dua Cit meujaga Taman sari Han jeuet sidroe keunan teuka Oh meusua meuhat mate Le that aneuk ureueng jaga Raksasa ngon Milon deungki Bangsa Milon ngon raksasa Meuploh laksa ribee kati Pakri aneuk rot kuilah Beuleupah lam taman cut ti Meunyo geuthee le khalifah Kamoe ayah meuhat mate Bit pi meunan na bicara Hai aneukda jinoe lon bri Bah lon intat jinoe gata Ubak cut da nyang juhari Di gob nyan na aneuk sidroe Ureueng binoe treb ka lawi Nyan pi aneuk bangsa insan Rupaneuh ban bintang pari Bah le jinoe lon bri surat Lon yue intat bungong pade Jipeugot le saboh surat Jiriwayat baten lahe Ka jipeugah saket mangat Dalam surat dum jirawi Jihei rakan sidroe leugat Jiyue intat banta ahli Jinoe kajak keudeh siat Kajak intat aneuk kami

Deungon surat sajan kaba Beugot raya ka peugah kri Yoh nyan jihei banta muda Ek cong guda bungong giri Jibaplueng pantah sigra Ngon siat ka troh peureugi Oh sare troh gaki kuta Tron cong guda po juhari Tinggai sinan banta muda Tamong lanja si man pari Meuteumeung le ngon Hamilah Sujud pantah com di gaki Jicok surat laju bagah Diwa Hamilah beuet seundiri Dalam surat jieu haba That meurasa hana sakri Jitanyong le pantah sigra Jinoe ho ka bintang pari Taba keunoe laju sigra Banta muda jipeujok le Si man Pari laju gisa Tinggai banta nyang juhari Hamilah ngieng teuhah babah Banta that ceudah bungong pade Patot judo aneuk kamoe Bandua droe that juhari Meutuah that aneuk payong Jeuet keu tudong aneuk kami Hamilah kheun meunoe haba He meutia jantong hate Sijuek hate lon aneukda Oh na gata bintang pari

Wahe aneuk bungong keundo Dara baro jinoe lon bri Aneuk kamoe tueng keu judo He aneuk e bek meuungki Meunan narit bak Hamilah Jaweueb pantah banta sidroe Nyawong tuboh darah gapah Cit milek sah wahe culi Ban nyang hajat han soe teugah Cit milek sah patek ini Hudep mate laba rugoe Nibak lon nyoe han meuungki Lheueh nibak nyan teuma dudoe Deungo jinoe lon peugah kri Lon kheun mantong nyang meukeusud Bek that lanjut kisah rawi Lon seumurat seun seun bacut Jaroe kuweut hana sakri Ulee ulon pi saket that Goh lom meupat meuie kupi Jitren daweuet lambat-lambat Bak seunurat han got meuri Di gob geujak timu barat Geujak meukat itu ini Oh sare lagot meuneukat Laba lipat han soe tukri Di lon gadoh muzakarah Lon kisah putroe ngon duli Oh lon ingat keu faidah Han ek leupah meungkeu kupi Na keu kupi tan keu kueh Meungkeu payeh timphan boh bi

Bek antara rukok puteh Nyang that meuceh kumadori Alah he on bayam tuba On ara deungon on campli Oh teuringat ro ie mata Meunan jeumba lon he akhi Bukon sayang bungong riwat Meusapat bungong keusturi Bahkeuh oh nan haba seumurat Ulon sambat laen lagi Diwa Hamilah lon calitra Ngo seedara ulon rawi Diwa Hamilah cit keupala Waki raja bangsa pari Jih keurajeuen di antara Peulinggoe Pura nama nanggri Jeuet keu dumnan kisah raja Lon peugisa Hamilah siti Hana saboh nyang ek lawan Gadoh ajam ngon sinyak siti Tajul Muluk teutap sinan Lam seunangan malam hari Padumna treb bintang canden Ka lheueh kawen po juhari Mahmuda nama cut intan Ka grak Tuhan na suami Oh lheueh kawen putroe lipat Peuek leugat u meuligi Deungon putroe neueh sapat Banta deelat nyang juhari Soe nyang kalon lazat mata Sang cempala deungon nuri

Diwa Hamilah hate suka Ngieng aneukda nyang juhari Teutap putroe deungon banta Meuseusuka lam meuligi Hate manyoh rindu deundam Uroe malam nyum sang bek cre Tajul Muluk pirak hupam Meung simalam tan paduli Neueh mantong seungab diam Meung sigo han ringan seundi Meupura han neumuwayang Putroe bintang luka hate Sinyak putroe bungong rambot Eh di likot rueng suami Dalam hate that meukrot-krot Sang-sang ka sret tuleueng seundi Meung sigo hana meureunggot Bungong rambot weueh that hate Bukon sayang bungong tajok Sret meutumpok ateueh bumi Nyan sa putroe sang meurubok Tajul Muluk han peuduli Bak simalam putroe indah Poh beurakah ngon suami Keususahan han jipeugah Putroe indah malee hate Saleh ulon han got basa He meukuta tangglong nanggri Di gob geueh deungon judo Hate rindu malam hari Nyoe lon kalon di tuanku Meung sigeutu han paduli

Kadang tuanku hana suka Sabab bangsa kamoe pari Walee meunan po meukuta Ubak hamba neupeugah kri Tajul Muluk nyang bangsawan Jaweueb rijang tuto siti He adek cut bungong peukan Deungo intan lon peugah kri Meunyo kamoe bangsa insan Na kasihan ngon isteuri Hana jeuet cre he cut intan Cit beusajan sabe-sabe Miseue sidroe ureueng tapa Suntok masa putoh hate Lam teuringat rok-rok masa Cit bahgia putroe siti Akan teutapi han troh hawa Tuhan esa hana neubri Lon miseue sidroe ulama Lapar dahaga malam hari Keunan sidroe ureueng datang Geuba hidang jroh han sakri Geupeuduek le u hadapan Geupeugah nyankeuh khanduri Ban lon deungo geukheun meunan Sang bak jeum nyan lon makeuen le Akan teutapi pakri daya Lon puasa goh troh hari Nyankeuh nyang na bacut capa Ulama ie mata ile Sang geupajoh bateue puasa Teumeureuka lom bak Rabbi

Han geupajoh deuk hana ban Ngon sabab nyan reuloh hate Nyankeuh miseue he sambinoe Malam uroe that beureuhi Oh lon kalon ateueh gata Sang lon wa-wa hai putroe ti Nafsu hate lon eh dua Lon meuseunda malam hari Akan teutapi bacut cupa Hana rila nibak Rabbi Sabab sumpah lon ka habeh Hana lon eh ngon isteuri Hareuem judo ulon peutoe Meung goh sampoe cinta hati Meunan janji yoh saboh roe Paban jinoe bintang pari Teuma seuot tuan putroe Tuanku droe tapeugah kri Peue peunyaket that meularat Peue nan ubat nyang neucari Tajul Muluk jaweueb leugat Pirak lipat ngo lon rawi Deelat ayah saket mata Neumoe rukha malam hari Teungku nujum nyang calitra Ubat mata Meungkawali Nyangkeuh bungong hai sambinoe Ayeuem putroe nyang juhari Meung ek na nyan bungong putroe Puleh jinoe mata abi Ubat laen puteh lusoh Peue nyang geuboh hana rasi

Maken taboh meutamah brat Ampon deelat ajai mate Oh lon deungo haba meunan Lon tren yoh nyan he putroe ti Habeh lon jak jeueb-jeueb donya Troh bak gata lon peureugi Nibak judo ulon ingat Lam meularat suntok sabe Bu lon makeuen han tom mangat Gundah lon that hana sakri Meung goh meuteumeung bungong putroe Nyum beujinoe ulon mate Oh ka mate ka lheueh adat Tan le ingat bunda abi Meunan narit banta muda Ngon ie mata laju ile Cut Mahmuda seuot meunoe Ampon kamoe wahe duli Meunyo meunan ampon deelat Saba siat dalam hate Piyoh dilua meung sikeujab Lon riwayat ubak umi Bek tuanku hate rukha Bicara dilee tacari Meukarat that kheundak bungka Han neukira tinggai kamoe Hana neuweueh ube seuma Patot hamba tinggai sinoe Meunan jikheun putroe muda Po cut banta seunang hate Teuma seuot po jroh rupa Hai adekda nyang juhari

Meunyo cit na gaseh gata Jak peuhaba ubak umi Meuhan meunan wahe putroe Izin jinoe lon peureugi Adat han rijang meuseuki treb Adat han udep bahle mate Keupeue guna adat udep Malee aib hai putroe ti Nibak ayah saboh bagoe Nibak putroe pi han meukri Narit timplak geunap uroe Bah lon boh droe mangat mate Meunan neukheun banta muda Pura-pura le peureugi Teuma seuot cut Mahmuda Hai meukuta deungo kami Pakon duli beungeh raya Hana saba ube pade Di lon judo lon meuseunda Di meukuta cit beungeh le Lheueh nyan teuma putroe muda Beudoh lanja jak bak umi Tajul Muluk nyang bahgia Neukheun sigra bak isteuri Wahe judo bungong meurak Gata tajak ubak umi Meunan neukheun haba sikrak Bungong meurak nyang juhari Takheun ulon rindu sangat Keumeung lihat taman sari Meunan neukheun bungong riwat Bek panyang that bak tarawi

Jeuet keu teulah teuma dudoe Sinyak putroe ka jijak le Oh troh keudeh po sambinoe Tanyong meunoe uleh umi Wahe aneuk bungong uroe Peue buet keunoe ho suami Peue na susah hai aneuk droe Han got bagoe lon kalon ri Peugah rijang bijeh mata Ulon pi ka gundah hate Teuma seuot putroe muda Deungo hamba wahe umi Laen dumpeue peunoh limpah Nyang lon gundah cit keuduli Geunap uroe apoh apah Cit lam susah hana sakri Meunan jikheun putroe indah Diwa Hamilah jitanyong le Pakon aneuk hate gundah Cuba peugah ubak umi Walee jeuoh lon seuleuah Cuba peugah bintang pari Sinyak putroe seuot rijang Banta seudang susah hate Keureuna hate sangat bimbang Kheundak pandang taman cut ti Hate rindu uroe malam Neungieng taman Meungkawali Diwa Hamilah deungo meunan Han muban-ban hanco hate Sikrak hana le suara Seungab sahja han le bunyi

Na sikeujab seungab haba Marit teuma Hamilah siti Wahe aneuk lon pabanbah Leupah sumpah ulon ini Han lon peutroh takot salah Nibak Allah deungon Nabi Jinoe aneuk tajak gist Ubak banta tapeugal kri Bek le susah banta muda Ban nyang cinta ulon nyang bri Meung na tulong nibak Allah Ek leupah lam taman sari Meunan narit bak Hamilah Putroe indah woe keumbali Oh troh keudeh putroe muda Peurab sigra com suami Putroe seumbch nibak teuot Banta sambot deungon jari Lheueh nibak nyan sinyak putroe Jiduek le toe ngon suami Jipeugah le meunoe haba Hai meukuta tanglong nanggri Nibak duli lon eu rupa Nyang neucinta sang ek hase Ban nyang hajat po jonjongan Na ubah han nibak umi Walee mate dalam jeuem nyan Hajat jonjongan neuturot le Meunan narit nibak bunda Yueu peu haba ubak duli Bunda peugah ubak hamba Beuna saba dalam hate

Bek le susah dalam dada Preh meukuta tujoh hari Tajul Muluk hate suka Deungo haba bak putroe ti Teuma seuot banta muda Hai aneukda bintang pari Nibak ulon that meurasa Di jeumala tuto umi Sijuek hate lon hana tara Sang rupa ie krueng hayati Sang lon jeb ie krueng Kalkausa Sijuek rasa jeueb-jeueb seundi Meunan narit banta muda Ubak nisa nyang juhari Teuduek dilee banta deelat Lon sambot Hamilah siti Raja tikoh meuhei leugat Deungon siat keunan troh le Dua jaroe le jiangkat Jideelat Hamilah siti Peue saleh buet na meularat Peugah leugat wahe duli Diwa Hamilah seuot bagah Hai meutuah deungo kami Rahsia nyoe ulon peugah Beugot leupah troh lam hate Bak beurangsoe bek tapeugah Hai meutuah ngieng keukamoe Hajat ulon beuta peutroh Wahe tikoh nyang bestari Takueh tanoh hai ulon beh Keudeh beutroh taman cut ti

Lom ngon gata pi bek jeuoh Oh ka takueh bek gob turi Ngon simalam beuseumeulhoh Beuek troh lam taman sari Taboh tanoh u dalam krueng Bah jirayueng troh u pasi Ngon simalam tapeuruhung Tikoh tatueng sampe u gle Tikoh seuot insya Allah Ngon meutuah po cut kami Raja tikoh jiwoe bagah Rakyat jikrah sampe u gle Teutap tikoh rakyat jikrah Ngo lon peugah wahe akhi Badan mantong ube guda Dumnan raya tikoh cut ti Teumpat jiduek dalam rimba Yoh nyan masa Sulaiman Nabi Nyankeuh watee lama masa Calitra hikayat ini Meusapat nyang raya-raya Meuploh laksa ribee kati Dumnan rame nyang meupangkat Laen rakyat hanpeue rawi Raja tikoh marit pantah Jipeugah habaran tadi Geutanyoe dum jak seuleuah Beudoh pantah bek le nanti Jibeudoh le dum sinaroe Tikoh pindoe kurek bumi Lam kuta phon jiboh punca Jalan raya hansoe tukri

Phon jikurek watee sinja Sampe faja woe keumbali Nyang di rakyat woe lam rimba Raja-raja u meuligi Bandum rakyat habeh gisa Dalam rimba teumpat sunyi Raja tikoh u astana Jak peuhaba ubak duli Angkat jaroe di jeumala Cukop langka hai putroe ti Ulon sidroe keunoe teuka Nyang laen ka woe keumbali Diwa Hamilah peugah sigra Wahe raja nyang beustari Aneuk ulon jinoe taba Ubak tahta taman sari Ulon harap nibak gata Bek na cupa ube pade Bek jituho le pari diwa Watee taba ngon seumbunyi Beujroh sangat tapeulara Bek binasa aneuk kami Oh troh keudeh bineh taman Tadong sinan le beureunti Tayue kalon mantong sinan Bek tabri tren ubak bumi Bek na bacut cupa asoe Beutroh sampoe puwoe mari Meunyo ubah ban kukheun nyoe Ban sinaroe kupoh mate Peue nyang jikheun bek tabantah Bek na susah dalam hate

Raja tikoh jaweueb bagah Ampon maaf hai putroe ti Nibak ulon hai jonjongan Lon ubah han ube pade Meunyo aneuk po cut laman Cit patot nyan po di kami Raja tikoh meunan kalam Pirak hupam seunang hate Diwa Hamilah tatkala nyan Po bangsawan jimeuhei le Tajul Muluk bungong keumang Troh le keunan neupeureugi Oh troh keunan banta seudang Neuek rijang u meuligi Teuot bunda laju seumbah Banta indah jroh that budi Diwa Hamilah sambot bagah Bu meutuah jantong hate Jinoe aneuk tabeurjalan Bak taman putroe juhari Raja tikoh cit ka sinan Haba yoh nyan jipeugah le Duek tuanku bak rueng kamoe Mangat jinoe tapeureugi Tajul Muluk ek le rijang Neupasang tikoh beustari Tikoh jiplueng hana macam Pantah na ban kilat pagi Han padumna treb jibeurjalan Troh bak taman Meungkawali Leumah taman jroh han bagoe Keunan keunoe jroh han sakri

Tajul Muluk kalon taman Hireuen mandang po juhari Raja tikoh marit rijang Sampe datang wahe duli Hai tuanku po jonjongan Nyankeuh taman Meungkawali Tajul Muluk deungo meunan Neutron yoh nyan ateueh bumi Jimarit le raja tikoh Kalon beudeuh wahe duli Bek treb sinan dong neupiyoh Puteh lusoh takeumbali Po bangsawan marit meunoe Deungo kamoe wahe akhi Meunyo sinoe teudong dasyah Han ek leumah taeu lahe Nyang leubeh got bah le beutoe Laba rugoe ka lon turi Meunan neukheun po samlakoe Tikoh sinoe jipeugah le Han jeuet tajak bungong meulu Marah ibu akan kami Tajul Muluk nyang meutuah Neukheun pantah hai beustari Bek hai teelan hate gundah Beuna salah ateueh kami Meuhan tapateh ban lon peugah Lon grob bagah mangat mate Oh mate lon umu sampoe Gata tawoe ubak umi Meunan neukheun puteh lusoh Raja tikoh susah hate

Teumakot that hana tara Bek binasa bungong pade Teuma jikheun meunoe haba Hai meukuta deungo kami Meunyo neujak tuanku droe Bek treb keunoe lom keumbali Teuma neujak po samlakoe Galak han soe bungong pade Raja tikoh tinggai sidroe Susah han soe dalam hate Banta kalon taman putroe Hireuen laloe hana sakri Tanaman le rupa-rupa Teupat banja jroh han sakri Bak sawo ngon peungata Laen pi na giri bali Rambot langsat han ek kira Ka geupula dum geulheueng li Tajul Muluk pirak hupam Troh bak kulam neupeureugi Neueu laku jroh that macam Bak kulam cut Meungkawali Yoh nyan banta tahe mandang Bak nyum sang-sang han jeuet jak le Batee rukham bak boh beudak Jroh meusigak hana sakri Ijo biru hu meukilat Geusurat ngon jroh meuseundi Bak tiek badan pi that cakap Hu meukilat hana sakri Soe nyang kalon hireuen mandang Nyum bek riwang po juhari

Rukun bungong le that macam Bee meudram-dram sangat wangi Jeumpa puteh bungong peukan Bungong rihan bee keusturi

Bungong meulu jeumpa mirah Nyan pi indah han ek kheun kri Bungong rum bungong geukarah Rinduh reundah dum meuriti

Jipot angen dirui mangat Han soe tupa sang bee wangi Tajul Muluk nyang meutuah Hireuen dasyah bintang pari

Sijuek hate manyoh deundam

Lam seupot klam meunan sang ri

Tatkala nyan muda seudang Bineh kulam duek beureunti

U dalam ie banta pandang Hana macam lale hate Bungong gadoh dalam kulam Meureundam di dalam tuwi

Naga raya sinan meuglong Lingka bungong Meungkawali Susah hate bungong tanjong Keumeung jeumeurang han beurani

Tajul Muluk panyot tanglong

Mohon tulong nibak Rabbi Ya Ilahi poku Tuhan Muhammadan di lon Nabi

Beureukat Nabi akhe zaman Neubri jalan hai ya Rabbi Beureukat intu Nabi Adam Beureukat makam beureukat Nabi

Lheueh neukheun nyan banta indah Neueu leumah saboh meuligi Tajul Muluk nyang meutuah Laju pantah neupeureugi

Ateueh jalan neumeulangkah Meuh meutatah tan peuduli Bak meuligoe putroe indah Keunan langkah po juhari

Ubak rinyeun laju neuek Ka neutarek le sitangke Troh u rumoh bungong rubek Neungieng bilek jroh han sakri

Neueu ureueng tan meung sidroe Po samlakoe hireuen hate Saboh bilek nibak sagoe Kunci beusoe jroh han sakri

Tajul Muluk keunan neujak Ka neurinthak le boh gunci Habeh kuat banta beuot Han cit teulet kong han sakri

Lheueh nyan banta beuet seuleusoh Habeh luroh gunci beusi Oh troh keunan banta lalu Neukalon hu na sang hari

Intan beulian dum meuhato Han ek teungku ulon rawi Macam-macam dum anika

Ija sutra ngon lahuri

Lampu kande hu meucahya

Han peue kira buet jen pari Ngon keurusi jroh mubanja

Tilam sutra peurmadani

Di teungoh nyan saboh peuratah Meujeureulah hu sang hari Oh takalon hate dasyah Sang-sang ulah syurga tinggi Di ateueh nyan sidroe putroe Rupa bagoe budiadari Siurat beuneueng tan bak asoe Teueh sidroe bungong pade Tajul Muluk nyang bahgia Keunan mata ngieng putroe ti Neungieng putroe jroh that rupa Hana nyang sa beurangkari Leungo badan miseue geumpa Rab binasa bintang pari Cut putroe teueh teuhanta Nyum sang geuwa bungong pade Muka jihu meucuaca Aneuk raja diwa pari Lom aurat leumah u lua Sang ka gila banta saidi Hana bandeng dalam donya Nyang ek sama Meungkawali Soe nyang kalon ladat mata Sang beutawa wahe nyak ti Nyang meuligoe han peue peugah Meutatah ngon jawareudi Gamba cicem jroh meuato Hireuen tahe teukab bibi Ka teudong-dong meujudo-judo Leuek ifo ngon mirahpati Laen nibak nyan han peue ato Jroh that laku teumpat cut ti

Tajul Muluk hireuen tahe Bungong keundo'pujoe Rabbi Adat meung kon bagah teuringat Rab ka sisat bungong giri Tajul Muluk ingat untong Geucre gampong tinggai abi Lon jak mita ubat ayah Lon seuleuah jeueb-jeueb nanggri Oh rab meuteumeung bungong indah Buet nyang salah lon jak cari Neupeulindong lon ya Allah Bek roh leupah buet nyang asi Bungong kayee le putik han jimat Alamat kilat ujeuen sabe Neutob hate lon ya Malaikat Bek teuringat buet nyang keuji Meunan neukheun putik langsat Peurab leugat bak putroe ti Oh troh keunan po samlakoe Leumah meunoe dalam hate Bah lon keubah saboh jaroe Keu cut putroe bah le lon bri Meunan ingat po samlakoe Neumat jinoe ija cut ti Lheueh nibak nyan mat bak jaroe Po samlakoe geunta hate Bak neumat nyan banta deelat Rasa lazat jeueb-jeueb seundi Sang ka putoh jeueb-jeueb urat Dum nan lazat tangan cut ti Tajul Muluk nyang samlakoe Teuringat nyoe dalam hate

Hana hase lon pandang nyoe Akhe dudoe aib keuji Tinggai nyan po samlakoe Euncien putroe neutarek le Nibak jaroe banta hila Han cit jaga cut putroe ti Oh lheueh neucok euncien putroe Di meuligoe ka neutron le Neujak laju banta seudang Bineh kulam ka neutiti Na sikeujab banta sinan Leumah yoh nyan bungong cut ti Ka jibeudoh bungong indah Jisangka sah Meungkawali Keunan laju ka meulab-lab Jipeurab bak bintang pari Tajul Muluk bungong neumat Neupot leugat han le nanti Tinggai tangke nibak teumpat Neuwoe leugat banta saidi Raja tikoh tanyong leugat Pakon treb that wahe duli Tajul Muluk seuot laju Na peue lon eu rindu hate Nyan keuh sabab treb sigeutu Lheueh nyan laju lon keumbali Beukit meunan hai jonjongan Neuek rijang ateueh kami Tajul Muluk banta seudang Neupasang tikoh beustari Jibaplueng le bungong keumang Hana lintang siat nanti

Wie ngon uneuen hana pandang Hingga datang u meuligi S Dalam kuta tamong rijang Sajan- sajan deungon duli Oh lheueh tamong troh u dalam Neuek curam u meuligi Diwa Hamilah nyang analan Duek teusimpan bak keurusi Jieue banta ka meuriwang Hana macam suka hate Tajul Muluk nyang meutuah Seumbah bagah teuot umi Teuma marit Diwa Hamilah Meutuah ka puleh hate Banta seuot alhamdulillah Ngon ijazah nibak umi Ka lheueh lon eu wahe bunda Lazat mata puleh hate Hamilah kheun hai meutuah Jak woe pantah bak isteuri Banta beudoh laju langkah Ubak zaujah neukeumbali Mahmuda ngieng banta indah Beudoh pantah com di gaki Na meuteumeung bungong indah He khalifah tapeukong nanggri Tajul Muluk seuot bagah Ngon meutuah bintang pari Deungon doa po jroh rupa Ka seumpureuna Tuhan neubri Putroe deungo meunan haba Hate suka hana sakri

Teuma jibet hidang raya Cok piala jisrah gaki Neumakeuen le sapat dua Hate suka po juhari Oh lheueh makeuen pinah hidang Cut buleuen trang cok ceuradi Jicok ranub ka jisuleueng Le cut meugleueng keu suami Sinan teutap po samlakoe Di meuligoe ngon isteuri Meusuka-suka malam uroe Bandua droe that beureuhi Padum lawet akhe masa Banta muda leumah pike Peue keuh lon duek sinoe dasyah Teungku ayah saleh pakri Ka treb ulon cre di tangga Bah lon gisa woe u nanggri Lom pi ibu dalam rimba Saleh peue ka Tuhan bri

Lagi judo di astana Jimoe rukha Janu Hati Meunan leumah dalam dada Sret ie mata tan beureunti Uroe malam hate susah Apoh apah hana sakri Ie mata ro ile limpah Neuhei Allah tan beureunti Putroe kalon meunan laku Tanyong laju bak suami Deelat ampon hai tuanku Pakon karu wahe duli

Pakon judo susah han soe Lon eu neumoe tan beureunti Teuma seuot banta seudang Judo badan ngo lon rawi Masa dilee ulon bungka Tinggai bunda deungon abi Tinggai ayah lam nazaa Treb ka lama lon peureugi Janji dilee mita ubat Oh noe lambat goh keumbali Saleh pakri deelat raja Saleh cit na saleh mate Nyan keuh sabab hai sambinoe Hate lon nyoe sang ka cre bre Meung na izin bungong keutoe Bah le lon woe ubak abi Bumangat hate putroe indah Keunoe pantah lon keumbali Meunan banta ka neupeugah Jaweueb pantah bintang pari Meunyo tuanku neujak gisa Patek hamba jinoe pakri Bek neukeubah sinoe hamba Sajan neuba wahe duli Tajul Muluk jaweueb sigra Hai adekda bungong giri Pakri tajak po jroh rupa Hana rila nibak umi Meunyo hana izin bunda Han jeuet lon ba gata nyak ti Nyang got jinoe hai adekda Jak peu haba ubak umi

Meung ka izin nibak bunda Jadeh lon ba bintang pari Bah le tajak sajan hamba Hai adekda nyang juhari Lon meulakee meuah deesya Peugah haba lon keumbali Meunan narit banta muda Neujak lanja ngon putroe ti Tatkala nyan deelat ampon Laju neutron di meuligi Sinyak putroe panyot tanglong Buka payong meujeuradi Soe nyang kalon hireuen tahe Jroh siuko bandua si Putroe jijak leuntek leuntok Ulee baho jroh han sakri Hingga troh bak pinto kuta Tamong lanja po juhari Jiek laju u astana Sigo dua deungon duli Hamilah ngieng troh aneukda Lapang dada ube guci Diwa Hamilah tanyong sigra Hai aneukda tangke hate Peue na hajat hai aneukda Peugah sigra ubak umi Peue na galak nafsu hawa Putroe muda neujaweueb le Meuah ampon wahe bunda Lon nyoe dua deungon duli Lon meuhajat ngon meukuta Sang-sang rasa reuloh hate

Sabab teuringat keu ayahanda Po meukuta kheundak keumbali Teuma jinoe wahe bunda Pakri daya lon disini

Sabab banta keumeung bungka Neujak gisa woe u nanggri Neujak saweue ayah bunda Treb ka lama neupeureugi Neukheun sajan ulon neuba Meung na rila nibak umi

Meunan narit putroe muda

Ubak bunda dum jirawi

Diwa Hamilah seuot leugat Kru seumangat bungong pade Ban nyang suka pirak lipat Di lon mangat dalam hate

Jroh that meunan hai aneukda Han got basa tinggai sini Keupeue guna tinggai ceuntra Meunyo hana cicem nuri

Keupeue guna meuh peurmata Meunyo hana ampon duli Bukon sayang gapeueh panjoe Angen tampoe sret u pasi

Patot aneuk seutot lakoe Bungong uroe bu meusampe Bukon sayang lon eu peutoe Nibak sagoe ka meugule Gata aneuk seutot lakoe Ulon sinoe reuloh hate Bukon sayang cicempala Jisama le rajawali

Bukon sayang u ke muda Ka jiseuba le tupe gle Han meusampe lon peulara Hai aneukda tinggai umi Jinoe tatren po jroh rupa Pajan masa ta keumbali Tinggai ulon ureueng tuha Ro ie mata malam hari Wahe aneuk Tajul Muluk Nyoe sion ok nibak umi Nyoe keuh nyang na hai samlakoe Nibak kamoe ureueng faki Akan teutapi lon peuingat Nyoe hikeumat hai putehdi Watee hajat tameunasu Seubut laju nama umi Bek talupa keu lon sidroe Hai samlakoe bintang pari Cit troh ulon ubak gata Deungon tandra lon peureugi Nyan wasiet lon bek taubah Hai meutuah malam hari Nyoe pat judo hai aneukda Bah le taba woe u nanggri Bek takeubah sajan hamba Susah teuka bungong pade Sabab ulon ureueng tuha Han ek jaga po juharı Lagi pi jih aneuk dara Jimeuhawa jeueb-jeueb nanggri Nyan keuh aneuk lon kheun taba Mahmuda bek tinggai sini

Bek jeuet aib lon ngon gata Hai aneukda jantong hate Diwa Hamilah meunan haba Seuot lanja banta saidi

Insya Allah wahe bunda Di jeumala narit umi Sinyak putroe jadeh lon ba

Meunyo bunda mangat hate

Teuduek di lua Diwa Hamilah

Laen ulah ulon ratoh

Meunyo sot-sot saboh ulah

Hana ceudah hai teungku beh

Bah le jinoe balek macam Laen ragam ulon saloh Jipot angen raja padang Kapai prang jiwoe di Susoh

Tajul Muluk banta seudang Hate seunang lazat tuboh Seumbah bunda laju rijang Kheundak pulang nanggroe jeuoh

Hamilah kheun teuma leugat Tapreh siat puteh lusoh Jicipta saboh hikeumat Guda siat keunan ka troh

Hamilah jok keu bangsawan

Sang buleuen trang hu seumeuloh

Cukop peulana deungong keukang

That analan guda utoh Nyoe keuh nyang na bak lon tuan

Laen cit tan hai aneuk beh Beusoe Awan nama guda

Hai aneukda sangat utoh

Nyan keuh aneuk bak Hamilah Lon bri sah keu puteh lusoh Tajul Muluk nyang jroh rupa Hate suka ma teungku beh

Lakee izin banta muda Ban dua ngon putroe Aloh Wahe bunda bungong meurak Di lon kujak nanggroe jeuoh

Doa beule keubajikan Keu lon tuan hai po ma beh Diwa Hamilah seuot yoh nyan Izin laman meuh seuneupoh

Oh lheueh izin nibak bunda Neutren lanja puteh lusoh Neuba judo putroe seudang Hate seunang lazat tuboh

Ateueh guda ka neupasang Jiteureubang dalam leusoh Siat meuyub siat manyang Ban seulayang guda utoh

Pakri ngon su macam-macam Dalam awan tango kiroh Watee meuyub sang su canang Oh ka manyang miseue guroh Ka muble-ble dalam awan Guda jalan hana teudoh Duek di ateueh banta seudang Ngon cut intan nyang seumeuloh

Troh u nanggroe keunan datang Buni Yaman nama geuboh Sabab guda meupeurasan Sulotan neuwoe di jeuoh

Ateueh kuta jiteureubang Su meukrang-krang tango kiroh Dalam nanggroe sare kiam Sang-sang macam langet runtoh Habeh karu dara agam Lam seupot klam salah saloh Ladom jiplueng lam beurawang Ladom u blang keudeh ka troh Han meuho le meutang ilang Ladom riwang ma teungku beh Sang-sang bala keunan datang Dara agam sare rioh Dalam kuta teubiet tamong Miseue langong tango kiroh Ubak raja ladom kheun ban Pakri macam tuanku beh Meunan keudum tanyong manyong Ureueng inong nyang that rioh Teutap rakyat ulee mumang U manyang jinoe lon ratoh Yoh nyan guda jipo tajam Rimba itam keudeh piyoh Beungoh uroe han le malam Seungab kiam han le rioh Asoe nanggroe ngieng u manyang Ulee mumang hai cuda beh Hana sapeue na mubayang Tahe mandang bandum layoh Geusyik waki uleebalang Dum sibarang salah saloh Geutanyong le meunoe macam Meusu beuklam peue that rioh

Ladom jikheun han lon tuban Bala Tuhan kadang ka troh Bukon meunan hai syeedara Bak keunira lon nyang putoh Kadang cit ka troh geureuda Manusia jimeung sampoh Seuot laen teuma sigra Nyang kon haba tajak ratoh Hana got niet dalam dada Waba puta rimueng pajoh Kon talakee nyang sijahtra Nibak bala beuek jeuch Seuot laen teuma sigra Bit nyo gata nyang di baroh Lon meututo pura-pura Peue nyang subra gata rioh Takheun keugob han takira Tathee raya teuga tuboh Tunyok meununyok han got gura Lam-lam mata jaroe ka roh Meudeh meunoe kameudawa Kiam subra meugeurupoh Bandua droe beungeh raya Nyak kuala ngon nyak baroh Tajo sidroe ureueng tuha Geukheun teuma peue nyang kiroh Seungab keudeh bek le dawa Got tasaba bek le rioh Hana guna tameudawa Seungab teuma han le gadoh Jeuet keu dumnan haba dawa Lon peugisa puteh lusoh

Sideh piyoh dalam rimba Banta muda nyang seumeuloh Seupot uroe teuka sinja Beudoh lanja meuh seuneupoh Leupah magrib teuka isya Ateueh kuta keunan ka troh Deungon bunyoe sang geureuda Miseue rupa langet runtoh Mise beuklam meunan rupa Ngon suara ureueng jeuoh Tujoh uroe tujoh malam Sabe kiam hana teudoh Hana peue le lon peugah ban Hana macam subra rioh Lheueh nibak nyan teuma dudoe Jitron jinoe guda utoh Neupeurab le po samlakoe Sajan putroe teumpat jeuoh Di teungoh blang neupioh droe Ureueng nanggroe keunan ka troh Teujak teudong tahe gante Ureueng nyang le teubiet reuoh Teuma leumah dalam dada Pane teuka meuh seuneupoh Han tom lon eu meunan rupa Cit bandua hu seumeulhoh Saleh cit nyan budiadari Tuhan neubri keunan ka troh Neukaronya uleh Tuhan Dalam awan keunan jatoh Meunan-meunan dum jipeugah Rakyat barullah keunan ka troh

Nyang ladom woe dalam kuta Jak peuhaba bak cut aloh Janu Hati putroe muda Di astana han tom jeuoh Nyang ladom woe dalam rimba Jijak mita puteh lusoh Troh le sidroe ureueng teuka Ampon hamba hai po cut beh Jeh pat di blang saboh peurasan Dalam awan keunan jatoh Oh lon kalon hai cut intan Hana meunan ureueng that jroh Han tom lon eu meunan macam Inong agam hu seumeuloh Putroe deungo meunan haba Meuntroe sigra le jisuroh Janu Hati peugah sigra Ho ka gata nyang ka na troh Cuba tajak u blang raya Tapareksa taeu beudeueh Beurijang keunoe tagisa Peugah haba keunoe beutroh Peurdana plueng laju bagah Bajee basah teubiet reuoh U blang laju geuplueng pantah Bak cut indah keudeh ka troh Oh troh keudeh lem peurdana Ban geungieng keu puteh lusoh Sujud laju peumulia lem peurdana sangat utoh Ampon meuah po meukuta Pateh teuka keunoe ka troh

Lon ngo duli ka neugisa Tan lon kira payah tuboh Jinoe deelat nyang meurasa Bah tagisa keudeh beutroh Bek le sinoe po meukuta Hana guna sinoe piyoh Han got meujeulih kureueng basa Sabab neuba puteh lusoh Oh gob kalon han got rupa Tan mulia putroe jeuoh Tajul Muluk jaweueb sigra Ngon suara sangat peunoh Hai peurdana leungkiek sabon Deungo ulon peugah beutroh Beudoh dilee tajak gisa Dalam kuta keudeh tabloh Peugah ubak putroe muda Peugah hamba woe di jeuoh Lagi lon ba po sambinoe Sajan kamoe nyoe ho ka troh Meunan neukheun ubak putroe Lon sinoe dilee piyoh Teuma beudoh le peurdana Laju gisa bak cut aloh Oh troh keudeh peugah haba Ampon hamba hai po cut beh Ka troh lon jak bungong jeumpa Lon pareksa keudeh ka troh Oh ban lon eu leumah rupa Po meukuta woe di jeuoh Deungon putroe sajan neuba Lon eu rupa that seumeuloh

Lon jak laju peu mulia Bandua ngon puteh lusoh Neuyue peugah bak putroe ti Neukheun duli woe di jeuoh Sajan neuba po juhari Ubak cut ti yue peugah troh Janu Hati deungo meunan Lazat badan sijuek·tuboh Buka peutoe cok peukayan Ngui u badan puteh lusoh Oh lheueh meungui bungong keumang Dum deundayang keunan ka troh Boh ngon ranub dalam puan Keudeh u blang laju jibloh Jiba laju keunan lam blang Ngon deundayang leubeh utoh Soe nyang kalon tahe mandang Cahya subang hu seumeuloh Peuhah payong bandum rata Po jroh rupa sangat utoh Oh troh keudeh ubak raja Santeuet banja dong di jeuoh Janu Hati putroe muda Di jeumala jaroe jibet Jimarit le po jroh rupa Ngon suara manyoh layoh Soe deungo su putroe muda Sret ie mata han ek sampoh Cit teuka weueh dalam dada Lazat rasa sang ka layoh Ie on kayee lam piala Cit peunawa sijuek tuboh

Jipeureutek ateueh banta Beu sijahtra tuanku beh Lom breueh pade dihambo ka Ngon suara lom jitumpoh Bungong sitahon hu meukilat Kru seumangat puteh lusoh Meuah po cut puteh lumat Jak bak teumpat nak tapiyoh Peugot tumpoe teumon buleukat Pisang brat peugot peunajoh Tuhan neubri ek seulamat Meusampe that payah tuboh Pisang nu keu eumpeuen musang Pade di blang eumpeuen tikoh Wahe adek putroe seudang That lon sayang puteh lusoh Udeh po cut u astana Ubak cuda tajak piyoh Rumoh lon na saboh sagoe Udeh jinoe hai adek beh Akan teutapi hai sambinoe Cuda teunyoe han saho roh Tan sapeue na lon hai nyak ti Bek weueh hate puteh lusoh Lheueh jikheun nyan Janu Hati Ka jimat le putroe ban troh Jiba laju u astana Tinggai raja sinan piyoh Oh troh jiba pirak hupam Ateueh tilam jipeuduek troh Got that putroe peu mulia Bek upat ceula ateueh tuboh

Oh troh watee asa uroe Po samlakoe neuwoe le troh Janu hati putroe muda Ie lam gaca ka lheueh jiboh Jipeurab le cok seurahi Jak srah gaki puteh lusoh Oh lheueh jisrah gaki duli Nibak jaroe jimat le troh Jimat laju keumbang ijo Dara baro jak pupiyoh Puduek laju ateueh kaso Dara baro keunan ka troh Jiseumbah le gaki jaroe Raja euwoe nanggroe jeuoh Teuma jiduek putroe meugleung Ranub seuneuleueng ka lheueh jiboh Akan banta ka jisuleueng Bungong seumpueng sangat utoh Bandua droe putroe meugleueng Wie ngon uneun hana jeuoh Tajul Muluk that sukaan Ngon cut intan puteh lusoh Na sikeujab piyoh sinan Ngon hidangan keunan ka troh Janu Hati buka hidang Angkat tangan cut seumeuloh Wahe adek bungong keumang Makeuen rijang hai po cut beh Makeuen adek peue mudah na Rumoh cuda banda jeuoh Lagi adek han soe mita Sabab raja treb ka gadoh

Nyoe keuh baro lon eu rupa Grak Rabbana hai po cut beh Lheueh nyan teuma geusrah jaroe Ureueng lhee droe makeuen sunggoh Geupajoh bu sibuju jaroe Nikmat ka troe lazat tuboh Oh lheueh makeuen lhee seureuta Putroe muda ranub jiboh Teungoh duek-duek peugah haba Malam pi ka laju jeuoh Teuma beudoh laju sinan Bak tidoran geujak piyoh Banta neueh bak malam nyan Dua sajan putroe utoh Rot deh rot noe putroe muda Di teungoh banta hai adek beh Manyoh meusyen hana tara Cit maklum ka hai cupo beh Ka padum treb ka puasa Hidang raya keunan ka troh Jinoe ka troh watee buka Peue lom cuda malam jeuoh Makeuen minom laju sigra Lazat rasa badan tuboh Teutap sinan po samlakoe Deungon putroe nyang seumeuloh Hana sapeue keususahan Meulaenkan lam tawajoh Grak teukeudi nibak Allah Ingat ayah puteh lusoh Saleh mantong saleh hanle Masa lon cre saket tuboh

Padum zaman lon beurjalan Rimba Tuhan habeh lon bloh Mita ubat ayah laman Saket badan seunang tuboh Rasa badan sang ka mate Han lon turi seupot beungoh Lon peujok droe ubak Allah Nyum sang sudah nyawong gadoh Dumnan yakin lon jak mita Bak ayahanda lon woe beutroh Ka meuteumeung Meungkawali Ngon putroe ti na dua boh Tan lon ingat aib keuji Dumnan duli saket tuboh Di lon laloe ngon isteuri Malam hari seunang tuboh Ibu bapak bah le mate Asai hate lon tawajoh Meunan pike banta muda Sret ie mata ban ujeuen toh Meunan ingat dalam dada Han meurasa bu neupajoh Janu Hati tanyong sigra Hai meukuta meuh seuneupoh Pakon tuanku hate rukha Ubak hamba neupeugah troh Tajul Muluk peugah rijang Hai bultuen trang nyang seumeuloh Di lon hate sangat gundah Ingat ayah saket tuboh Saleh mantong saleh hanle Han lon tukri hai intan beh

Harap jinoe nibak'gata Izin hamba puteh lusoh Ulon jak woe sikleb mata Mangat sigra puleh tuboh Janu Hati seuot rijang Ulon sajan tuanku beh Bek neukeubah ulon sinoe Akhe paloe ateueh tuboh Meunan narit po sambinoe Banta sidroe hate seungkoh Bak lon judo suka hate Bu meusampe payah tuboh Meunyo hajat lon meugisa Dua gata lon ba beutroh Lon mupayah bu meusampe Hai boh hate puteh lusoh Meunan narit po samlakoe Sinyak putroe hate manyoh Yoh nyan putroe jimeuhase Jipeugot le ngon peunajoh Dum makanan hase lingka Beukai bungka nanggroe jeuoh Hingga cukop dum anika Po jroh rupa hate seungkoh Teuma jikheun putroe muda Ulon beuna tuanku beh Tajul Muluk seuot sigra Bekle rukha puteh lusoh Nibak ulon hana dawa Ikot sahja nyawong tuboh Tajul Muluk kheundak gisa Bak syeedara neupeugah troh

Hai kakanda ulon peuet droe Jinoe tawoe nanggroe jeuoh Tajak saweue ayah bunda Treb ka lama tameurawoh Jinoe patot tajak gisa Ubat mata puwoe beutroh Tajul Muluk meunan peugah Hamidasyah hate seungkoh Hamidasyah seuot pantah Ban nyang titah puteh lusoh Nibak kamoe hana dawa Ikot saja ban nyang suroh Hamidasyah meunan haba Po jroh rupa hate manyoh Neubeudoh le po samlakoe U meuligoe neuek ka troh Neupeugah le ubak putroe Hai sambinoe meuh seuneupoh Singoh putroe jadeh bungka Bak ayahanda tawoe beutroh Bak malam nyan eh beuradu Sajan bungsu nyang seumeuloh Teuka beungoh teubiet faja Jak srah muka deungon tuboh Banta peugah ubak putroe Hai sambinoe meuh seuneupoh Beudoh judo tajak bungka Bek le lama sinoe piyoh Janu Hati ngon Mahmuda Beudoh sigra hate seungkoh Teubiet laju bungong keumang Kapai sinan jilhom saoh

Tajul Muluk nyang bangsawan Peuek intan lam kapai troh Oh troh dalam kapai raya Duek le lanja keumeu piyoh Tajul Muluk peugah haba Hai adekda puteh lusoh Bah rot laot gata gisa Rot lam rimba di lon kubloh Gata adek han ek bungka Gunong raya manyang lusoh Di lon judo bah rot rimba Bak Rabbana lon jok tuboh Beule doa po jroh rupa Dalam rimba di lon kubloh Meungna tulong bak Rabbana Bah lon lingka gunong tujoh Teuma seuot putroe muda Ampon hamba tuanku beh Bek tuanku woe ret rimba Gunong raya manyang lusoh Peunyaket le han peue peugah Badeuk gajah rimueng buloh Laen tuanku singa gajah Lam-lam paya sinan piyoh Lagi susah hana bagoe Gaki jaroe duroe pajoh Meunyo tuanku woe ret rimba Kamoe dua ret nan meubloh Saket mangat sama rasa Hai meukuta puteh lusoh Lagi mangat kamoe rasa Kamoe dua ka meutuoh

Lom tan mupat dairah nanggroe Hai samlakoe meuh seuneupoh meunan narit putroe dua Ngon ie mata ban ujeuen toh Teuma seuot banta muda Hai adekda puteh lusoh Bek tagundah po jroh rupa Cit na tanda teumpat piyoh Oh meuteumeung saboh tanda Kapai raya jilhom saoh Nyang ulon nyoe bek takira Tuhan peulara nibak musoh Tajul Muluk meunan haba Tron le sigra tan le piyoh Oh ban leupah neutron banta Kapai raya jibet saoh Meulayeue lam laot raya Teutap bungka meuh seuneupoh Teutap bungka dua putroe Kisah muwoe banta utoh Deungon aduen Hamidasyah Neucok langkah rimba neubloh Laju geujak uroe malam Neukira tan payah tuboh Teungoh neujak po samlakoe Banta peuet droe lakee piyoh Tajul Muluk ngon aduen droe Piyoh jinoe dang tho reuoh Dang-dang piyoh puleh payah Hamidasyah marit utoh Wahe adek intan bungong Lon teumanyong hai adek beh

Jinoe adek kheun beukeunong Lon that bingong hai intan beh Na meuteumeung Meungkawali Ubat abi tapeugah troh Hajat cinta hana sakri Lon teupike dalam tuboh Meunyo cit na Meungkawali Ubak abi lon woe beutroh Meunyo hana Meungkawali Bahle kamoe hilang tuboh Sabab ka lheueh sumpah janji Deungon duli hai adek beh Tajul Muluk seuot sigra Hai kakanda bek le rioh Lon jak mita jeueb-jeueb donya Meuteumeung ka hai dalem beh Po jih hana hai kakanda Lam astana teungoh layoh Teuma lon jok pantah sigra Puwoe teuma keunoe ka troh Hana peue ci hai kakanda Puleh sama oh ka taboh Sabab payah lon jak mita Ulon bungka nanggroe jeuoh Manyak lon kon dalam rimba Jeueb-jeueb rimba habeh lon bloh Seureuta ulon sambe nyawa Hai kakanda puteh lusoh Lon jak mita Meungkawali Nak meusampe aneuk geubeh Deungon ibu lonpih sama Tuhan peulara hai dalem beh

Bah le jinoe lon balah guna Keu ayahanda jinoe beutroh Tajul Muluk meunan peugah Hamidasyah jaweueb utoh Wahe aneuk bungong jeumpa Buet ka lama bek le rioh Keureuna ayah ureueng tuha Akai bicara habeh gadoh Jinoe adek nyang taingat Bungong ubat puwoe beutroh Meunan narit Hamidasyah Seuot pantah puteh lusoh Kon lon upat hai kakanda Proe hai haba lon meuteuoh Hana lon tueng saket hate Bek Allah bri nyang meunan roh Adat meung na hate lon brok Han lon jak jok nyawong keu musoh Meung na hajat neukeumeung ci Jak cari nyang saket tuboh Pat nyang na ureueng nyang buta Neujak mita toe ngon jeuoh Hamidasyah deungo meunan Geujak yoh nyan hana piyoh Teungoh jak-jak banta muda Ureueng buta keunan ka troh Meuhei laju keunan sigra Hai nek kuya keunoe piyoh Ureueng buta peurab laju Han deuh geueu meuh seuneupoh Hamidasyah mat bak jaroe Bak samlakoe geuba le troh

Oh troh keunan bak bangsawan Ie lam cawan ka lheueh geuboh Neureundam le Meungkawali Teuma neubri boh bak tuboh Oh lheueh geuboh ubat mata Puleh sigra dum geusampoh Deungon siat puleh mata Ureueng tuha hate manyoh Ucap syuko pujoe Tuhan Bak bangsawan geusujud troh Lheueh nibaknyan laju geuwoe U rumoh droe laju ka troh Tajul Muluk ngon aduen droe Ban sinaroe han le piyoh Geujak sabe hana padoe Gaki jaroe kareueng pajoh Bit pi meunan teupat kasad Hana ingat dalam tuboh Banta peuet droe laen kira Banta muda jikeumeung poh Meung kon meunan malee mata Bungong hana tawoe jeuoh Nibak ayah tan meuguna Nyang na gob ceula ateueh tuboh Habeh pakat banta peuet droe Bak samlakoe lakee piyoh Tajul Muluk deungo meunan 、Piyoh yoh nyan puteh lusoh Na sikeujab sinan lama Po jroh rupa mata layoh Teungeut laju po samlakoe Banta peuet droe mat bak tuboh

Jipoh laju bungong geutoe Reumok asoe sang ka luroh Nyang ladom poh deungon kayee Ladom batee lom jitumpoh Reumok asoe bungong keumbee Sang ka pade nyawong putoh Banta peuet droe meunan pike Nyawong ka cre nibak tuboh Jijok bungong Meungkawali Jiteungoh le gunong lusoh Padum buleuen jibeurjalan Sikeujab tan na jipiyoh Geujak laju uroe malam Bineh padang keunan ka troh Ka meuteumeung saboh rangkang Ureueng meuladang sinan piyoh Hamidasyah marit yoh nyan Tajak kaman siat beutroh Ureueng meuladang jijak sigra Dalam kuta keudeh ka troh Jipeugah le ubak raja Banta muda woe di jeuoh Raja deungo meunan haba Bak peurdana le neusuroh Geujak tueng le teuma rijang Tot meuriam sare rioh Meusu meuriam leungo alam Siulah sang geuprang musoh Oh troh keudeh dalam kuta Lam astana laju piyoh Meuteumeung le deungon raja Seumbah sigra puteh lusoh

Raja nanggroe sret ie mata Basah ija han ek sampoh Wahe aneuk bintang kala Pakon lama hai intan beh Teukeudi ulon ajai teuka Putoh asa apon tuboh Banta peuet droe seuot sigra Hai ayahanda lon jak jeuoh Lon jak mita Meungkawali Lam glap cut ti ulon piyoh Ban meuteumeung ubat abi Lon keumbali keunoe ka troh Deungon doa syahi alam Ban cintaan Tuhan peutroh Jilakee ie saboh cawan Troh le rijang hai teungku beh Meungkawali dalam tangan Jiboh keunan lam cawan troh Geugeusuek le nibak mata Ngon siat ka puleh tuboh Hana sapeue pi na ceudra Allah taala sangat utoh Kakeuh meuwoe miseue nyang ka Teutap raja lam tawajoh Ucap syuko pujoe Allah Khalifah hate that manyoh Teuma marit po teuraja Tuah gata hai aneuk beh Adat kon na peuet droe gata Ulon nyoe ka han saho roh Meutuah that bijeh mata Ka seumpureuna payah tuboh

Meunan neukheun raja nanggroe Aneuk peuet droe hate manyoh Sang gaki han jab bak bumoe Meunan keuh-proe hai teungku beh Lheueh raja meung khanduri Bungong giri woe di jeuoh Uroe malam mupeurasan Peh bunyi-bunyian sare rioh Subhanallah han peue tanyong Agam inong geupah geupoh Rame rakyat miseue langeng Baroh tunong keunan dum troh Han ek peugah buet khanduri Meubuet duli han peue teuoh Teutap raja meung khanduri Laen rawi ulon saloh Taek ugle koh seumantok Peuget bidok jampang tawoe AMMA BAKDU jinoe ka troh Tajul Muluk lon hareutoe Oh lheueh jipoh le syeedara Dalam rimba tinggai sidroe Jitiek sinan dalam rimba Di jih sigra laju jiwoe Teukeudi Tuhan Maha suci Bungong giri ingat keudroe Meung goh habeh langkah raseuki Han Tuhan bri ajai sampoe Beuthat jipoh deungon batee Bah jiseubee dalam bumoe Han cit mate Tuhan neubri Meung goh janji ajai sampoe

Bungong meulu bee meudrù-dru Putroe ijo lam meuligoe Ban teukeujot bungong keundo Tahe gante po samlakoe Ucap syuko Alhamdulillah Pujoe Allah po teu sidroe ngon ie mata ile limpah Banta indah pike keudroe Teuringat fie syeedara Jipupana po samlakoe Lom teuringat putroe muda dalam bahtra bandua droe Tatkala nyan po jroh rupa Sret ie mata ngon meulangoe Teungoh bae banta muda Deuh suara mangat han soe Wahe aneuk Tajul Muluk Bek le daok hai samlakoe Peue nyang wasiet bak Hamilah Hai meutuah nyan tapakoe

Banta deungo haba meunan Neungieng yoh nyan keudeh keunoe Hana sapat leumah ureueng Tan haba nyan beurangkasoe Tatkala nyan Tajul Muluk Ka teuseupok po samlakoe Banta ingat wasiet bunda Yoh masa neukeumeung jak woe

Ureueng hana leumah nyata Cit suara neungo bunyoe Ka teuringat putik langsat Malaikat nyang troh keunoe

Nibak ulon geubri ingat Ban amanah yoh saboh roe Bak masa nyan bungong tajok Neumat le ok nibak jaroe Neupoh le pha ka neuantok Hamilah troh jithee keudroe Ka jitupeue le Hamilah Banta indah pangge kamoe Jideumpek le su meutaga Troh le teuka jen sinaroe Nyang bangsa jen pari diwa Ngon siat ka keunan sampoe Oh troh keunan bak Hamilah Ka jipeugah hai samlakoe Ka jipeugah dum peue lahe Jibeudoh le dum sinaroe Jiteureubang dalam awan Ngon siat nyan ka troh sampoe Jeueb-jeueb uteuen troh jiteuka Jak pareksa po samlakoe Saboh saho jiteureubang Jijak pandang banta nyang woe Teuma leumah jieu rupa Kayee raya that seureuloe Laju keunan jipo teuka Leumah nyata po samlakoe Banta pandang ateueh bunda Sret ie mata dum meutaloe Keumeung beudoh po mulia Han kuasa po samlakoe Oh neubeudoh lom ka reubah Diwa Hamilah pi ka jimoe

Wahe aneuk nyang meutuah Bek ta langkah gata keunoe Hamilah peurab laju keunan Bungong keumang pakon meunoe Wahe aneuk banta seudang Peugah rijang soe pupaloe Ho ka judo hai aneukda Peugah bak ma hai samlakoe Peugah laju bijeh mata Lon tueng bila bak uroe nyoe Tapeugah hai bungong peukan Jen ngon insan atawa soe Lon eu tuboh ka binasa Habeh luka gaki jaroe Peugah aneuk laju rijang Bah lon muprang bak uroe nyoe Han kukeubah mate geujang Han kuriwang le u nanggroe Meung goh kutueng bila intan Deumi Tuhan han le kuwoe Meunan jikheun diwa Hamilah Sira peugah sira jimoe Tajul Muluk seuot pantah Ma meutuah deungo kamoe Sinyak putroe bungong rambot Ka ret laot ulon yue woe Dilon bunda nyoe ho ka ret Ngon grak makbud po alam nyoe Bek hai bunda hate gundah Ubak Allah neujok kamoe Meung na umu ma meutuah Tuhan balah uroe dudoe

Hana guna ulon peugah Jeuet keu salah hai ma putroe Tajul Muluk meunan peugah Hamilah ka muphom keudroe Nyang jeuet bunda lon yue langkah Kon beunalah ulon muproe Hana hajat ulon meunan Meulaenkan ulon neupuwoe Ubak nanggroe Syarikatan Hai ma badan napsu kamoe Akan teutapi wahe bunda Bek lam kuta lon neupuwoe Neukeubah lon dalam uteuen Bak tan mideuen raja nanggroe Neupeugot keu lon saboh taman Beusaban ngon meuligoe putroe Bek na sapeue keukurangan Hai ma badan hajat kamoe Tajul Muluk meunan peugah Diwa Hamilah jaweueb meunoe Meunyan aneuk bek tagundah Potallah nyang peusampe Diwa Hamilah jimeukeumah Peurab bagah bak samlakoe Cok peunawa dalam keudah Jiboh pantah nibak asoe Oh ban keunong nibak badan Puleh rijang po samlakoe Lheueh nibak nyan jiteureubang Banta seudang jiba jinoe Oh ban leumah Syarikatan Tron lam uteuen jipiyoh droe

Hana jarak mideuen raja Kira-kira jak siuroe Keunan geutron laju sigra Dalam rimba bineh sungoe Teumpatpi jroh hana tara Banta muda marit meunoe Sinoe bunda peugot teumpat Sabab rab that bineh sungoe Hamilah deungo haba meunan Teukui yoh nyang ngieng u bumoe Teukui uyub ngieng u manyang Putroe intan reutek jaroe Dalam hate meugeulumbang Jipandang bak taman putroe Oh ban teupet mata dua Teudong kuta ngon meuligoe Cukop asoe kuta sakti Lom sipai han peue kheun proe Mat di jaroe dum sinapang Ikat sajan ngon geureupoe Ngon meuligoe sangat indah Meutatah ngon batee pudoe Dileuen meuligoe saboh taman Soe kalon nyan mata laloe Cukop leungkap buet Hamilah Sangat indah hana bagoe Miseue taman Meungkawali Hana sakri that seureuloe Nyankeuh nanggroe Diwa Sakti Hana peue le lon hareutoe Lheueh marit banta seudang Neukheun yoh nyan bak ma putroe

Wahe bunda gaseh sayang

Putroe intan jak tueng keunoe

lagi ka treb dalam bahtra

Sabab hamba ka mupaloe

Teuma seuot Diwa Hamilah Insya Allah hai samlakoe Jimeuhei le Pari Diwa Troh le sigra keunan sampoe

Jipeugah le meunoe haba Putroe muda jak jok keunoe Bah le sideh dalam bahtra Deungon sigra keunoe puwoe

Diwa Hamilah meunan haba Jipo lanja dum sinaroe Jeueb-jeueb laot jipareksa Jieu pat na kapai beusoe

Oh ban leumah jieu rupa Pari Diwa keunan pantah Dalam kapai jitron sigra Meuteumeung ka po sambinoe

Jiangkat le jaroe dua Ampon hamba hai po cut droe Mahmuda ngieng Pari Diwa Tanyong lanja haba meunoe

Hai man pari peue teuh haba Lon eu gata ka troh keunoe Kamoe meujak suroh raja Dalam rimba neupioh droe

Neuyue jak tueng putroe muda Ngon sigra beutroh lon puwoe Habeh haba siman pari Cut putroe ti jicok jinoe

Jibapo lam awan ijo Putroe tahe bandua droe Ateueh kuta troh jilalu Bungong keundo peutron jinoe Diwa Hamilah kalon rupa Hai aneukda ka troh tawoe Peurab laju putroe muda Seumbah bunda gaki jaroe

Diwa Hamilah hate suka Geucom geuwa bandua droe Hai meutuah cahya mata Beuseumpureuna sampoe dudoe

Meung na hajat bungong jeumpa Troh lon teuka laen uroe Wahe aneuk jeh pat judo Bungong keundo lon kujak woe

Meung na nafsu hai aneuk.. .e Troh lon laloe keunoe sampoe Lheueh nibaknyan Diwa Hamilah

Jipo pantah laju jiwoe

Tinggai sinan putroe indah Ngon khalifah nyang samlakoe Uroe malam meuseusuka Deungon raja tangglong nanggroe

Hana sapeue keukurangan Lam seunangan malam uroe Tajul Muluk ngon putroe dua Lon pumada dilee oh noe

Ulon peugah laen punca Putroe muda nyang sambinoe Treb ka hana lon meuteuoh Masa gadoh bungong putroe

Jinoe baro ulon satoh Cut putroe jroh baek budoe AMMA BAKDU treb ka lambat Deungo sahbat lon hareutoe Meungkawali aneuk deelat Teungoh mangat lam meuligoe Hana sapeue pi na tuban Mantong pangsan sinan sidroe Tajul Muluk cok peukayan Bungong sajan ka neupuwoe Tan jitupeue po juhari Teungeut sabe malam uroe Oh leupah woe banta ahli Jaga cut ti di meuligoe Jibeudoh le bungong keumang Tren bak taman jijak manoe Oh troh keunan putroe intan Bineh kulam jipiyoh droe Preh jibeudoh Meungkawali Keunan sabe mata putroe Hireuen tahe cut putroe ti Meungkawali hana sampoe Meungkawali bungong indah Hana leumah bak uroe nyoe Adat dilee cit troh bagah Oh meulangkah ulon keunoe Teuma leumah jieu nyata Tangke bunga sinyak sinoe Tatkala nyan po jroh rupa Hate rukha dum geutampoe Putroe jimoe ro ie mata Jiwoe lania u meuligoe

Jiek laju u astana Jak cok ija po sambinoe Oh ban jieu bungong jeumpa Tan le ija neupuwoe putroe Lheueh nibak nyan lom ka jingieng Han le euncien nibak jaroe Bak masa nyan bungong pade That teupike hana bagoe Hana sapeue jimarit le Dalam hate meusoegeumoe Pane ureueng keunoe teuka Jeuet jibuka pinto kuta Han tom lon eu meunoe rupa Jijak hila euncien bak jaroe Lom ngon ija pi han le na Beuhe raya pancuri nyan Meuploh ribee ureueng jaga Pakri daya jijak keunoe Bungong indah ka jibawa Ya Rabbana pakri kamoe Teuma leumah dalam hate Kon pancuri buet nyang meunoe Nyoe keuh ureueng pangkat tinggi Aneuk duli saboh nanggroe Lagi gagah that beurani Le that sakti bak ri bagoe Meung kon ureueng leubeh tuah Han ek langkah teumpat kamoe Bah le jinoe lon jak mita Ulon bungka jeuoh nanggroe Meunan leumah dalam hate Tan jilahe bak beurangsoe

Meunyo lon iem meunoe sabe Di akhe meuteumeung rugoe Get bah jinoe lon peureugi Lon cari sigala nanggroe Han lon peugah ubak abi Ngon bak umi ma lon pakri Meung lon peugah keumeung bungka Hajat hamba han ek sampoe Meunan pike putroe muda Beudoh sigra peukeumah droe Oh lheueh cukop ngon peukayan Beudoh rijang bungong uroe Jipo laju ret lam awan Putroe intan nyang sambinoe Karonya po sidroe Tuhan Troh yoh nyan bak saboh nanggroe Jieu banda jroh hana ban Rame sinan malam uroe Jitron keunan meungkawali Peujeuet droe laen bagoe Siulah sang ureueng haji Sang-sang faki tungkat di jaroe Rupa indah hana lawan Dalam peukan jijak sidroe Soe nyang kalon pirak hupham Rupa agam kon le putroe Sinan teutap putroe intan Dalam peukan jibloe publoe Dalam nanggroe Syarikatan Sinan intan jipiyoh droe Bit pi teuduek po jroh rupa Dalam dada laen bagoe

Uroe malam hate luka Rasia hana meubunyoe Allah hai po ya Rabbana

Pat lon mita po samlakoe

Pakri ilah ngon bicara Beuek nyata nibak kamoe Meunyo han ek sinoe nyata Bah lon bungka laen nanggroe

Ya Ilahi wa ya Rabbi Keu lon neubri hajat sampoe Bu meuteumeung nyang lon cari Beureukat abi ngon ma putroe

Lheueh meulakee putroe muda

Bak muka jirahob jaroe Teukeudi Allah po yang esa Troh le teuka ureueng sidroe

Jipeurab le keunan pantah Poh beurakah meudeh meunoe Hingga troh bak saboh haba Calitra bak raja nanggroe

Phon awai kon hingga akhe Habeh sare jihareutoe Meungkawali deungo meunan

Tanyong yoh nyan sigra meunoe

Peugah bak lon hai syeedara Peue nan raja lam nanggroe nyoe Nanggroe nyoe peue nan geurasi Aneuk duli na padum droe

Peugah bak lon hai syeedara Peue keurija rame han soe Bak lon kalon keulakuan Sang peurasan malam uroe

Saboh sagoe sang khanduri Ulee ili ureueng jak woe Peue keureuna nyang jeuet meunan Peugah tuan ubak kamoe Teuma seuot le ureueng nyan Deungo kaman lon hareutoe Zainul Muluk nan sulotan Syarikatan nama nanggroe Peuet droe aneuk saboh bunda Bandum sama ureueng lakoe Nyang sidtoe treuk hai syeedaga Saboh bunda gob nyan sidroe Hana sinan sajan raja Treb ka lama cre di nanggroe Tajul Muluk geuhei nama Yoh masa na gob nyan sidroe Jinoe raja meungkhanduri Nyang jeuet rame malam uroe Saboh bagoe mupeurasan Arak intan nyang baro woe Sabab dilee hai syeedara Seupot mata raja nanggroe Neumoe sabe po teuraja Sabab mata ka meupaloe Padumna treb lama masa Troh peundita u meuligoe Nujum peugah meunoe haba Puleh sigra raja nanggroe Meunyo ek na Meungkawali Ayeuem cut ti di meuligoe Cit puleh le mata duli Meunan syaikhi neuhareutoe

Akan teutapi meuseuke that Jeuoh teumpat hana bagoe Ureueng kawai pi rame that Payah dapat keunan sampoe Ban neudeungo meunan haba Ubak banta neukheun meunoe Tajak mita bungong indah Ta meulangkah jeuoh nanggroe Padum lawet banta bungka Nyoe keuh masa baro geuwoe Geupeuwoe ngon bungong indah Ubat ayah po samlakoe Oh na bungong Meungkawali Mata duli puleh jinoe Oh ban geuboh nyan peunawa Nibak mata raja nanggroe Nyankeuh sabab ka khanduri Uleh duli raja kamoe Syuko nekmat nibak Rabbi Mangat hate hana bagoe Nyankeuh sabab hai syeedara Rame banda malam uroe Meungkawali deungo meunan Tanyong yoh nyan teuma meunoe Peugah bak lon syeedara jroh Saleh nyang toh banta peuet droe Nak lon turi hai syeedara Singoh lusa ka lon tusoe Teungoh marit Meungkawali Keunan troh le banta peuet droe Geuduek ateueh guda puteh Baplueng keudeh baplueng keunoe

Jipeugah le teuma sigra Nyankeuh banta nyang baro woe Meungkawali kalon rupa Dalam dada meusoe gumoe Beuthat gob nyan aneuk raja Han kuasa cok bungong nyoe Kon nyan rupa cok bungong lon Bineh keubon tan jipeutoe Bineh nanggroe han troh jijak Meunyan curak hana bagoe Meunan leumah dalam dihen Na soe laen cok bungong nyoe Bah le lon jak ubak raja Jak peuhamba tuboh kamoe Meunan pike putroe muda Habeh haba seupot uroe Ureueng bunoe woe u teumpat Bungong riwat tinggai sidroe Leuek jikutru cong keutapang Siwah datang kheundak pupaloe Teubiet uroe cahya bandrang Putroe bintang beudoh jinoe Tamong laju dalam kuta Ubak raja ka jipeutoe Sujud laju po mulia Ampon hamba tuanku droe Zainul Muluk kalon rupa Ureueng teuka jroh han bagoe Neutanyong le pantah sigra Pane gata pat bu nanggroe Ho keumeung jak peue tamita Peue na haba tajak keunoe

Meungkawali jaweueb sigra Ampon hamba tuanku droe Lon nyoe titek bagoe ie mbon Angen peutron dalam nanggroe Nama ulon Peurakoeson Ka na sithon ulon keunoe Gampong ulon dalam duson Treb ka ulon cre di nanggroe Ulon sidroe mita raseuki Soe na tem bri bu siseun troe Suntok masa meunan sabe Wahe duli payong nanggroe Nyoepi keunoe lon peureugi Ubak duli lon peujok droe Meungna gaseh po meukuta Bri keu hamba bu siseun troe Neubri ngon buet peue-eue nyang na Lon keurija tuanku droe Raja deungo teuka sayang Keu cut intan nyang sambinoe Teuma raja neukheun macam Hai bangsawan deungo kamoe Bek le tajak bungong husen Puteh licen teudong sinoe Gubeue guda gata lon bri Geunap hari nyan tapakoe Teuma seuot putroe indah Ban nyang titah tuanku droe Teutap sinan po jroh rupa Gubeue guda geunap uroe Bungong rom ngon bungong rihan Bungong peukan neungui putroe

Teuduek dilee bungong peukan Lon peuriwang keu samlakoe Bukan sayang cicem batok

Keutok-tok nyang teungeut uroe

Teutap dilee bungong tajok Laen pakhok teuma jinoe Ulon kisah Tajul Muluk Sideh daok lam meuligoe

Bak siuroe teukeudi Tuhan Troh le keunan ureueng sidroe Ureueng nanggroe syarikatan Sisat jalan hana muho

Oh sare troh keunan teuka Jieu kuta that seureuloe Rupa indah hana lawan Pucak intan indah han soe

Meuploh ribee ureueng jaga Pawang rusa sinan laloe Tahe mandang sang geupula Ureueng jaga laju peutoe

Jidrob laju pawang rusa Ubak raja jiba sampoe Oh troh keudeh jijak lanja Peugah haba bak samlakoe

Tajul Muluk tanyong bagah Ho bu langkah pane nanggroe

Pawang rusa laju peugah

Ampon meuah tuanku droe

Nanggroe di lon syarikatan

Sisat jalan troh lon keunoe

Meukeusud woe rumoh tangga

Ka roh hamba bak teumpat nyoe

Meunyo meunan pawang rusa Bah le gata tadong sinoe Peue nyang hajat ulon peuna Bek tagisa le u nanggroe Lon bri rumoh gampong ngon blang Dum sibarang ateueh kamoe Jinoe tawoe dilee u gampong Tajak tueng aneuk ngon binoe Karong wali wareh kaom Taba bandum bak teumpat nyoe Banta cok meuh na sibaha Nyoe keuh nyang na beukai tawoe Mangat hate pawang rusa Geuwoe lanja troh u nanggroe Oh troh geuwoe peugah haba Bak syeedara dua lhee droe Miseue nyang ka jieu rupa Jipeuhaba dum sinaroe Ban jideungo dum calitra Jijak lanja rab soh gampong Aneuk peurumoh jiba sajan Jijak keunan han le jiwoe Oh troh keunan dum sineuna Hate suka hana bagoe Aneuk peurumoh habeh jiba Deungon doa po samlakoe 'Jroe malam hana teudoh Keunan dum troh rame han soe Syarikatan nanggroe luah Rab na siblah han le asoe Padum lawet teuma meugah Ubak ayah po samlakoe

Meuthee ubak Zainul Muluk Ureueng nyang troh jak peugah proe Habeh jijak dalam rimba Ubak raja baek budoe Wase laot wase darat Jijak intat hana padoe Raja deungo haba meunan Neuhei yoh nyan peurdana meuntroe Neupeugah le meunoe haba Hai peurdana lon deungo proe Ureueng nanggroe syarikatan Sikalian ka jiboh droe Saboh nanggroe dalam rimba Indah rupa hana bagoe Nanggroe baro mupeurmata Sidroe raja that seureuloe Ureueng nanggroe keunan teuka Han jikira le keu kamoe Meunan lon ngo saboh haba Saleh beuna tan lon pakoe Meunan sabda nibak raja Lem peurdana seuot meunoe Meuah ampon po meukuta Bah lon cuba kalon jinoe Lon jak eu ngon mata dua Bek peucaya barangkasoe Meunan narit bak peurdana Po teuraja ka neuiem droe Lheuh nyan teuma geubeurjalan Ngon angkatan dum sinaroe Oh troh keudeh dalam rimba Geungieng rupa jroh han bagoe

Laju geujak pantah sigra Dalam kuta ka geupeutoe Oh troh keunan ubak kuta Hireuen raya teukab jaroe Hana sapeue le na haba Keudeh mata bak meuligoe Teuma meugah ubak raja Ureueng teuka rame han soe Lom seureuta bala tandra Ngon sinjata nibak asoe Raja deungo meunan haba Bak peurdana neupeugah proe Cuba tajak troh u lua Jamee teuka tatanyong soe Peurdana jak laju sigra Jieu tandra rame han soe Keunan meuntroe jipeureugi Jitanyong le pane nanggroe Ureueng teuka peugah rijang Syarikatan teumpat kamoe Meujak keunoe bak jonjongan Hajat laman jak com jaroe Meung na izin bak sulotan Kamoe tuan tamong jinoe Teuma jaweueb le peurdana. Teungku dumna piyoh sinoe Lon jak peugah bak meukuta Rijang gisa ulon keunoe Peurdana jak laju bagah Geujak peugah jamee bunoe Banta deungo meunan ulah Jak tueng pantah u meuligoe

Peurdana riwang le pantah jak peugah haba samlakoe Wahe teungku nyang meutuah Udeh langkah u meuligoe Ban geudeungo meunan haba Tamong sigra dum sinaroe hingga troh le bandum keunan Geucom tangan raja nanggroe Jamee teuka geubri horeumat Seumbah deelat nyang samlakoe Lheueh meuteumeung deungon deelat Geubri teumpat bak peurdana Miyub manyang kureueng leubeh Tan peue daleh buet samlakoe Na sikeujab duek mupiyoh Hidang ka troh keunan sampoe Tajul Muluk marit yoh nyan Makeuen tuan nibak kamoe Bek neumalee dalem payong Keureuna ulon jeuoh nanggroe Teuma makeuen sikalian Han peue panyang lon hareutoe Oh lheueh makeuen pinah hidang Banta yoh nyan tanyong meunoe Hai peurdana nyang seutia Saboh haba lon hareutoe Lon nyoe miseue ureueng jamee Brat han sabe tuboh asoe Nyum manyak kon asoe krot-kruet Tan mubacut mangat asoe Ureueng nyoe saleh ka seumpurna Di lon pi ka lon eu jinoe

Mangat hate hana nyang sa Keuraja nyang tanglong nanggroe Lon meulangkah han kuasa Sabab hamba hina tuloe Uroe malam lon meucinta Deungon raja mumat jaroe Adat mate ajai teuka Putoh asa ulon sidroe Han lon teumeung po meukuta Nyang lon cinta geunap uroe Keupeue nanggroe mupeurmata Keupeue kuta ngon meuligoe Keupeue jeuet na intan mutia Po teuraja han troh keunoe Lon keumeung jok sianika Lon meungbungka jeuoh nanggroe Sia payah lon cak rimba Lon usaha peuget nanggroe Jinoe nyang get hai peurdana Tajak gisa dilee tawoe Saleuem seumbah lon keu raja Beutroh teuka siat keunoe Jaweueb meuntroe laju sigra Ampon hamba tuanku droe Bek le susah dalam dada Po teuraja lon ba keunoe Cok peukayan sianika Po jroh rupa salen meuntroe Neubri ngon meuh ban sikada Lem peurdana laju geuwoe Deungon rakyat dum sineuna Laju gisa woe u nanggroe

Oh troh keudeh ubak raja Peugah sigra dum sinaroe Deelat ampon po meukuta Deungo hamba peugah jinoe Sangat beuna ban nyang kata Dalam rimba jroh meuligoe Nanggroe indah mupeurmata Hana nyang sa tuanku droe Lam nanggroe nyan saboh kuta Sidroe raja that seureuloe Ngon sipai kawai kuta Meuploh laksa ribee katoe Lon tamong troh dalam kuta Lon eu rupa that samlakoe Geubri teumpat po mulia Lneueh teuma geukheun meunoe Hai peurdana tajak gisa Po teuraja beutroh keunoe Lon meungpulang dum anika Lon meungbungka jeuoh nanggroe Meunan geukheun ubak hamba Lon woe lanja teuma keunoe Jinoe tuanku nyang meurasa Jak cok jeumba intan pudoe Bek tuanku hate lupot Bek teumakot keu samlakoe Saleh hate bungong keumang Kon lon canang nyang haba nyoe Ban raja ngo haba meunan Neukheun yoh nyan ubak meuntroe Jinoe peuget saboh surat Tayue intat keu samlakoe

Taboh haba dalam surat Lon beurangkat keudeh jinoe Meung na izin po hadarat Geujak intat laju jinoe Oh troh keudeh ubak banta Sambot sigra dua jaroe Teuma neuploh le neubaca Muphom haba dum sinaroe Habeh maklum haba surat Hate mangat po samlakoe Sabab ka troh ban nyang hajat Raja deelat neujak keunoe Lheueh nibak nyan banta muda Pari Diwa neuhei jinoe Oh troh keunan peugah rijang Peuget jalan ateueh pudoe Di sinoe kon tamulaan Syarikatan beutroh sampoe Tajul Muluk meunan kata Ubak Diwa dum sinaroe Bak masa nyan Pari Diwa Peuget sigra jalan pudoe Jipeuteupat nanggroe raja Ngon siat ka hase sampoe Jeumbatan meuh peuget sigra Hu meucahya langet bumoe Troh bak kuta Zainul Muluk Keunan pucok jalan pudoe Subhanallah hireuen tahe Rakyat nyang le mabok keudroe Han tom taeu meunan rupa Sang syuruga uroe dudoe

Cukop hase dumpeue leungkap

Deungon siat ka seuleusoe Tatkala nyan raja deelat

Neubeurangkat deungon meuntroe

Uleebalang ireng deelat Lom ngon rakyat dum sinaroe Po teuraja neubeurjalan Ateueh jeumbatan intan pudoe

Deungon rakyat sikalian Hireuen mandang mata laloe Jeueb-jeueb teumpat peurheuntian Jeb minoman peue galak droe

Cukop leungkap dum sibarang Buet bangsawan nyang samlakoe Zainul Muluk hireuen mandang

Han tom meunan neungieng bagoe

Raja-raja uleebalang Hireuen mandang mabok keudroe Ajab keudroe dum teurceungang Rasa mumang hireuen laloe

Oh troh keunan po teuraja Banta muda eumpeueng jinoe Teubiet laju po jroh rupa Ngon lasyeuka dum sinaroe

Oh sare troh po juhari Seumbah duli gaki jaroe Zainul Muluk tahe hireuen Neueu buleuen sang meuk uroe

Tajul Muluk yoh nyan neukheun Deelat ampon payong nanggroe Deelat ampon po meukuta Tamong lanja u meuligoe

Lon gade langkah sroe pada U astana tapiyoh droe Zainul Muluk seuot pantah Insya Allah bungong uroe Tatkala nyan duli khalifah Tamong pantah u meuligoe Neupeuek le u astana Nibak tahta nyang meusujoe Duek bak teumpat maseng kada Nyang di raja intan pudoe Peurmadani meuh peurmata Intan mutia indah han soe Nyan keuh teumpat po teuraja Laen teuma ban kada droe Maseng-maseng neubri teumpat Mulia that hana bagoe Na sikeujab piyoh sinan Troh hidangan keunan sampoe Geupeuduek le ukeue deelat Nyang indah that hana bagoe Di ateueh nyan geuboh seuhab Bintang kasab meuh sinaroe Laen bandum pi hidangan Miyub manyang ban kada droe Cukop hase keunan datang Banta seudang angkat jaroe Deelat ampon po meukuta Sikada hase bak kamoe Makeuen deelat peue mudahna Kamoe rimba tuanku droe Tabeue masen leukiet caye Bek weueh hate tanglong nanggroe

Cok boh kuyuen taboh kulet Peunyaket jiduek bak asoe Tuanku peusinget geupet Makeuen siblet nibak kamoe Teuma seuot raja deelat Kru seumangat bungong geutoe Nibak ulon mulia that Goh lom lon mat rasa ka troe Meunan narit bak sulotan Makeuen yoh nyan dum sinaroe Oh lheueh makeuen pinah hidang Putroe intan peukeumah droe Janu Hati ngon Mahmuda Bandua ka peuhase droe Cukop hase sianika Laen teuma banta peuet droe Tajul Muluk sajan raja Bandua bak bantai pudoe Sinan neuduek sapat dua Laen teuma banta peuet droe Meuntroe wazi ngon peurdana Rab ngon raja dum sinaroe Janu hati ngon Mahmuda Rab ngon raja dum sinaroe Putroe teudong nibak pinto Leumah neueu banta peuet droe Janu Hati bungong keundo Sang ka hanco tuleueng asoe Dum nan saket dalam dada Sabab banta yoh saboh roe Jipoh mate jienanya Dalam rimba ka jiengkhoe

Deungon tulong Hamilah Siti Tuhan neubri udep dudoe Adat kon na sidroe umi Meuhat mate banta seudang Meunan leumah dalam hate Han jitron le u seuramoe Nibak pinto sinan teudong Jingieng mantong raja nanggroe Han le jijak meung sipade Sabab hate jih that seungkoe Raja kalon jroh sang kande Neutanyong le bak samlakoe Hai samlakoe bungong meulu Soe bak pinto jeh dua droe Tajul Muluk peugah laju Nyan tuanku judo kamoe Nyankeuh judo patek laman Hai jonjongan tanglong nanggroe Po teuraja deungo meunan Neukheun yoh nyan bak sambinoe Peurab keunoe tangke bunga Lon ayahanda teuh hai putroe Zainul Muluk meunan haba Putroe muda seuot meunoe Deelat ampon syahi alam Cit ka beuklam leumah lumpoe Ban jaga lam seupot klam Rindu deundam hana bagoe Meujak com kaoh jonjongan Meung lon preh jan beungoh uroe Ban lon deungo ka troh duli Lon ka hase di meuligoe

Laju sigra lon meuhase Sabab hate lon teugoe-goe Oh troh keunoe ulon lalu Hireuen tahe hana bagoe Han tom nyang ka meunoe lon eu Phon bak intu troh ngon jinoe Han tom leubeng geuboh geutah Han tom agah geuboh taloe Han tom namiet duek ngon duli Meuseune gaki bak bantai pudoe Nyoe keuh baro lon eu rupa Hai meukuta ureueng peuet droe Ureueng lon bloe saboh masa Meukuta peuduek sajan droe Hana patot po jonjongan Euncien intan bak jih beusoe Nyan keuh sabab hai jonjongan Han jeuet keunan ulon peutoe Han lon adu batee kaca Ngon mutia intan pudoe Meunan jikheun Janu Hati Neuseuot le raja nanggroe Wahe aneuk nyang juhari Aneuk duli banta peuet droe Kon hai aneuk na miet gata Aneuk raja lam nanggroe nyoe Adat meung kon aneuk raja Pane lon ba duek sajan droe Raja seuot meusom basa Dalam dada dum geutampoe Teuka harok po teuraja Sabab banta jikheun jibloe

Hana patot putroe muda Jibuka narit nyang seungkoe Adat bak jeuet lawan ngaza Han lon gisa le u nanggroe Meunan leumah dalam Fuad .Banta nyang peuet leungo asoe Sabab putroe ka jituri Seureuta lagi po samlakoe Sabab nyan malee han sakri Aib keuji bak uroe nyoe Banta teukui jisom muka Putroe muda jikheun meunoe Peue keuh guna tasom basa Ban peuet gata ka kutusoe Ka lheueh lon bloe dilee masa Ka sah gata namiet kamoe Meunan narit Janu Hati Raja duli beungeh han soe Leungo badan jeueb-jeueb seundi Han kutukri le peuglah droe Barangkari pi han rila Sabab raja akai sampoe Neumeung beungeh hana daya Neueu tandra ka meupadoe Teuma neukheun po meukuta Putroe muda tapeugah proe Jih nyang mita ubat mata Ban peuet banta aneuk kamoe Dalam kuta Pari Diwa Jih useuha jak cok keudroe Nama bungong Meungkawali Ayeuem cut ti di meuligoe

Nyan keuh banta nyang jak cari Jalan pakri takheun tabloe Peue alamat namiet gata Peugah sigra hai aneuk droe Peugah beutrang bungong jeumpa Asai mula tahareutoe Janu Hati seuot sigra Peugah haba sang leuek ragoe Deelat ampon po meukuta Tan meutuka ban lon kheun nyoe Meung ka lon kheun namiet hamba Cit na tanda tuanku droe Ka lheueh lon boh dilee tanda Bak uram pha jih nyan peuet droe Meunyo tuanku han peurcaya yue silak pha kalon jinoe Cit na tanda ka meusurat Alamat cap nama kamoe Lon boh nama Janu Hati Kalon duli mata droe Nyoekeuh ulon jipeuekeuji Aneuk duli raja nanggroe Janu Hati meunan jikheun Bandum ureueng tahe keudroe Banta peuet droe sangat malee Takue ulee ngieng bak bumoe Po teuraja muka reudee Sabab malee deungon putroe Han sapeue le jeuet neupeugah Hate bicah dum geutampoe Neungo narit putroe indah Jikheun ka sah namiet jibloe

Teuma neukheun le peurdana Ampon hamba payong nanggroe Jinoe tuanku nyang meurasa Ban peuet banta tayue jak woe Oh ka jarak ban peuet banta Tapareksa ubak putroe Meunan geukheun le peurdana Lheueh nyan teuma ka neuyue woe Yoh nyan beudoh peuet droe banta Laju gisa u meuligoe Lheueh nyan jitron Janu Hati Jak com gaki raja nanggroe Ngon Mahmuda nyang juhari Seumbah duli gaki jaroe Oh lheueh seumbah po teuraja Duek bandua sinan rab toe Deungon ranub cit ka hase Dalam bate intan pudoe Putroe muda jok keuduli Neusambot le dua jaroe Lheueh nyan marit putroe muda Ampon hamba payong nanggroe Ranub uteuen pineung awe Han meusampe rasa jih nyoe Bek tuanku saket hate Bek neuruhe aib kamoe Cit ka maklum nibak duli Gampong lam gle jeuoh nanggroe Kru seumangat bungong pade Bak lom mise seulaseh droe Bak gata na ranub uteuen Bak lon beuleuen sapeue tan roe

Ateueh ulee lon cut meugleueng Meunan neukheun raja nanggroe Raja pajoh ranub sigapu Lheueh nyan laju neutanyong proe Wahe aneuk bungong jeumpa Lon ayahanda teuh hai putroe Rindu hate lon han tara Saboh haba lon ngo bunyoe Peugah aneuk bijeh mata Asai punca banta peuet droe Nyan keuh aneuk nyang lon cinta Bak ayahanda neupeugah proe Adat teukeudi lon troh masa Po haręuta ka keuh masa Janu Hati peugah yoh nyan Ampon laman payong nanggroe Sidroe raja masa jameun Jeueb-jeueb alam meugah han soe Lagi gagah that beurani Hana sabe jeueb-jeueb nanggroe Seureuta ade lom keuramat Bandum rakyat that jipujoe Di raja nyan wahe duli Na isteuri sidroe putroe Peuet droe aneuk bak putroe nyan Sikalian ureueng lakoe Mangat hate po jonjongan Pujoe Tuhan malam uroe Padum lawet teuma akhe Leumah pike raja nanggroe Bah le jinoe lon meukawen Putroe canden aneuk meuntroe

Lheueh nyan teuma po teuraja Bak peurdana neupeugah proe

Peurdana jak keuteulangke

Jak peugah le ubak putroe Jeuet le laju han peue pike

Meukawen le raja nanggroe Oh lheueh kawen raja deelat Sinan teutap malam uroe

Sajan putroe pirak lipat Raja deelat sinan laloe Manyoh meusyen hana tara Meuseusuka malam uroe

Hana neuwoe dalam kuta Suntok masa sinan dudoe Teukeudi po Rabbul kade Putroe hame lam meuligoe

Troh nam buleuen putroe hame Raja duli susah han soe Han tom teungeut po teuraja Ret ie mata geunap uroe

Sayang neuthat putroe siti Kadang pakri teuma dudoe Meunan leumah dalam hate Raja pangge nujum sidroe

Troh le nujum keunan teuka Ubak raja tanglong nanggroe Po teuraja beudoh laju Deungon teungku mumat jaroe

Teuma neuduek le bandua Ngon siat ka hidang sampoe Teungku nujum makeuen sigra

Deungon raja bandua droe

Meunan narit Janu Hati Jigisa le cok rampagoe Pura-pura puliek pineueng Sinyak meugleueng utoh han soe Zainul Muluk tanyong lanja Peugah sigra bungong geutoe Janu Hati lom riwayat Wahe deelat deungo jinoe Oh lheueh makeuen raja deelat Tanyong leugat takbi lumpoe Wahe aneuk bungong.jeumpa Peugah lanja ubak kamoe Han tom lon ngo dilee nyang ka Ajab raja biet haba nyoe Meunan neukheun uleh raja Putroe muda lom hareutoe Deelat ampon po meukuta Lheueh nyan raja peugah lumpoe Wahe teungku guree hamba Leumah rasia malam baroe Han lon tupeue takbi makna Hai syekhuna peugah jinoe Uroe Jum'at oh rab paja Sang-sang geumpa leungo nanggroe Teuka reudok ngon seupot klam Tujoh malam tujoh uroe Ujeuen leubat ngon geulanteue Kilat suseue dalam nanggroe Kuyut hate lon hana tara Deungon ija ulon tob droe Teutap ulon dalam rukha Lheueh nyan jaga ulon sidroe

Oh ban jaga lon hai syaikhi Susah hate hana bagoe Saleh peue-peue keu lon neubri Uleh Rabbi po geutanyoe Teungku kalon jinoe siat Peue bu nekmat ateueh kamoe Teungoh marit raja deelat Neumoe sangat raja nanggroe Teuma nujum buka kitab Neukalon bab takbi lumpoe Leumah neueu dalam kitab Aneuk deelat lahe jinoe Meutuah that po jroh rupa Jeuet keu raja jeueb-jeueb nanggroe Diyub langet ateueh donya Nyan keuh raja teuma dudoe Raja laen taklok keunan Bak budiman nyang samlakoe Salah bacut po meukuta Seupot mata teuma dudoe Oh neupandang bak aneukda Po teuraja roh meupaloe Meunan tuanku leumah nyata Nyan keuh makna takbi lumpoe Ban raja ngo meunan haba Sret ie mata ban neumanoe Tatkala nyan po teuraja Neukheun sigra haba meunoe Kon meutuah aneuk hamba That cilaka jih nyan sidroe Meunan neukheun po teuraja Ubak nisa han le neuwoe

Teutap putroe lam nazaa Sret ie mata geunap uroe Peuek peusan bak peurdana Beutroh raja neuwoe keunoe Han cit neuwoe po teuraja Hingga nyata po samlakoe Oh ban lahe po jroh rupa Teuma sabda raja nanggroe Hai peurdana nyang seutia Dalam rimba jak boh jinoe Bek le tinggai di astana Tajak lanja wahe meuntroe Oh lheueh titah nibak raja Peurdana beudoh le jinoe Kaba laju po jroh rupa Deungon bunda bandua droe Teutap sinan dalam rimba Ngon aneukda sabe neumoe Wazi meuntroe ngon bentara Habeh gisa bandum geuwoe Lawet lawan akhe masa Po jroh rupa rayek keudroe Sinan teutap dalam rimba Neupeulara malam uroe Teuma beudoh po teuraja Jak meurusa bak siuroe Jak meuramien paroh rusa Deungon tandra dum sinaroe Uleebalang ngon bentara Ireng raja rame han soe Padumna treb dalam rimba Saboh rusa han meubunyoe

Daok raja mita rusa

Meureumpok ka ngon aneuk droe Oh ban neungieng bak aneukda

Seupot mata raja nanggroe

Meunan narit putroe muda Po teuraja hireuen laloe Janu Hati cok ceurana Pura-pura mat bak jaroe

Pajoh ranub po jroh rupa Po teuraja ingat keudroe Sang-sang manyoh dalam hate Neupeurab le keunan rab toe

Peugah laju bungong pade Lheueh nyan pike cut sambinoe Janu Hati seuot bagah Insya Allah tuanku droe

Yoh nyan putroe laju peugah Miseue indah hana bagoe Lheueh nibak nyan po meukuta Banta muda jiboh taloe

Ka jiikat jaroe gaki Lam arong gle jitiek dudoe

Ateueh gunong phon jigule

Lheueh jirante gaki jaroe

Tinggai sinan po jroh rupa Jicok raja ka jipuwoe Teutap buta raja deelat Mita ubat jeueb-jeueb nanggroe

Nibak puleh lom maken that Raja deelat susah han soe Teuma neukheun le peundita Ubat hana dalam nanggroe

Akan teutapi po jonjongan Lam nanggroe nyan ubat jinoe Meung kon bungong Meungkawali Han puleh le raja nanggroe Barangkasoe han ek daya Ureueng jaga meuploh katoe Bak masa nyan hai meukuta Beudoh bungka aneuk peuet droe Geupeuteubiet dalam rimba Geujak lanja malam uroe Mita ubat keu ayahanda Laju bungka dum sinaroe Aneuk geupoh saboh masa Mate hana tuanku droe Beudoh laju bungong keumang Dilikot nyan jijak sidroe Jijak laju lam kawan nyan Bandum rakan han jitusoe Padum lawet geujak sabe Hingga troh le saboh nanggroe Bak nanggroe nyan le peurasan Peurmainan tuan putroe Banta peuet droe lalu keunan Bak peurasan malam uroe Meuen cato peutarohan Mabok sinan banta peuet droe Hingga talo bandum gob nyan Habeh peukayan dum geupubloe Habeh peukayan publoe tuboh Bak pha geuboh cap le putroe Oh lheueh geuboh cap nibak pha Lam peunjara geuyue pasoe

Beudoh aneuk nyang ceulaka Tuntut bila aduen peuet droe Putroe talo deungon muda Buet cut indah nyang samlakoe

Hingga talo putroe muda Peuet droe banta puleh jinoe Teuma beudoh po jroh rupa Neujak sigra laen nanggroe

Neujak mita ubat ayah Bungong indah ayeuem putroe Deungon sangat susah payah Jak seulaah ubat bunoe

Geucok nyawong ubak Tuhan Payah badan han peue kheun proe Meungkawali dalam taman Banta keunan neujak sampoe

Pihak yakin keu ayahanda Sambe nyawa po samlkoe Mangat meusampe aneuk geuboh Bek gob teuoh jeueb-jeueb nanggroe

Deungon limpah rahmat Rabbi Meungkawali troh lam jaroe Oh meuteumeung Meungkawali Neukeumbali laju neuwoe

Oh troh ubak putroe muda

Neucok banta le ban peuet droe

Neuwoe laju bungong kuyuen

Deungon aduen ban limong droe

Oh troh nibak teungoh uteuen Peuet droe aduen jipoh adoe Jitiek sinan dalam gunong Jicok bungong le jipuwoe

Hingga puleh mata raja

Ngon bahgia banta peuet droe Meunan jikheun rakyat dumna

Get bak raja tanglong nanggroe

Tan geutupat asai punca Nyang buet banta meunan bagoe Oh nan kisah putroe muda Yoh nyan raja neupoh-poh droe

Dumnan mangat dalam dada Neungo haba nibak putroe Janu Hati putroe muda Pura-pura ngieng u bumoe

Paleng uneun cok ceureupa Neusom basa bungong geutoe Wazi meuntroe ngon peurdana Dum sineuna teukap jaroe

Jingo haba putroe muda Tan geusangka meunan bagoe Raja tanyong teuma sigra Jinoe ho ka po samlakoe

Bit ka mate dalam uteuen Saleh mantong udep jinoe Peugah laju hai cut buleuen Lon that hireuen hana bagoe

Teuma seuot Janu Hati Ampon duli payong nanggroe Dudoe teuma wahe duli Diwa Pari teuka siuroe

Nama geukheun Diwa Hamilah Meusyeuhurah sigala nanggroe Geucok banta nyang meutuah Sampoh darah nibak asoe

Geuboh ubat nibak badan Puleh pangsan po samlakoe Oh ban puleh nibak pangsan Geucok yoh nyan bapo jinoe Geupeutron bak saboh data Dalam rimba peuget nanggroe Nanggroe indah mupeurmata Nyankeuh raja tuanku droe

Raja deungo meunan haba Laju geuwa po samlakoe Wahe aneuk bijeh mata Lon ayahanda bungong uroe

Seureuta ngon geucom geuwa Ngon ie mata sret meuta'se Han lon turi tangke nyawa Lon ka tuha buta tuloe

Raya salah lon aneukda Lon boh gata yoh saboh roe Luput hate silab mata Sycetan daya ulon sidroe

Tapeumeuah bungong suson Nyang salah lon bak samlakoe Tajul Muluk pi ka neumoe Neukheun meunoe bak ayah droe

Meuah ampon nibak Allah Hana salah nibak lon nyoe Lheueh nyan teuma banta indah Seumbah ayah gaki jaroe

Wazi meuntroe ngon peurdana Dum sineuna beudoh jinoe Mumat jaroe deungon banta Galak suka dum sinaroe

Po teuraja mangat hate Aneuk han le ka troh jiwoe Meutuah that bungong pade Mangat hate lon han bagoe Teutap raja hate dasyah Nyoe lon peugah po samlakoe Tajul Muluk jak tueng bunda Nyang lam rimba yoh saboh roe Oh troh keudeh ubak bunda Seumbah sigra gaki jaroe Putroe sambot ngon ie mata Neucom neuwa po samlakoe Wahe aneuk cahya mata Oh noe masa baro tawoe Dilee tajak sikleb mata Jak eu rusa pakri bagoe Tapeungeut lon hai bentara Tabungka ho laen nanggroe Oh lon ingat hanco rasa Han meuho ka bungong geutoe Han tom teungeut lon aneukda Suntok masa lam teugoe-goe Aneuk lutong pot boh jambee Aneuk cagee plah bak geutoe Bak lon sangka bungong keumbee Han meuteumee tanom kamoe Bukan sayang lon eu azimat Bak lon mat-mat gadoh keudroe Wahe aneuk meutuah that Grak hadarat ka troh geuwoe Bukon sayang meulu cina Angen tampa reubah keudroe

Bu meutuah bijeh mata Doa bunda keu samlakoe Teungoh bae ro ie mata Putroe dua troh le sampoe Peurab laju po jroh rupa Seumbah bunda gaki jaroe Teuma marit Tajul Muluk Bungong tajok neukheun meunoe Wahe bunda bek le daok Putroe ka troh teuka keunoe Nyan keuh judo lon hai bunda Nyang ulon ba jeuoh nanggroe Lom neumarit banta muda Jeh ayahanda hai po ma droe Putroe peurab keunan leugat Seumbah deelat raja nanggroe Buet ka leupah bek le ingat Saket mangat bek tapakoe Po teuraja sambot pantah Bu meutuah hai sambinoe Tapeumeuah jinoe leugat Lon salah that deungon putroe Salah ulon bungong keumbee Hana lon thee hai sambinoe Bek hai judo tapeumalee Syeetan tipee lon saboh roe Meunan neukheun po teuraja Seuot sigra tuan putroe Meuah bak Allah po meukuta Hana deesya nibak kamoe Bukon sayang bungong meulu Meujampu ngon bungong riwat

Teuduek oh noe saboh laku Laen buhu ulon surat Bungong rom bungong kasturi Bungong giri nyang puteh that Muwoe kisah Meungkawali Deungo akhi rakan sahbat AMMA BAKDU hai syeedara Lon calitra puteh lumat Masa jitron di rumoh tangga Jibungka han meuho bakat Padum lawet akhe masa Troh lam kuta raja deelat Dalam kuta Zainul Muluk Keunan ka troh putik langsat Uroe malam hate murka Sabab goh troh ban nyang hajat Goh meuteumeung nyang cok ija Sret ie mata ban ujeuen ret Nyan keuh sabab susah hate Tan jilahe beurangkapat Teukeudi Allah Rabbul Kade Raja duli neubeurangkat Putroe muda sajan neuba Deungon guda saboh jimat Han soe turi putroe muda Sabab rupa ka laen that Miseue agam bangon rupa Kon le dara rupa get that

Troh bak nanggroe mupeurmata Dalam kuta tamong leugat Raja neuek u meuligoe Cut sambinoe duek bak rambat

Tajul Muluk nyang samlakoe Jak com jaroe raja deelat Ban jikalon uleh putroe Indah han soe puteh lumat

Rindu hate hana bagoe Sang beujinoe laju jimat Lheueh nibak nyan hana lama Putroe dua jitron leugat

Janu Hati ngon Mahmuda Jitron sigra seumbah deelat Oh lheueh seumbah raja nanggroe Jiduek le toe bungong riwat

Ka jipeugah awai akhe Meungkawali jiriwayat Masa geucok dalam taman Le bangsawan puteh lumat

Ka jideungo sikalian Putroe intan duek bak rambat Ban jideungo meunan rawi

Meungkawali hate mangat

Baro meuho ija cut ti Euncien lagi pi ka mupat Bungong indah pi hana le Ka jicuri bungong riwat

Meunan leumah dalam hate Lom ka lahe bak jilihat Lom Mahmuda puteh licen Ka lheueh kawen deungon deelat

Diwa Hamilah nyang peukawen Sabab ngeuren rupa jroh that Meunan leumah dalam hate Meungkawali jitron leugat

Sira jitron meunoe kata Ya Rabbana Rabbul Ibad Neubri beutroh pinta hamba Bek deuh rupa soe nyang lihat

Meunan pinta putroe indah Potallah kabui leugat Meungkawali bungong kipah Rupa ubah deungon siat

Jeuet keu nuri cicem ragoe Jipo jinoe ukeue deelat Tajul Muluk nyang samlakoe Nuri ragoe deuh neulihat

Nuri jidong nibak pinto Banta laju keunan peurab Tajul Muluk hate rindu Sabab neueu rupa jroh that

Banta tajak bacut-bacut Nyang meukeusud neukeumeung mat Oh sare rab banta seudang Jiteureubang pantah leugat

Nuri jipo hana jeuoh Jipiyoh bak sagoe rambat Banta neujak keunan ka troh Nuri utoh sang ek dapat

Beudoh sinan nuri ragoe

Ubak bumoe jidong siat Ka jidong di leuen meuligoe Hana sidroe sinan rakyat

Banta keunan ka troh teuka Nuri teuma pantah lumpat

Jidong nibak cabeueng jeumpa

Nuri rimba marit mangat

Tajul Muluk nyang jroh rupa

Keunan lanja ka neukarat

Keumeung leugot cabeueng jeumpa

Nuri teuma marit leugat

Jimarit ban manusia Hai meukuta piyoh siat Deelat ampon syahi alam Patek laman raya hajat

Lon boh gampong tinggai makam Pirak hupam nyang lon sasat Ban meuteumeung tuanku droe Hate lon nyoe seunang siat

Uroe malam lon teugoe-goe Jeuoh nanggroe lon beurangkat Meunan jikheun cicem nuri Hireuen hate banta deelat

Tahe hireuen po juhari Jaroe gaki sang lam ikat Puleh tahe hireuen laloe Po samlakoe jaweueb leugat

Wahe nuri nyang that ragoe Pat bu nanggroe gampong teumpat Ho bu langkah hai ulon droe Nyang troh keunoe peue na hajat

Soe nyang suroh gata keunoe Ubak kamoe kheun beuteupat Teuma seuot cicem nuri Miseue bangsa suara mangat

Soe nyang deungo hireuen hate

Jikheun syae utoh jithat

Alhamdulillah pujoe seumata

Leupah hamba lam meularat

Beurapa susah hamba beurjalan Habeh tahon meugantoe buleuen Neuek gunong turon keu hutan Malam dan hari dalam laparan Wahe tuanku bijak beustari Hamba ini jauh seukali Tidak nyang suroh datang keumari Meulaenkan hamba manyoh kan hati Hujan leubat turon keu bumi Rakyat di nanggri naek keu gunong Dari jaoh datang keumari Buatan laki jadi teubingong Ceundana gaharu baunya harum Banyak urang ambil manpaat Rasia ini tuanku maklum Keureuna hamba ka teuringat Meunan jikheun cicem nuri Banta ahli ka teuringat Tahe hireuen gadoh pike Weueh that hate puteh lumat Teuma leumah dalam hate Get bah le lon bri nasihat Tajul Muluk meunan neukira Goh neulahe nyang muslihat Oh ban keumeung buka babah Cicem indah beuet hekeumat Jeuet le rupa miseue insan Indah han ban sang malakat Ka teudong bak cabeueng jeumpa Putroe muda rupa jroh that Soe nyang kalon reubah pangsan Cahya badan hu meukilat

Tajul Muluk sang ka gila Nyum beuneuwa laju leugat Sangat rindu dalam hate Meungkawali indah sangat Hana sapeue jeuet marit le Neungieng sabe bungong riwat Meungkawali marit meunoe Deungo kamoe wahe deelat Bukon sayang lon eu peutoe Han le asoe dum lat batat Manyoh meusyen malam uroe Lon com keudroe bungong riwat Akan teutapi hai meukuta Hana rila bak hadarat Nyang mangat bee bungong peukan Nyang mangat nan bungong riwat Neubri izin hai jonjongan Patek laman woe u teumpat Sabab ka treb cre di nanggroe Izin lon woe wahe deelat Bungong jeumpa bee meudru-dru Bungong meulu puteh lumat Lon beurjalan jinoe laju Hai tuanku do'a seulamat Meunan narit Meungkawali Jieu duli cicem siat Lheueh nibak nyan po juhari Cit gadoh le deungon siat Sikleb-siklen han meuho ka Putroe muda miseue kilat Tajul Muluk nyang jroh rupa Sret ie mata ban ujeuen brat

Neutumbok droe banta muda Sang ka gila bungong riwat Sira neumoe neukheun yoh nyan Wahe Tuhan putoh rahmat Goh lom sapeue lon peugah ban Putroe intan gadoh bakat Ya ilahi po lon Tuhan Putroe intan neubri lon lihat Adat han treb sikutika Apon mata lon hadarat Bukon sayang aneuk rusa Sret lam paya bak jilumpat Wahe putroe nyang jroh rupa Pakon gata gadoh bakat Teungoh bae po samlakoe U meuligoe neuek leugat Neucok ija ka teutob droe Neueh sidroe putik langsat Uroe malam neumoe tukha Sayang raya soe nyang lihat Sianeuk bu tan neurasa Hate luka banta deelat Putroe dua susah hate Jieu duli lam meularat Teuma marit Janu Hati Pakon duli susah neuthat Peugah bak lon tuanku droe Peuena paloe wahe deelat Bek na susah hai meukuta Meung na hamba mantong hayat Janu Hati gusuek dada Mahmuda jak peuget ubat

Tajul Muluk tan le haba Sret ie mata ban ujeuen brat Tan neulahe salah beuna Putroe dua susah jithat Meungkawali putroe muda Jiwoe lanja troh u teumpat 'Oh troh jiwoe putroe indah Hamilah jimeuhei leugat Troh le keunan Diwa Hamilah Bak cut indah sujud leugat Meungkawali marit bagah Hai Hamilah nyang khianat Hana patot buet di gata Tapeutuka ban amanat Nyan dum di lon kuusaha Keu gata lon bri deurajat Lon pubuet got jeuheut balah Hai Hamilah han taingat Hana patot meunoe bagoe Gata sidroe nyang lon harap Tapeutamong manusia Bungong hamba ka jiangkat Habeh euncien deungon ija Lom ngon hamba teuhah eerat Padum rugoe deungon malee Buet meulintee kah he laknat Pihak ka jeuet keu meulintee Patot keu kee kakhianat Kabri bungong nyang lon rindu Meung sigeutu han kaingat Jinoe patot kausaha Bek kusula kah hai laknat

Meunyo hana ek tapeuna Jinoe sigra kuboh pangkat Nyang cok bungong deungon ija Beutroh taba deungon siat

Diwa Hamilah seuot sigra Ampon hamba pirak lipat Meung udep gohlom mate Beuek hase ban nyang hajat

Bek hai putroe marah hate Seubab lon bri nyan hekeumat 'Oh ban lon eu po samlakoe Miseue uroe rupa got that

Patot judo po sambinoe Meunan bagoe ulon ibarat Keu meulintee lon tueng dudoe Mangat sinoe deuh jilihat

Meuka jieu tuan putroe Meuhat dudoe rohteuingat Meunyo ka treb dong bak kamoe Tuan putroe deuh jilihat

Meunyo han ek jitheuen hate Keunoe troh le deungon siat Bahle jinoe rugoe hareuta Dudoe teuma laba lipat

Miseue ureueng maniaga Boh beulanja dilee siat Meuna umu dudoe teuma Muploh laksa laba lipat

Meunan miseue bungong keumee Piyoh dilee bek beungeh that Bek marah that po cut ampon Seubab di lon teupat kasad

Lon peugot buet got cut meuubon Teuma keu lon takheun laknat Beuthat taeu han got rupa Dalam dada puteh that-that Meukon meunan han lon lahe Tapoh mate lon ngon siat Pakon po cut marah hate Han tapike nyang muslihat Saket payah lon usaha Lon jak mita keu cut intan Nyan dum di lon hajat cinta Meunoe teuma nyang lon dapat Meunyo meunan po jroh rupa Bahle hamba cre di teumpat Bahle lon jak peutroh hate Bahle mate baranggapat Diwa Hamilah meunan haba Putroe muda seuot leugat Di lon mantong kumeuseunda Di gata ka amarah that Hai Hamilah nyang seutia Pakon gata beungeh sangat Meunyo gata taboh nanggroe Ulon sidroe siploh lipat Adat lon duek di meuligoe Hate lon nyoe hana mangat Meunyo han troh ban lon cinta Lon bungka han meuho bakat Bitpi taeu ulon sinoe Nyawong lon nyoe saboh teumpat Lon peujok droe ubak Tuhan Meung lon preh jan troh malaikat

Meuna gaseh nibak gata Cuba mita keu lon ubat Meunan narit putroe indah Hamilah beudoh le leugat Jiteureubang sangat tajam Troh lam hutan han jan siat Tamong laju dalam kuta Meuteumeung ka puteh lumat Tajul Muluk panyot kande Ubak umi sujud leugat Diwa Hamilah jimarit le He boh hate putik langsaț Beudoh laju he aneukda Keudeh sigra tabeurangkat Jak pot aneuk bungong jeumpa Yoh goh mala jak cok leugat Yoh goh mala nibak tangke He boh hate jak beurangkat Teuma seuot banta muda Bak lon bunda ban nyang pakat Ban nyang titah nibak bunda Nibak hamba ikot pakat Akan teutapi wahe po ma Bak ayahda lon woe siat Lon jak lakee meuah deesya Bek meureuka bak halarat Tajul Muluk beudoh sigra Bak ayahda neuwoe leugat 'Oh troh keudeh bak meukuta Peugah haba meung beurangkat Idin keu lon he ayahda Lon meung bungka ‘euoh teumpat

Nyan pat kuta deungon mideuen Neukeurajeuen ban nyang adat Bek na aeb deungon keuji Wahe doli beule ingat Nyan pat judo lon dua droe Tuanku droe ingat beuthat Teuma neukheun ubak judo Bungong kundo lon jak siat Lon neujak tueng uleh ibu Saleh peue-peue na meularat Saleh peue na teuka mara Idin gata bungong riwat Meunan neukheun banta indah Han neupeugah jalan teupat Neusom basa hana lahe Bek weueh hate cut ti kasab Habeh wasiet banta seudang Beudoh rijang le beurangkat Troh u mideuen banta langkah Cut Hamilah sambot leugat Bapo laju dalam awan Hingga datang troh u teumpat Troh lam kuta Meungkawali Ka jibeuet le saboh hekeumat Jeuet le rupa miseue nuri Po tallah bri troh ban hajat Bulee kuneng ban meuh meuntah Paroh mirah hitam kilat Lom azimat nibak dada Indah rupa sang malakat Jipeulheueh le keunan bagah Diwa Hamilah jiwoe leugat

Cicem nuri indah han soe Lam meuligoe jipo teupat Nibak tingkap jidong keudroe Sinyak putroe deuh jilihat Putroe jak le keunan rap toe Po sambinoe hate mangat Jikeumeung drob nuri raghoe Jipo sampoe troh bak rambat Putroe meuhei le dendayang Tadrob kaman he da siat Troh dendayang keunan ka toe Jipo jinoe le bagah that Ka jidong di leuen istana Dayang dumna keunan peurab Jipo sinan nuri raghoe Lam meuligoe jipo teupat Ka jidong lom nibak bunoe Tuan putroe beudoh leugat Tan jipo le cicem nuri Cut putroe ti hate mangat Jicok cicem mat di jaroe Po sambinoe galak jithat Nuri indah tan teuladan Miseue intan hu meukilat

Rindu hate pirak hupam Uroe malam cit lam jimat Teukeudi po 'Azizon Ghafor Leumah jieu saboh teumpat Nibak takue cicem nuri Cut putroe ti laju jimat 'Oh ban jimat surat indah Rupa ubah deungon siat

Muwoe rupa banta seudang Cahya badan hu meukilat Tajul Muluk nyang samlakoe Sinyak putroe that beurminat Sang beujiwa le ngon jinoe Tuan putroe gadoh ingat Rindu hate galak mate Han ek saba puteh lumat Laju jicom po samlakoe Sinyak putroe sinan ladat Pihak napsu gadoh malee Bungong keumbee tueng ibarat Han le pike nyan keu malee Ka meuteumee bacut nekmat Teuma marit Meungkawali Ampon kami wahe deelat Tan lon tusoe ampon doli Lon kheun nuri rupa got that Pakon tuanku peungeut ulon Meuah ampon wahe deelat Kayee raya jroh hijo on Meuhimpon rampuneue le that Bek neuhaloh nyang salah lon Meuah ampon wahe deelat Bukon sayang meulu cina Lam piala hana soe mat Tapumeuah po meukuta Saboh haba lon riwayat Aneuk got-got di cong ara Patah pha keunong hekeumat Hana patot po meukuta Lon jak mita jeueb-jeueb teumpat

M

Leuek bangguna di cong kayee Jiseumalee le siwah barat Lon tuanku seb ka malee Dum ka meuthee teuhah urat

Meuna hajat pot boh pupu Tajak laju gampong barat Peue na salah he tuanku Peugah laju nyang muslihat

Bukon sayang boh peungata Dalam bangsa jiduek ulat Neucok euncien deungon ija Teutap hamba lam meularat

Neucok bungong dalam tangan Lheueh nibak nyan neuwoe leugat Hana patot he jonjongan Keu ulon han tatem ingat

Trieng beutong reubong lam tanoh Sithon saboh teubiet u lua Hajat ka troh napsu ka peunoh Patot neuboh lon he deelat

Bukon sayang cintra mula Cicem pala po u barat Habeh rasa lon peurasa Meuraba-raba jeueb-jeueb teumpat

Bukon sayang lon eu pade Hujeuen han le mate le that Jeueb-jeueb gampong lon teubade

Seubab pie ampon deelat

Tuanku teutap di meuligoe Sajan putroe puteh lumat Lon teueng bayeueng jeueb-jeueb nanggroe Malam uroe lam meularat

Sampoe lon jak geubeue guda Bak ayahda ampon deelat Rindu hate lon han tara Nyang cok ija lon meung lihat Ngon seubab nyan po meukuta Tan lon kira șaket mangat Nasib tuboh lon ka meunan Ulon paban grak halarat Dumnan di lon meuraba-raba Siblah mata han soe lihat Han neusayang ube seuma Seubab ka na pirak lipat Meunyo ka na beude dama Keupeue guna saruek ulat Meunyo ka na putroe muda Keupeue guna nyang po ubat Asai bungong ka lam jaroe Ka troh sampoe ban nyang hajat Meunan pike tanglong nanggroe Pihak kamoe hana pangkat Lagi ulon kon biek po cut Panekeuh jeuet peutimang adat Meunan jikheun sambinoe cut Ie mata sret ban ujeuen brat Sira marit sira jimoe Sinyak putroe rugha sangat Tajul Muluk nyang samlakoe Jaweueb meunoe pantah leugat Wahe putroe tangke nyawa Bek le keuh na tariwayat Tanoh lhok tapula lipah Pula lawah di ateueh jeurat

Tajul Muluk jeuet troh langkah Putroe indah keumeung hajat Bukon sayang lon eu lada Pucok hana soe tem ikat

Meuna mantong udeb nyawa Lon umpama pirak lipat Laba rugoe han lon weueh le Meuka mate ka lheueh adat

Nyawong tuboh darah gapah Lon publoe sah keu halarat Lon boh gampong dengan nanggroe Sinyak putroe lon meuhajat

Lon seutot wasiet saboh roe Wasiet putroe bungong riwat

Masa teudong di cong jeumpa

Habeh rasa saket mangat

Nyankeuh seubab troh lon teuka He meutia puteh lumat Bak lon sangka ek meusampe Na ban janji pirak lipat

Hana lon thee po juhari Teuka beunci troh u teumpat Bak pihak lon kureueng bangsa Ngon gata han sabe pangkat

Jinoe nyang got po jroh rupa Idin gata lon beurangkat Lon dong sinoe hana laba Seubab gatapi ka luat

Got keuh jinoe bahle lon jak Bek jeuet rusak he cut ubat U gampong pi han le lon woe Bak ri bagoe hana mangat

Lon dong sinoe hana meukri

Bahle mate baranggapat Meuka rusak papeuen bahtra Padumkeuh na tabeurangkat

Meuka beunci po istana Padumkeuh na teuka mangat Nibak dudoe teuka cupa

Bah lon bungka yoh goh lom brat

Bukon sayang cicempala Bulee dada sion sapat Seulamat tinggal bungong jeumpa Lon bungka do'a seulamat

Tajul Muluk beudoh pantah Keumeung langkah yoh nyan leugat 'Oh ban sare neubet langkah Putroe indah laju jimat

Jimat laju gaki banta Ngon ie mata ban ujeuen brat Putroe jimoe hana reuda Sangka raja gadoh ingat

Sira jimoe jikheun yoh nyan Hai junjungan piyoh siat Takoh igeueh keu deungong suwe

Di ateueh gle peugot teumpat

'Oh lheueh neupoh lon bu mate Jeuet hai doli neubeurangkat Meukon meunan deelat ampon

Han lon bri tren meung 'oh rambat

Meunan jikheun bungong sukon Droe jisumpom ateueh deelat Tajul Muluk deungo meunan Hana lawan hate mangat

Meunyo cit na ban tapeugah Silangkah han lon beurangkat Jibeudoh le putroe muda Jicinta saboh hekeumat Deungon tulong Tuhan Nyang Esa Teungku Tapa troh le leugat Sajan neuba ngon dua droe Nyan pi meusoe malem utat Teuma marit sinyak putroe Ulon teunyoe raya hajat Neupeunikah ulon jinoe Ngon samlakoe aneuk deelat Lheueh wakilah nibak putroe Teungku jinoe,marit leugat Insya Allah bungong geutoe Tuhan sidroe putroe hajat Yoh nyan teungku kheun bismillah Seuot pantah bungong riwat 'Oh lheueh ijab kabui nikah Teungku syiah neuwoe leugat Syiah neutren laju neuwoe Tinggai putroe deungon deelat Teutap sinan tuan putroe Ngon samlakoe pirak lipat 'Oh ka uroe jeuet keu nuri Malam hari laen pakat 'Oh ka seupot jilop hari Sajan cut ti sinan sapat Geumeucom-com geumeuwa-wa Peue nyang suka pubuet leugat Suntok sabe meusuka-suka Putroe muda deungon deelat

Cit ka maklum he syeedara Asoe kaya teumon bu leukat Ka na nekmat bandua droe Keudeh keunoe meugaseh that Hingga teuma padum lama Ubak bunda meuthee leugat Lompih meugah bak ayahda Putroe muda buet jeuheut that Teuma marit poteu raja Ubak nisa neukheun leugat Meungkawali nyang jroh rupa Dalam kuta laen pakat Cuba tajak jinoe sigra Tapareksa peue alamat Kadang cit na ban gop peugah Tajak pantah bek le lambat Hamilah Katon beudoh pantah Bak cut indah jijak leugat Nyankeuh bunda Meungkawali Judo doli nyang indah that Jijak laju u istana Bak aneukda bungong riwat 'Oh troh keudeh u meuligoe Beudoh putroe puteh lumat Jijak seumbah teuot bunda Ban nyang kada bri horeumat Teuma geuduek le bandua Ateueh geuta nyang indah that Hamilah Katon peugah haba Ngon aneukda bungong riwat Padumna treb tan tagisa Saleh peue na nyang meularat

Hanco hate dalam dada Aneukda han tom lon lihat Nyankeuh seubab lon jak keunoe He aneuk droe putik langsat

Ayah gatapi ka wawoe Di lon sidroepi tan mangat Saleh peue na teuka bala Meunan rupa bak lon lihat

Peue na salah he aneukda Peugah sigra pirak lipat Soe na carot ngon dhot gata Bak bunda han tawoe siat

Teuma jaweueb putroe muda Pakon bunda sosahneuh that Hana saket lon hai bunda Cit lam teuga badan sehat

Hamilah Katon that ceureudek Jitilek bak putik langsat Di miyub phon troh u ateueh Jikalon deuh nyan alamat

Jeuep-jeuep teumpat habeh ubah Muka ubah lagee pucat Ujong mata pi ka beukah Dada mirah hu meukilat

'Oh ban jieu meunan ulah Di Hamilah beungeh jih that Akan teutapi hana lahe Bek weueh hate putroe ubat

Hamilah Katon tamong lanja

Dalam kama keudeh leugat Meungkawalipi seureuta Sajan bunda jibeurangkat

Muka pucat hate lia Seubab cintra sinan meulhat 'Oh troh keunan dalam kama Jipareksa jeuep-jeuep teumpat Jijak mita ureueng lakoe Jeueb-jeueb sagoe jikalon pat Tan meuteumeuengpi meusidroe Tuan putroe sosah jithat Lheueh nibak nyan teuma laju Leumah jieu cintra meulhat Dalam cintra cicem nuri Putroe sudi teuma leugat Pane cicem that juhari He boh hate rupa got that Jaweueb putroe Meungkawali Ubak umi jiriwayat Lon peulara he bunda droe Seubab raghoe galak lon that Hingga teuma malam uroe Sinyak putroe eh bak teumpat Bitpih jieh putroe muda Dalam dada han le mangat Seubab jieh sajan bunda Bandua sinan meusapat Han le teungeut Meungkawali Keu nuri sabe teuingat Hamilah Katón utoh han soe Peuteungeut droe jipeurasat Bak jisangka po sambinoe Bunda sidroe teungeut mangat Nakeuh watee teungoh malam Pirak hupam beudoh leugat

Jitamong laju lam kama Peuhah cintra nuri got that Ngon azimat ka jileukang Banda seudang teudong meuhat

Putroe seumbah nibak teuot Banta sambot ngon horeumat Teuma piyoh po jroh rupa Bandua sinan meusapat

Putroe suleueng ranup sigapu Teuma meusu banta deelat Wahe judo bungong meulu Nyoe lon meusu ngon nasehat

Bak lon peunyum wahe putroe Bunda sidroe amarah that Lon eu bunda bunoe teuka Jeh lam kama teungeut mangat

Nyankeuh seubab geujak keunoe Ulon sidroe geujak sasat Ka deuh lon eu bunoe uroe Jeueb-jeueb sagoe geumita pat

Bak pike lon bungong keumbee 'Oh meuteumee jeuet meularat Saleh ulon roh mupaloe Kadang lon nyoe nyawong teurangkat

Meunan leumah dalam hate Bungong pade pakri pakat Di lon putroe nyang meurasa Bah lon bungka dilee siat

'Oh ka puleh hate bunda Ulon gisa keunoe leugat Meukon meunan po jroh rupa Akhe masa jeuet meularat

Miseue narit ureueng tuha He adekda ingat beuthat Turot napsu malee han le Turot hate nyawong teurangkat

Peuturot angen putoh taloe Seulayang nyoe sret han mupat Seulayang sret han meuho le Reuloh hate ureueng nyang mat

Meunan adek geuboh mise He putroe ti puteh lumat Ulon peugah laba rugoe Maklum keudroe putik langsat

Toh nyang mangat nibak gata He adekda jaweueb leugat Di lon judo tan lon kira Ikot saja ban nyang pakat

Beuthat mate lon troh masa He adekda han lon ingat Meuka seunang nibak gata Rugoe laba rela lon that

Tajul Muluk meunan haba Putroe muda jaweueb leugat Takoh dandan pula dandan Di yub asan sinyak pot kulat

Meunyo mate ampon laman Lonpi sajan lon beurangkat Meunyo meunan he adekda Ban nyang kada bak halarat Adat mate sampoe masa Deungon gata bungong riwat Bukon sayang putik kumbang Lam keunarang ka meuulat

Adat teukeudi lon geubuang He buleuen trang do'a seulamat Tajul Muluk meunan haba Beudoh lanja eh bak teumpat Sajan putroe cahya mata Bandua sinan meusapat Teungoh-teungoh meusuka-suka Teuka bala nyang raya that Hamilah Katon keunan teuka Jieu rupa banta deelat 'Oh ban jieu banta muda Beungeh raya muka hu that Jijak laju keunan ka toe Po samlakoe laju jimat Sira jimat po juhari Jideumpek le su raya that Jimarit le su meutaga He ceulaka kah nyang laknat Hana patot buet kah meunoe Deungon putroe kaeh sapat Aneuk raja nyang juhari Kajak taki wahe laknat Beurani that keunoe teuka Ubak dewa nyang beurpangkat Han kathee droe manusia Nibak kada nyang hina that Kupoh mate kah uroe nyoe Aneuk kamoe kapeucacat Cuba peugah ubak kamoe Peue buet keunoe kabeurangkat Tajul Muluk jaweueb sigra Meunoe haba banta deelat

Meunyo cit na bungong jeumpa Kumbang dumna troh meusapat Meunyo cit na putroe muda Nakeuh teuka aneuk deelat Han peue tanyong panyang raya Ban nyang suka pubuet leugat Tajul Muluk meunan peugah Hamilah ka beungeh jihthat Hamilah Katon that amarah Jicok bagah banta deelat Dalam awan jisrom sigra Bintang kala sayangteuh that Gadoh ingat bungong pade Sang ka mate putik langsat Nibak adat taeu lahe Bungong pade han le hayat 'Oh lheueh jisrom po samlakoe Sinyak putroe jimat leugat Ka jiikat gaki jaroe Jikheun meunoe bak cut ubat Hana patot he aneukda Manusia tameuhajat Tabri aeb nama diwa Raja-raja nyang mupangkat Sinyak putroe han le haba Seubab bundajih beungeh that Hingga jiba putroe muda Bak ayahda keudeh leugat 'Oh troh keudeh bak khalifah Jipeugah haba nyang teupat Hamilah Katon nyang seumeugah Mula Fasyah deungo leugat

Ban geudeungo meunan haba Beungeh raya raja deelat

Bit paleh that kah ceulaka

Kemeuhawa nyang kon teumpat

Jinoe kubri keu kah seksa Lam peunjara kuyue ikat Sujud putroe Meungkawali Com di gaki raja deelat

Meuah ampon wahe abi Ban nyang rali bak lon mangat

Ban nyang suka nibak doli

Hudep mate grak halarat

Akan teutapi he ayahda Buet lon peuna kon buet jahat Ka lheueh tuanku lon meunikah Hana salah ube lalat

Lagi gagah that beurani Le that sakti aneuk deelat Beuthat neusrom dalam awan Di lon tuan judo meuhat

Bek antara raja nanggroe Baranggasoe han troh dapat Nyankeuh seubab lon meunikah Beuthat marah ampon deelat

Bek antara neuboh rante Adat mate bak lon mangat Laba rugoe hudep mate Nyankeuh doli nyang lon hajat

Beuthat neusrom dalam laot Neusambot le malaikat Insya Allah wahe abi Keumbali keunoe lom meuhat

Meunan ayah neueu lahe Bek beunci le bagah that-that Dudoe telah tuanku droe 'Oh troh neuwoe pirak lipat Meunan jikheun sinyak putroe Raja nanggroe lom beungeh that Geucok putroe nyang jroh rupa Lam peunjara pasoe leugat Sinan teutap putroe muda Ro ie mata ban hujeuen brat Bukon sayang bungong meulu Meutabu bak sagoe rambat Sayangteu that meuna taeu Bintang timu jiboh lam glap Bukon sayang bungong kundo Jimoe bae dalam ikat Putroe jimoe that meusyu-syu Soe deungo su mayoh ladat Bukon syang bungong jeumpa Habeh mala hana soe mat Wahe judo ayeuem mata Neubungka han meuho bakat Meunan-meunan dum jiato Seubab judo han le mupat Jeuetkeuh 'oh nan haba bae Laen lom le han ek surat Tapumeuah he syeedara Malam jula teungeut lon that Singoh uroe lom lon mula Meuna kuasa bri halarat Puteh-puteh bungong jeumpa Nyang that gura bungong peukan

'Oh ban beungoh uroe faja Laju sigra lon mat kalam Tan peue laen nyang lon kira Cit keu banta nyang ka hilang Sayangteu that aneuk raja Jigeulawa dalam awan Deungo beugot wahe akhi Nyoe ulon ci mula kalam Nyoe baro phon lon mulai Lheueh jeb kupi saboh cawan Keupeue laen tan lon kira Asai ka na kupi hitam Cit ka laju teubleut mata Ubit raya wahe rakan AMMA BAKDU laen ulah Muwoe kisah banta seudang Tajul Muluk nyang bahgia Jigeulawa dalam awan Han saho sret banta muda Dalam hawa meutang-ilang Gadoh ingat po jroh rupa Bak nyum rasa nyawong hilang Keudeh keunoe meugisa-gisa Angen peuba ban seulayang Manyang leupah jigeulawa Ureueng donya han deuh pandang Tujoh buleuen dalam hawa That seungsara muda seudang Teukeudi Po Tuhan Ma'bud Sret lam laot bungong karang Tajul Muluk yoh nyan ka sret Dalam laot meugeulumbang

'Oh sare ka teubleut mata Laot raya deuh neupandang Tajul Muluk nyang meutuah Neuhei Allah hana reunggang Wahe Tuhan Po lon sidroe Hambateu nyoe gaseh sayang Neupeulara he ya Rabbi Bek roh neubri nyawong hilang Ngon keuramat dumna syeekhi He ya Rabbi neupeuriwang Wahe Tuhan nyang that gani Meungkawali bri lon pandang Adat teukeudi lon troh masa Bahle sama putroe intan Adat han trep siklep mata Ya Rabbana keu lon neupulang 'Oh lheueh lon eu putroe muda Ulon rela nyawong hilang Meunan neukheun po jroh rupa Troh le teuka sikrak batang Hanyot laju u keue banta Neuek lanja le neupasang Bak masa nyan bungong riwat Dalam bakat balek batang Ulee ili dalam bakat Banta deelat lam geulumbang Bitpih meunan lam meularat Nyang teuingat putroe bintang Dumnan gaseh dalam hate Meungkawali putroe seudang Bit ka dumnan wahe sampee Hana geuthee nyawong hilang

Meuna mantong mumot tuboh Putroe haloh han putoh sayang Adat meukon dumnan rasa Bah rimueng ba sinan ceukang Meuna umu Tuhan neubri Nakeuh lagi 'oh lon riwang Tajul Muluk seungsara that Dalam bakat ngon geulumbang Teukeudi Allah Po Nyang Ahad Sret u darat banta seudang 'Oh sare troh bineh pasi Po juhari teungoh rijang Di yub aron neupiyoh le Badan lape bungong karang Sang han ek le meugrak gaki Po juhari meutang ilang Teuma neujak banta muda Rot lam rimba neupeuseunang Sira neujak neumoe bae Soe deungo su teuka sayang Neuseubot nan Meungkawali Baten lahe keunan pandang Neukheun syae tan beureunti Bak laku ri akai hilang Ubak Tuhan mohon bantu Ya Tuhanku gaseh sayang Meunan neukheun po samlakoe Sira neumoe hana reunggang Neujak sidroe ret lam rimba Uroe seunja ka meusu glang Laju neujak hana teudoh Hingga troh yub kayee manyang

Ban meuteumeung kayee raya Cut banta neupiyoh rijang Tajul Muluk nyang bahgia Neuek lanja kayee seuntang Peugot teumpat di cong kayee Bungong keumbee piyoh rijang Keutam keutum patah kayee Bungong keumbee hate reunggang Geunta hate po jroh rupa Saleh bala nyoe ka datang Neupadok lon ya Rabbana Nibak bala jen edeurang Ya Tuhanku neupeujeuoh Bek neubri troh keunoe datang Meunan neukheun puteh leusoh Naga ka troh keunan rijang U yub kayee jijak lanja Naga raya deuh neupandang Tajul Muluk pirak lipat Neuduek teutap di cong seuntang Bak masa nyan naga raya Jingieng sigrà ban saboh nyan Wie ngon uneuen jipareksa Sinan lingka kayee seuntang Hana saboh pi meung sapat Malakat jiulee rijang Jikeubah le that meuteuntee Bak peureudee kayee manyang Malakat jroh hana tara Hu meucahya ban buleuen trang Nyan dum seupot glap gulita Peungeuh rimba lam geumilang

Peugot teumpat di cong kayee Bungong keumbee piyoh rijang Keutam keutum patah kayee Bungong keumbee hate reunggang Geunta hate po jroh rupa Saleh bala nyoe ka datang Neupadok lon ya Rabbana Nibak bala jen edeurang Ya Tuhanku neupeujeuoh Bek neubri troh keunoe datang Meunan neukheun puteh leusoh Naga ka troh keunan rijang U yub kayee jijak lanja Naga raya deuh neupandang Tajul Muluk pirak lipat Neuduek teutap di cong seuntang Bak masa nyan naga raya Jingieng sigra ban saboh nyan Wie ngon uneun jipareksa Sinan lingka kayee seuntang Hana sabohpi meung sapat Malakat jiulee rijang Jikeubah le that meuteuntee Bak peureudee kayee manyang Malakat jroh hana tara Hu meucahya ban buleuen trang Nyan dum seupot glap gulita Peungeuh rimba lam geumilang 'Oh lheueh naga keubah malakat Jijak leugat ngieng binatang Keudeh keunoe jijak mita Deuekjih raya naga suang

Tajul Muluk neukalon le

Dalam hate meugeulumbang Seubab rindu malakat nyan Masa nyan sang neucok rijang

Pakri lon cok malakat nyoe Yoh goh jiwoe naga suang

Nyang got jinoe bah lon saba

Lon bicara jalan seunang

Meunan pike po jroh rupa Neueu lanja ulee mumang 'Oh nan teutap puteh leusoh Naga bioh le jiriwang

Cok malakat nyang seumeuloh Laju jibloh dalam padang

Tinggai banta sidroe sinan

Pike yoh nyan pakri jalan

Seubab rindu keu malakat Tamita pat jalan seunang Pakri neucok nyan malakat Banta ingat uroe peutang

Hingga beungoh le ngon uroe Po samlakoe tren le rijang Tanoh leuhop neujak mita Peuek lanja u cong seuntang

Cukop hase sianeka Uroepi ka laju hilang

Teuka seupot glap gulita

Banta muda hate seunang

'Oh ban sare leupah seunja Troh le naga keunan datang 'Oh troh keunan naga raya Keumala jikeubah rijang

Naga jijak sinan lingka Jijak mita lutong musang Tajul Muluk pirak lipat Malakat sabe neupandang 'Oh ban sare leupah naga Leuhop nyang na neutiek rijang Leuhop ka sret ateueh malakat Deungon siat cahya hilang Gadoh peungeuh ka seupot that Naga karat le jiriwang Jipoh-poh droe naga raya Hingga fana nyawong hilang Naga mate yoh nyan sigra Banta muda neutren rijang Cok malakat po samlakoe Peuek jinoe u cong seuntang Bak masa nyan po jroh rupa Deuh suara neudeungo trang Saboh cicem di cong kayee Meusilee bak cabeueng seuntang Cicem bayeuen nan geuuroh Aneuk saboh mantong seudang Jimeututo deungon bunda Ngon suara that meulumbang Pakon he ma treb that neuwoe Ulon sidroe hana seunang Deuek deungon grah hana bagoe Seubab trep woe ma jeunulang Han neusayang keu lon sidroe Kadang peue-peue bala datang Teuma seuot bayeuen rimba He aneukda that lon sayang

Akan teutapi cahya mata Jeuoh raya lon beurjalan Lon jak mita umpeuen gata Habeh rimba lon sang abrang Aneuk bayęuen marit utoh Pakon jeuoh neubeurjalan Pakon han di sinoe lingka Neujak mita daruet canggang Inong bayeuen jaweueb meunoe Lam uteuen nyoe hana seunang Peunyaket le that hana bagoe Malam uroe hana reunggang Peue peunyaket lam uteuen nyoe Ma teungku droe peugah rijang Bek tatanyong he aneuk droe Kadang keunoe ureueng datang Aneuk bayeuen jikheun meunoe Lam uteuen nyoe pane urang Jipeugah le teuma meunoe He aneuk droe deungo beutrang Sibak kayee blah rot barat Hu meukilat ban buleuen trang Bohjihpi le muda masak Cabeueng ramphak sang keutapang Baranggasoe han jeuet jijak Di miyub bak naga suang Baranggadum rancak bijak Han troh tajak bungong keumang Bek antara manusia Cicem rimba that jipantang Nama kayee sarai mahtob Dumpue cukop he buleuen trang

Peue nyang hajat tameunapsu Aneuk teungku hase rijang Aneuk bayeuen lom jisudi He ma pakri rot nyang seunang Beutroh taek u cong kayee Pakri lagee ma jeunulang Peugah he ma bak lon jinoe Hate lon nyoe sangat bimbang Bayeuen rimba jipeugah le He boh hate deungo beutrang Saboh kulam bungong keumbee Ngon bak kayee jidong teuntang Meunyo rot nan tajak lanja Di naga han deuh jipandang Dalam kulam tagrop sigra Jeuet le rupa ban binatang Jeuet le rupa miseue nuri Tabeudoh le tateureubang 'Oh troh u cong kayee raya Pot boh muda pajoh rijang Muwoe badan miseue nyang ka Indah rupa ban buleuen trang Lheueh nyan tacok peue nyang suka Rupa-rupa hase rijang Ujong cabeueng tawiet sikrak Jeuet hai nyak peudeueng panyang Nyankeuh peudeueng meupusaka Tan tarasa 'oh tameucang Meunyo tatiek lam laot raya Tho le sigra jeuet keu padang Baranggajan cit troh bungka Meung mata han jijeuet pandang

Beuthat ensan ngon jen rimba Hana daya ek jiteuntang Meunyo rusak nibak tuboh On jih taboh puleh rijang Tacok kulet he aneuk droe Jeuet le jinoe guda teureubang On tapeugot keu kupiah Han le leumah soe nyang pandang Cok lom kulet kayee bunoe Peugot peutoe pantah rijang Kutob rabani nama peutoe Jeuet tapasoe dum sibarang 'Oh ka hase sianeka Beudoh lanja tateureubang Bayeuen marit ngon aneukda Indah rupa ban buleuen trang Habeh haba bayeuen rimba Teubiet faja peungeuh bandrang Tajul Muluk nyang jroh rupa Neutren lanja kayee seuntang Neupeuteupat dalam rimba Neujak mita kayee manyang Cicem bayeuen kalon rupa Bak aneukda jikheun rijang Jeh hai aneuk manusia Takheun hana keunoe datang Meunan jikheun bayeuen rimba Banta muda hate bimbang Tajul Muluk arong rimba Meuteumeung ka kayee manyang Sibak kayee neungieng rupa Hu meucahya ban buleuen trang

Bak peureudee kayee raya Saboh naga deuh neupandang Tujoh cula nibak ulee Lom ngon bulee panyang-panyang Neungieng kulam sinan saboh Ie hitam jroh miseue arang Keunan neujak banta muda Neugrob lanja le meulayang Yoh nyan naga jigeuriwat Jiangkat uleejih rijang Naga kalon timu barat Hana sapat na mubayang Tajul Muluk pirak lipat Beudoh leugat dalam kulam Deungon limpah rahmat Rabbi Jeuet keu nuri banta seudang Neupo laju bungong keumbee U cong kayee neuteureubang 'Oh sare troh u cong kayee Bungong keumbee piyoh rijang Puleh payah bungong pade Ka neuwiet le sikrak cabang 'Oh sare troh ubak jaroe Jeuet le beusoe peudeueng panyang Pot boh kayee pajoh lanja Muwoe rupa miseue ensan ka meuriwang miseue nyang ka Indah rupa ban buleuen trang Kulet kayee neupluek leugat Guda hekeumat jiteureubang Pot on kayee banta indah Keu kupiah peugot rijang

Seuon laju nyan kupiah Han le leumah soe nyang pandang Hekeumat neucok nibak naga Neuboh lam pha banta seudang Pat nyang luka boh on kayee Puleh teuntee deungon rijang Pluek lom kulet kayee jatoe Peugot peutoe bungong karang Kutob rabani nan geukheun proe Keunan pasoe dum sibarang Cukop hase sianeka Ateueh guda banta pasang Tajul Muluk neupoh lawa U antara jiteureubang Padum lawet dalam hawa Troh banta bak saboh padang Guda sujud keunan sigra Banta muda tren le rijang Ateueh bumoe neutren banta Gudapi ka laju hilang Ka muwoe ban asai mula 'Ajab raya 'oh tapandang Kutob rabani banta buka Pasoe lanja dum sibarang Lheueh nyan banta neujak sidroe Malam uroe neusang-abrang Uroe tutong hana bagoe Tutong asoe bungong karang Neumita ie po samlakoe Leuho uroe neuseumbahyang Ngon karonya Tuhan sidroe Meuteumeung nyoe saboh kulam

Saboh kulam indah han soe Po samlakoe keunan bimbang Neukalon ie lam kulam nyoe Mata laloe tahe mandang Siblah hitam siblah ceukoe Bungong geutoe hate bimbang Banta seunom lam ie ceukoe Neujak manoe dalam kulam 'Oh lheueh seunom beudoh sigra Laeh rupa ka neupandang Kulam laen neueu nyata Ngon rupa ka laen macam Sigala sifeuet aneuk dara Dumpeue ka na banta seudang 'Ajab hate hireuen laloe Neukalon droe meugleueng subang Wahe Tuhan Po lon Rabbi Ban nyang neubri bak lon seunang Tajul Muluk nyang bahgia Bak Rabbana droe neupulang Lheueh nibak nyan po juhari Dalam pike meutang ilang Hokeuh jinoe lon jak piyoh Ma teungku beh bukon sayang Teuduek siat pirak lipat Lon riwayat laen macam Saboh nanggroe luah cukop Siraton Kutob geurasi nan Meuseuket that aneuk dara Nanggroe raja luah han ban Nyang got teungku taibadat Aneuk deelat hana tunangan

Raja teungku nyang po nanggroe Ka neuwoe bak Tuhan Rahman Aneukpi na tinggai sidroe Nyankeuh gantoe ayah laman Rupapi jroh that samlakoe Jeueb-jeueb nanggroe tan teuladan That meusyeuhu timu barat Banta deelat Syaref sajan Bak siuroe putik langsat Musyeewarat deungon rakan Jak meurusa galakjih that Pawang meuhat jiba sajan Teuma piyoh saboh teumpat Raja deelat bandum sinan Paroh rusa keudeh keunoe Geunap uroe sabe meunan Cukop hase ban nyang.hajat Raja deelat kheun bak rakan He peurdana wadi meuntroe Jinoe tawoe seukalian Beudoh laju peukeumah droe Bek le sinoe dalam hutan Teukeudi Po Tuhan sidroe Po samlakoe sisat jalan Tunong baroh han meuho le Sosah hate bungong peukan Lawet lawan teuma dudoe Troh le sampoe ubak padang Kulam saboh sinan leumah Banta indah peurab rijang 'Oh troh keunan po samlakoe Neueue putroe that analan

Poteu raja tanyong meunoe Pane nanggroe he cut intan Peue nan bangsa gata sidroe Peugah jinoe bak lon tuan Teuma seuot sinyak putroe Ampon kamoe po jonjongan Ulon teunyoe manusia Wahe raja nyang budiman Yoh nyan raja lom pareksa Peue buet gata dalam hutan Bak siuroe po meukuta Grak Rabbana keu lon tuan Sajan cuda lon jak meuen Teuka angen ngon seupot klam Lon jak meuen bineh pasi Wahe doli lon beurjalan Di yub aron lon beureunti Dua kami nyang laen tan Jipot angen dirui mangat Teungeut ladat bak lon duek nyan 'Oh teukeujot lon meukuta Lon eu rimba seukalian Tahe hireuen lon han tara Grak Rabbana keu lon tuan Tinggai ibu ngon ayahda Tinggai cuda he jonjongan 'Oh lon ingat putoh asa He meukuta ulon paban Salah lon tan ube seuma Peue kareuna lon lam hutan Meunan narit putroe muda Ngon ie mata sro meurumpan

Teuma seuot poteu raja Bek le rugha he buleuen trang Jak sajan lon jinoe lon ba Beudoh sigra tabeurjalan Lon meukawen deungon gata Di lon hana lom tunangan Meunan narit raja muda Hana dawa putroe intan Geucok putroe boh lam usong Di yub payong nyang analan Teuma beudoh woe u gampong Rakyat meuron-ron ireng sajan Troh lam kuta bungong tanjong Dendayang tren dum meurumpan Peuek laju u meuligoe Tuan putroe baro datang Troh le teuka ureueng nanggroe Keunan sampoe rame han ban Padum uroe lama masa Raja muda mupeurásan Tujoh uroe meukeurija Po teuraja kawen yoh nyan Hingga teutap raja nanggroe Deungon putroe nyang analan Meusuka-suka lam meuligoe Malam uroe that sukaan Padum lawet teuma akhe Teuka hame putroe intan Cukop buleuen hame putroe Aneuk sidroe ka laheran Lahe aneuk tuan putroe Ureueng lakoe that analan

Teuma beudoh nek nyang tuha Putroe muda geucok yoh nyan Yoh nyan marit sinyak putroe Deungo kamoe he nek badan Meunyo hajat meung seumanoe Rindu kamoe nek jeunulang Teuma neuseuot po nek maja Ban nyang suka bak cut intan Meuna hajat nak seumanoe Bek di sinoe he nek badan Nibak kulam ulon manoe Rindu kamoe hana macam Han peue salah po jroh rupa Ban nyang suka bungong peukan Yoh nyan teuma putroe muda Ka troh geuba ubak kulam Meukeumah le tuan putroe Tren jak manoe laju sinan Ngon dendayang dum sinaroe Sajan putroe bungong karang 'Oh ban seunom po sambinoe Gadoh keudroe hana meujan Dendayang dum sosah hate Han meuho le putroe intan Keudeh keunoe geujak mita Po nek maja sosah han ban Teuma geukheun laju sigra Woe lam kuta seukalian Tajak peugah ubak raja Beudoh lanja wahe rakan Beudoh bandum teuma sigra Ubak raja geubeurjalan

'Oh troh keudeh dalam kuta Geupeuhaba putroe intan Nek peugah le ubak raja Han meuho ka pirak hupam Dalam kulam teungoh manoe Sajan kamoe seukalian Raja deungo meunan haba Sret ie mata han muban-ban Allah hai po putoh asa Pat lon mita pirak hupam Pakri jinoe lon bicara Patek hamba apon badan Teutap raja dalam sosah Ulon peugah putroe intan 'Oh lheueh seunom putroe indah Rupa ubah kon le meunan Kulam laen lon eu rupa Putroepi ka laen ruman Ka jeuet agam kon le dara Hitam sukla kulet badan Nyang na puteh aneuk mata Laen sukla seukalian Ka teupike po samlakoe Tuhan sidroe kaya han ban Meunan pike bungong geutoe Teutap 'oh noe dilee kaman Jinoe laen ulon rawi Inong Habsyi lon peugah ban Dawok jimoe geunap uroe Seutot lakoe dalam hutan Ka padum trep hana jiwoe Inong sidroe sosah han ban

Teukeudi Po Rabbon Kade Meuteumeung le ngon bangsawan Leumah jieu po samlakoe Ka jipeutoe laju keunan Teuma jikheun haba meunoe Peue buet keunoe tabeurjalan Peue buet keunoe tajak som droe Keu kamoe han le ingatan Ulon mehmoh geunap uroe Jak koh tungoe dalam hutan Meukeu aneuk han ingat le Bahle mate keulaparan Mate geucang rimueng pajoh Jak som tuboh dalam hutan Peue lom taduek han tajak woe Bek le sinoe mate geucang Tajul Muluk bungong geutoe Neupeujok droe ubak Tuhan Tan neujaweueb sikrak haba Ban nyang suka bah jipadan Leumah pike dalam dada Ngon kuasa Malikon Manan Ban nyang kheundak Tuhan Esa Nibak hamba that relaan Tajul Muluk nyang bahgia Neuwoe lanja bungong peukan Agam paleh that ceulaka Pura-pura jak lam hutan Bit paleh that tan bicara Peurumoh na laen jalan Seubab ulon inong tuha Nyankeuh punca han tariwang

Tajak mita inong muda That ceulaka rimueng kuran Pane inong nyang ka gila Deungon gata jimeurakan Nyansa badan hitam nahi Inong pane nyang ka sawan Meunan jikheun inong cati Banta ahli neujaweueb tan Hingga jiba troh u rumoh Po banta jroh teutap sinan Beungoh uroe 'oh ka suboh Baci saboh neucok yoh nyan Jak koh kayee dalam rimba Keu beulanja bloe makanan Uroe malam neujak sabe Ka neuek gle manyang han ban Dalam padang nyang luah that Banta deelat ka troh keunan Jak mita ie keudeh keunoe Po samlakoe tutong badan Meuteumeung ngon kulam saboh Po banta jroh neutren keunan Banta seunom yoh nyan sigra Mangat rata basah badan Na sikeujab beudoh lanja Banta muda hireuen mandang Dilee badan hitam sukla Jinoe pi ka miseue intan Tajul Muluk ucap syuko Neupujoe Po sidroe Tuhan Lheueh nibak nyan bungong kundo Teungoh laju dalam kulam

Troh u darat bungong keumbee Neueu bajee mantong sinan Kutob rabani bak sot dilee Cit meuteuntee muminah tan Bandum mantong Tuhan neubri Po juhari cok le rijang Kulet kayee laju neusie Neupangge guda analan Guda raghoe troh le sigra Indah rupa hana lawan Tajul Muluk nyang jroh rupa Ateueh guda laju pasang Guda jipo pantah sigra Dalam hawa sangat tajam Laju jipo hana teudoh Hingga troh bak saboh padang Banta kalon padang luah Neukheun pantah bak guda nyan Wahe ulon guda indah Padang luah tatren keunan Raja guda sujud pantah Ban nyan titah jiubah han Laju sujud troh u bumoe Po samlakoe neutren keunan Guda hilang laju keudroe Laju jiwoe bak mulaan Tajul Muluk nyang samlakoe Yoh nyan sidroe neubeurjalan Teungoh neujak po samlakoe Neukalon nyoe saboh taman Leumah kuta that seureuloe Ngon meuligoe jroh hana ban

Cit jen hitam po hareuta Ureueng tuha nyang peugah nyan Jen hitam nama geurasi Le that sakti ngon seunuban

Rakyat le that meuribee katoe Jen pari nyoe han soe lawan Dalam kuta saboh meuligoe Sidroe putroe that analan

Tajul Muluk nyang samlakoe Neujak sidroe lam kuta nyan Laju neuek lam meuligoe Tan meusidroe ureueng sinan

Jeueb-jeueb bilek neupareksa Sidroe hana neueu ensan Nyang na intan dum meutabu Meujampu deungon beurlian

Tajul Muluk hireuen tahe Hareuta le ureuengpi tan Teungoh ngieng nyan bungong meulu Neudeungo su indah han ban

Siulah sang ureueng bae Tahe gante soe deungaran Wahe Tuhan Po lon Rabbi Saleh pakri untong badan

Lam rimba nyoe huteuen sunyi

Hana meukri lon jitawan Wahe Tuhan Po Nyang Esa Neupeulara patek laman

Neubri leupah lon lam rimba Bek lam bahya suntok zaman Wahe Tuhan Rabbon Kade Keu lon neubri beuna jalan

Lon meung jak eu bunda abi Rindu hate lon hana ban Teungoh bae cut putroe ti Dum jirawi untong badan Tajul Muluk neudeungo kri Neupeurap le teuma keunan Inseueh hate bungong meulu Neudeungo su mangat han ban 'Oh troh nibak babah pinto Keumeung lalo hana jalan Seubab pinto ka meugunci Banta ahli sosah han ban Banta han ek neutheun hate Neupeurap le neutrom yoh nyan Jibeudoh le putroe muda Jak pareksa peue meusu nyan Ban troh keunan po jroh rupa Jieu banta teudong sinan Jieu rupa that samlakoe Sinyak putroe tahe heran Teuma marit tuan putroe Ampon kamoe po jonjongan Pat bu gampong deungon nanggroe Peue buet keunoe neubeurjalan Saleh cit nyoe ampon doli Bangsa pari aneuk ensan Seumbah sujud hamba ini Di yub gaki po jonjongan Bek weueh hate po meukuta Seubab hamba tanyong meunan Jeuet lon tanyong po meukuta Seubab hamba that sosahan

'Oh troh jiwoe jen ceulaka Meukuta meuhat jitawan Jipoh mate tuanku droe Teulah dudoe po jonjongan Miseue ulonteu nyoe sidroe Di nanggroe jiba lam hutan Tinggai nanggroe bunda ayah Lon jireupah he sulotan Meunan jikheun sinyak putroe Po samlakoe jaweueb rijang Wahe putroe nyang sambinoe Deungo kamoe cut analan Ulon titek bagoe ie mbon Angen peutren dalam awan Meuna gaseh cut meuubon Tatueng ulon keu teubosan Jampang-jampang tajak manoe Taba kamoe srah pakaian Jen nyang jeuheuet han lon takot Meuna po cut sinoe sajan Meubacut han hate kuyut Bah jipubuet barangkaban Reudok di gle hujeuen han padee Asap lam batee seupot lam hutan Meutuah tuboh mate di juree Lam peulangkee putroe intan Meunan neukheun banta ahli Han taturi bangsa ensan Adat manok bireng tani Hana peue ci putroe intan Han tom jiplueng meung sipadė Jitem mate di geulanggang

Nyankeuh manok nyang pusaka Jeuet taba barangri peukan Putroe deungo meunan haba Peurab sigra com bak tangan

Meuah ampon po meukuta Kon lon cuba deelat laman Di lon deelat lon meuseunda Bek meukuta keumarahan

Aneuk puyoh dalam cintra 'Oh troh masa bri makanan Tuanku tamong keunoe sigra

Bek di lua po jonjongan

Tajul Muluk jaweueb sigra Han jeuet hamba tamong keunan Bek hai putroe lon tamaba Hana kada lon di sinan

Teumpat di lon bak seulasa Meuna rela bungong peukan Meunyo hana mangat hate Idin tabri lon beurjalan

Bek troh jiwoe jen baduwi Jipoh mate ulon tuan Han lon jeuet ngieng po juhari Jih le sakti ngon seunuban

Tajul Muluk meunan haba Sret ie mata putroe intan Sira jimoe putroe muda Jimat banta nibak tangan

Han neutamong wahe doli Neupoh mate lon relaan Adat udep tan guna le Reuloh hate suntok zaman

Di gop geuduek dalam nanggroe Di lon sidroe dalam hutan 'Oh lon ingat hanco hate Di gop sakri di lon saban

Meunan narit putroe muda Ngon ie mata basah badan Tajul Muluk tanyong sigra Pakon rugha putroe intan

Jak tatamong po jroh rupa Lon jok nyawa ubak Tuhan Putroe deungo meunan haba Tamong lanja le u dalam

Banta piyoh ateueh geuta Putroe muda jiduek sajan Tajul Muluk tanyong sigra He adekda bungong peukan

Pat bu nanggroe bintang kala Ayah bunda tapeugah nan Gata putroe soe bu nama Keunoe soe ba dalam hutan

Putroe seuot jipeugah troh Taman Paridoh gampong laman Taman Paridoh nama nanggroe Ayah kamoe sinan sulotan

Ayah ulon tuanku droe Aduen adoe dua gop nyan Sidroe doli ngo lon peugah Mula Fasyah nan sulotan

Mat keurajeuen he meukuta Peulinggoe Pura nan nanggroe nyan Bak siuroe po meukuta Gop peuhaba bak lon tuan

Meungkawali adek kamoe Treb ka jinoe lam sukaran Ban lon deungo meunan haba Lon jak lanja he jonjongan 'Oh troh keudeh patek hamba Lon eu nyata lam sukaran Ka meuthon dalam peunjara Makanan hana jimakan Uroe malam jimoe bae Seubab judo jih ka hilang Baro 'oh nan putroe peugah Banta reubah laju yoh nyan Gadoh ingat banta indah Neudeungo gah putroe intan Ruhon Afda hireuen tahe Jieu laku cut bangsawan Teuka sosah bungong pade 'Oh meugule banta seudang Ya Tuhanku pakon meunoe Peue bala nyoe ateueh intan Teuma teuingat bungong kundo Jicok laju cumboi intan Jipeuduek bak hidong banta Lalu jaga bungong peukan Nibak pangsan lalu jaga Sro ie mata basah badan Teuma marit po sambinoe Pakon meunoe po jonjongan Peue na salah po meukuta Ubak hamba neupeugah trang Tajul Muluk jaweueb keunong Bek tatanyong wahe intan

Meuna gaseh tuan putroe Haba bunoe lom takheun ban Putroe peugah teuma sigra He meukuta deungo laman Lon dom sinan dua uroe Teuma lon woe he jonjongan Na sikhan rot baro lon woe Ateueh kamoe bala datang Ka teukeudi Tuhan sidroe Jidrop kamoe le jen hitam Jicok ulon laju sigra Keunoe jiba dalam hutan Nama ulon Ruhon Afda He meukuta geurasi nan Nyang adek lon Meungkawali Peurmaisuri bunda laman Ka lon peugah awai akhe Saleh pakri he jonjongan Tajul Muluk laju seuot Lon nyoe patot cahya intan Ngo lon peugah he sambinoe Di lon nanggroe Syarikatan Zainul Muluk nama raja Nyan ayahda ulon tuan Nama ulon Tajul Muluk Bungong tajok deungo beutrang Meungkawali bungong kundo Nyankeuh judo ulon tuan

Sampoe keunoe ulon lalo

Pie laku po ma intan Teungoh marit bungong kundo Ie mata ro basah badan

Meuna tulong bungong pade Bek roh neubri apon badan Ruhon Afda jikheun meunoe Bek le neumoe po jonjongan Meung ek leupah lam bahya nyoe Lon peujaroe putroe intan Meunan jikheun Ruhon Afda Seuot banta teuma nyoe ban Wahe putroe bungong tanjong Tuhan tulong nibak setan Meuna umu bungong sukon Bahle buet lon ngon jen hitam Meunan narit banta deelat Hekeumat neucinta rijang Neucinta saboh hekeumat Deungon siat guda datang Raja guda keunan ka trok Tajul Muluk neuek yoh nyan Deungon putroe bungong tajok Banta peuduek dihadapan Banta giduek guda hekeumat Jipo leugat dalam awan Guda jipo pantah sangat Bungong riwat di ateueh nyan Deungon putroe Ruhon Afda Laju bungka rot lam awan Seupot uroe watee asa Jen jigisa woe lam taman 'Oh troh jiwoe dalam rimba Jieu hana putroe sinan Jimita le keudeh keunoe Di jen pindoe sosah han ban

Tan meuteumeung sinyak putroe Sosah han soe di jen setan Teuma leumah dalam dada Putroe muda ka gop tawan

Meunan jikheun jen afeuret Mata jipet tatkala nyan Leumah jieu bungong rusep Deuh meulep-lep dalam awan

Sare leumah jieu putroe Hate seungkoe jen adeurang Teuma jikheun haba meunoe Tulong kamoe wahe Sudan

Meuntroe Sudan seuot sigra Di jeumala angkat tangan Ampon meuah po meukuta Bek le rugha he sulotan

Ulon nyang cok tuan putroe Tuanku droe bek sosahan

Ureueng nyang ba kupoh mate

Neueu doli yoh lon tawan

Neubri idin po meukuta Ulon bungka jioh jalan Raja deungo haba meuntroe

Dum geupasoe dalam badan

Cok ngon alat mat di jaroe Jipo jinoe rot lam awan Padumna trep jipo sunggoh

Hingga ka troh bak bangsawan

Tajul Muluk kalon rupa Nekheun sigra bak cut intan Wahe putroe bintang kala Jeh ka teuka jen meukawan

Jitueng gata laju jinoe Jipoh kamoe he cut intan Bak lon ingat he cut putroe Uroe nyoe peusambot badan Wahe putroe bungong pade Lon mupake ngon jen setan Lon jok nyawong ubak Rabbi Adat matepi lon paban Meunyo jicok bungong pade Udep mate lon relaan Meukon meunan han meusampe Hana meuri bangsa ensan Wahe putroe bungong kipah Nyoe kupiah boh bak badan Boh bak ulee jinoe laju Bek deueh jieu le jen setan Mubek leumah po sambinoe Ulon teunyoe jeuet barang ban Meunan narit banta muda Ruhon Afda sosah han ban Jitakot that keu jen pari Saleh pakri 'oh troh keunan Jipoh mate po samlakoe Jicok kamoe teuma lheueh nyan Putroe jimoe hate rugha Ro ie mata basah badan Tajul Muluk neukheun sigra Putroe muda bek syugolan Tuhan kada bungong pade Bek tamoe le bungong peukan Putroe deungo meunan ulah Cok kupiah seuon rijang

'Oh lheueh putroe ngui kupiah Han le leumah bak jen setan Na sikeujap teuma akhe Keunan troh le meuntroe Sudan Tajul Muluk neutanyong le Kadeungo he meuntroe hewan Peue na hajat peugah jinoe Wahe meuntroe nyang analan Meuntroe Sudan jaweueb meunoe Kadeungo nyoe wahe ensan Hoka kaba sinyak putroe Kacok bunoe dalam taman Putroe jiduek lam meuligoe Troh kah sidroe kajak tawan Meuntroe Sudan su meudhot-dhot Hana patot buet kah meunan Nyang got peugah jinoe laju Bek kueumpu nyawong simpan Meuhan pulang bungong meulu Peugah laju gata soe nan Adat mate kah uroe nyoe Ka kutusoe nama ensan Adat teukeudi nyawong sampoe Mangat-meusoe kah sulotan Meunan Sudan tuto seungkoe Po samlakoe jaweueb yoh nyan Na kadeungo wahe meuntroe Ulon teunyoe aneuk sulotan Tajul Muluk nama hamba Aneuk raja Syarikatan Di yup langet ateueh bumoe Nyoe raja nyoe nyang pahlawan

Cit geuthee na Tajul Muluk Jitupeue trok jeueb sulotan Bak raja kah han jituri Aneuk doli Syarikatan Meuhan keunoe kupeureugi Cut putroe ti kujak tawan Nama ulon ka katuri Di kah pakri soe geuhei nan Jipeugah le teuma sigra Di lon nama meuntroe Sudan Jen afeuret nama raja Cit geuthee na jeuep-jeuep alam Nyang jeuet keunoe ulon teuka Lon jak mita putroe intan Neuyue jak tueng uleh.raja Nyang kah bawa wahe ensan Pulang jinoe bek le lama Lon meung gisa bak sulotan Tajul Muluk seuot sigra Peue ri haba meuntroe Sudan Bek deungon lon jak meuseunda Tajak gisa keudeh rijang Pajan tajok putroe muda Nyang jeuet gata lakee pulang Nyang got jinoe tajak gisa Peutroh haba bak sulotan Peugah beutrok ubak raja Tayue teuka bak lon tuan Meunyo gata han meumada Deungon raja sabe padan Hana patot batee kaca Ngon teumaga tapeulawan

Jeuet keu rusak muploh bara Laba hana saboh cawan Adat mate kah he meuntroe Sia kamoe payah badan Miseue kupoh saboh asee Jeuet keu malee deungon rakan Raja di kah nyang kreueh ulee Meunyo ngon kee sabe padan Kareuna jih meugah raya Beuthat raja biek jen hutan Meuntroe Sudan beungeh raya Tuto gasa bak bangsawan Wahe ensan nyang ceulaka Peue ro haba kameukalam Hana patot meunan tuto Han got laku meunyo ensan Jinoe nyang got bek le tuto Bungong kundo pat kasimpan Bunoe kon na sama-sama Jinoe hoka wahe ensan Hana kueu putroe muda Kucok hana peue kupulang Meutan kucok peue kalakee Hana malee kah binatang Meunan narit Tajul Muluk Hate murok meuntroe Sudan Jilumpat le keunan ka trok Bungong tajok laju jicang Hana keunong bungong tanjong Neugrop lambong pantah han ban Neusuet peudeueng dalam sarong Meunoe neukheun cut bangsawan

Wahe peudeueng ranteng kayee Katulong kee wahe teelan Hai peudeueng bek kabri malee Kupoh sitree jen edeurang

Lheueh nibak nyan bungong tanjong Neugrop lambong ateueh setan Neutak keunong jroh meurancong Keunong bak lhong putoh meukhan Teutap mate laknat Allah Gadoh tuan ngon cut intan Mangat hate banta indah 'Oh ka reubah meutroe Sudan Laen bandum habeh sampoe Tinggai peuet droe plueng teureuban Jipo pantah hana bagoe Keudeh jiwoe bak sulotan 'Oh troh keudeh angkat jaroe Ampon kamoe po jonjongan Gajah jithat hana bagoe Sudan meuntroe ka jisimpan Habeh umu han le hayat Wahe deelat putoh meukhan Jen afeuret ka jilumpat Ngui ngon alat nibak badan Bahle ngon kee sigo jici Mangat meuri bangsa ensan 'Oh ka cukop nibak asoe Jipo jinoe dalam awan Sajan rakyat wadi meuntroe Dum sinaroe jibeurjalan Sira jijak meunoe pike Kupoh mate bangsa ensan

Nyang di rakyat han peue tanyong Jigrop lambong dalam awan Surak deumpek that meutaga Bak jisangka ek jisimpan Ladom jiba tungkat beusoe Nibak jaroe ka jitatang Ladom taeu jiba beude Jipo sare dalam awan Bak masa nyan banta muda Laju bungka rot lam awan Teungoh bungka po jroh rupa Troh le sigra jen meukawan Banta kheun bak putroe muda Bek that lanja tabeurjalan Jeh takalon jen ceulaka Lom ka teuka dum meurumpan

Jinoe nyang got po jroh rupa Tangui sigra kupiah nyan Bek deuh jieu cut sambinoe Ulon teunyoe jeuet barang ban Meunan narit banta ahli Cut putroe ti ngui peukaian Bak uroe nyoe lon mupake Ngon jen kafe wahe intan Cok kupiah ngui bak ulee Bungong keumbee gaeb rijang 'Oh ban gadoh bungong keumbee Jen meuree-ree ka troh datang Leumah jieu banta muda Jidong lingka jroh meurumpan Taeu jidong jroh meupadoe Siribee droe bak bilangan

Han deuh jieu tuan putroe Sapat ngon droe banta seudang Ka jiapet rot deh rot noe Jieu putroe tan le sajan Saket hate hana bagoe Tuan putroe jieu ka tan Teuma jikheun haba meunoe Deungo kamoe wahe ensan Hoka kaba putroe siti Kah jak taki putroe seudang Hana patot seukali-kali Cut putroe ti kajak tawan Bungong jumpa nyang mangat bee Lhat bak ulee baranggajan Teuma beudoh bungong keumbee Biek jen sitree laju neucang Neusuet peudeueng banta areh Neucang habeh seukalian Neucang keunoe jigrop keudeh Bit that paleh jen edeurang Ladom keunong bak tangkurak Ka teukeupak sinan ceukang Ladom meukhan putoh neutak Sangat rancak banta seudang Tajul Muluk neupet mata Neucang lanja hantu setan Le that mate jen ceulaka Buet cut banta nyang analan Bak bilangan leubeh laksa Nyang ka pana seukalian Jen afeuret beungeh raya Rakyat dumna habeh simpan

Peukeumah droe jen nyang raya Tan jikira le barangban Jilumpat le keunan sigra Ateueh banta nyang analan Leumah jieu po samlakoe Guda raghoe neumeukandran Jen afeuret beungeh tuloe Dumpek tanggoe su lam awan Hoka kasom aneuk kamoe Sinyak putroe kajak tawan Kupoh mate kah uroe nyoe Han thee keudroe bangsa ensan Tajul Muluk jaweueb pantah Peue kapeugah wahe setan Han kutakot keu bangsa kah Peurab pantah nak kutuban Jen afeuret beungeh raya Jingo haba cut bangsawan Dalam babah jen ceulaka Apui meunyala keuluaran Hu ngon apui meujeureulah Banta indah tutong badan Tajul Muluk neuteupok pha Ujeuen raya teuka rijang Sret le ujeuen that meutaga Apui raya laju padam Apui ka len deungon siat Jen maken that beungeh yoh nyan Nibak jaroe jitiek tungkat Gunong leugat teudong keunan Tajul Muluk pi that cakap Gunong meuhat neupoh rijang

Gunong hanco jeuet keu sira Jen ceulaka beungeh han ban Jipeurab le keunan sigra Cokma raya nibak tangan Tajul Mulukjipoh laju Meu'u-'u ban reudok datang Banta neugrop na sigeutu Cokma lalu leupah jalan Hana keunong bungong keumbee Di jen asee beungeh han ban Tajul Muluk neukheun lagee Hana malee kah binatang Han peue uji meunyo ngon kee Jinoe kathee bangsa ensan Neugrak peudeueng ranteng kayee Neucang sitree biek jen hewan Han jan jigrop jimeusilee Pantah lagee kilat beuklam Neutak keunong bak tangkurak Beukah mubhak le meutimphan Sinan mate le teukeupak Gadoh rancak hantu setan 'Oh ka mate jen ceulaka Banta bungka laju rijang Deungon putroe Ruhon Afda Ateueh guda neumeukandran Padum lawet jipo sunggoh Hana piyoh uroe malam Troh bak nanggroe Taman Paridoh Bungong iboh piyoh sinan Teuma marit po sambinoe Deungo kamoe po jonjongan

Tinggai tuanku dilee sinoe Bahle lon woe bak sulotan Meunan narit Ruhon Afda Jiwoe lanja teuma lheueh nyan Troh u numoh bintang kala Bak ayahda sujud rijang Raja kalon woe aneukda Sro ie mata han muban-ban Bu meutuah cahya mata Pajan gisa aneuk badan Seuot putroe teuma sigra He ayahda nyoe baro ban That meutuah cahya mata Ayahda han apon badan Meuteumeung eu tangke nyawa Padum lama ka jitawan Soe nyang puwoe bintang kala Peugah sigra bak lon tuan Jaweueb putroe nyang jroh rupa He ayahda ngo lon kheun ban Sidroe ureueng manusia Indah rupa hana lawan Hana sidroe ngon tapeusa Sang meutia kulet badan Gop nyan nyang cok daíam rimba Ngon jen raya geumeulawan Geumuprang ngon jen ceulaka Siploh laksa jen teureuban Geumuprang lam awan miga Rakyat raja habeh simpan 'Oh lheueh mate jen seumua Geucok hamba teuma rijang

Hingga ka troh lon geupuwoe Le samlakoe nyang bangsawan Jeh pat jinoe na di lua Hana lon ba keunoe sajan Meunan narit Ruhon Afda Jaweueb raja nyang analan Raja neukheun ubak meuntroe Deungo kamoe seukalian Jak tueng keunoe po juhari Hana meukri tinggai sinan Jibeudoh le meuntroe wadi Ka jiili laju yoh nyan 'Oh troh keudeh dum sinaroe Bak samlakoe nyang analan Mubri saleuem mumat jaroe Wadi meuntro seukalian Teuma beudoh sidroe meuntroe Nyang that raghoe dalam kawan Bri horeumat keu cut banta Ban nyang kada adat reusam Lheueh nyan meuntroe peugah haba Ampon hamba po jonjongan Bandum kamoe suroh raja Bak meukuta deelat laman Poteu raja di meuligoe Kamoe keunoe neuyue jalan Neulakee langkah uleh raja Deungon hamba jinoe sajan Teuma seuot banta muda Ban nyang sabda bak jonjongan Ban nyang hajat po meukuta Hana dawa nibak laman

Insya Allah he syeedara Sama-sama tabeurjalan Meunan narit banta muda Beudoh sigra teuma yoh nyan

Sajan rakyat dum seureuta

Ireng raja nyang pilehan

Hingga sampoe dalam kuta Po jroh rupa piyoh sinan

Ateueh bale meupeurmata Bintang kala neuek keunan

Meuteumeung le deungon raja

Bandua geumumat tangan

Tajul Muluk nyang samlakoe Neucom jaroe po jonjongan Raja sambot laju pantah Beu meutuah batee intan

Wahe aneuk bungong rambot Lon meuniet sret buleuen bintang Ngon usaha po samlakoe Ek tapuwoe aneuk laman

Adat meukon tulong gata Ta meugisa suntok zaman Teutap sinan dalam rimba Suntok masa keususahan

Ulon sinoe apon han soe Ka troh tawoe cut analan

Sang aneuk tapulang nanggroe

Meunan keu proe bak lon tuan

Banta teuduek bak keurusi

Meuseundi batee pualam

Hana sapeue jaweueb neubri Raja puji di hadapan

Lheueh nyan ranup lom ka neubri

Banta ahli sambot rijang Banta pajoh ranup sigapu Jibeudoh hu cahya badan

Teungoh marit raja doli Ka troh jime le hidangan Peuduek laju u keue banta Ban nyan kada muliaan

Laen bandum wadi meuntroe Raja nanggroe bri makanan Cukop hase sianeka Poteu raja marit yoh nyan

Dua jaroe di jeumala He aneukda batee intan Makeuen aneuk peue nyang mudah Nanggroe ayah jeuoh peukan

Tabeue masen bek peue takheun Lon lam uteuen wahe intan 'Oh lheueh makeuen bandum hase Geupinah le dum hidangan

Geuboh ranup dalam bate Geubeuot le keu bangsawan Banta pajoh ranup sigapu Teuma meusu po jonjongan

Ubak meuntroe sabda raja Ngon bentara bandum sinan Na tadeungo wahe meuntroe Rakyat nanggroe dum tapeusan

Tayue jitren dum sinaroe Jeuoh ngon toe seukalian Keunoe bandum tayue teuka

Hajat hamba meupeurasan

'Oh lheueh titah nibak raja Banta muda puwoe yoh nyan Peuek laju u istana Poteu raja that sukaan Peurmaisuri di meuligoe Po samlakoe peurab keunan Tajul Muluk nyang bahgia Seumbah bunda gaki tangan Putroe sambot pantah sigra Peumulia cut bangsawan Peurmaisuri neukheun pantah Bu meutuah aneuk badan Sijuek hate lon han tara 'Oh na gata wahe intan Beu selamat bintang kala Wahe banta nyang analan Meunan narit peurmaisuri Duek piyoh le teuma sinan Teuma troh le Ruhon Afda Dengon banta marit yoh nyan Wahe adek bungong riwat Nyoekeuh teumpat di lon tuan Ka troh tajak teumpat kamoe Wahe adoe cahya intan Bek na peue kheun po samlakoe Nanggroe kamoe rimba Tuhan Kru seumangat wahe cuda That mulia bak lon tuan Nibak cuda na cit dumnoe Di ulon nyoe sapeuepi tan Keunoe ka troh ubak cuda Nyang lon ba pha ngon tangan

Gadoh malee he cuda droe Cit ka meunoe nasib badan Meunan narit banta muda Seuot sigra putroe intan Wahe adek bungon geutoe He samlakoe bek kheun meunan Han soe balah guna gata Dałam donya tan teuladan Gampong nanggroe lon bri keu yum Han cit sadum ngon guna nyan Taniet adek rumoh kamoe Sang rumoh droe wahe intan Meunan narit putroe muda Cut banta ka tahe heran Peurmaisuri teukab jaroe Tahe keudroe hireuen mandang Bandua droe hireuen hate Han troh pike ngon seunuban Bak neusangka bungong kundo Jeuet keu judo putroe intan Tan neutupue bintang kala Meusyeedara dua gop nyan Jimeuseubot aduen adoe Bandua droe jiubah han Peurmaisuri deungon raja Gop nyan dua sosah han ban Lheueh nyan teuma raja deelat Neubri teumpat nyang analan Dalam taman indah han soe Po samlakoe geuba keunan Cok biula mat di jaroe Geunap uroe laloe ngon nyan

Geunap uroe syae panton Akhe ngon phon jroh lakuan Soe nyang deungo reuloh hate Meungkawali geuseubot nan Teutap sinan Tajul Muluk Laloe mabok ngon peurasan Jinoe laen lon peugisa Putroe muda nyang analan That meusyeuhu jeuep-jeuep nanggroe Meugah kawoe bungong peukan Jitren rakyat jeuoh ngon toe Bungong jaroe jiba sajan Meunan sabe geunap uroe Asoe nanggroe troh meurumpan Padum lawet akhe masa Peulinggoe Pura troh habaran Ruhon Afda meugah ka woe Ubak putroe ibu intan Hamilah Katon jikheun meunoe Ampon kamoe po jonjongan Ruhon Afda ka troh jiwoe Idin kamoe jak kalon ban Mula Fasyah jaweueb meunoe Idin kamoe he cut intan Lagi kon gop bungong meulu Bah tajak eu aneuk badan Hingga beungoh le ngon uroe Wadi meuntroe neuhei yoh nyan Meusapat le dum sinaroe Imum sagoe huleebalang Cukop hase deungon alat Ban nyang babat meuatoran

Teuma meugah bak Meungkawali Deungon umi meung beurjalan Bak masa nyan bungong pade Trep ka lawi dalam tahan Gaki jaroe keunong rante Jimoe sabe bungong peukan Han tom teungeut po jroh rupa Pijuet raya ka ngon badan Bak uroe nyan po sambinoe Jingo bunyoe gop peugah ban Ruhon Afda ka troh jiwoe Ubak nanggroe ayah laman Hamilah Katon umi putroe Singoh uroe meung beurjalan Meujak kalon putroe muda Baro gisa bak jen setan Meungkawali deungo meunan Hate seunang han meuban-ban Rindu hate hana tara Jak eu cuda baro pulang Bak dendayang putroe peugah Tajak pantah he da badan Tajak he da ubak ayah Tapeugah haba lon tuan Lon deungo gah cuda ka woe Bak uroe nyoe lon beurjalan Lon meung jak eu da boh hate Trep that ka cre ngon lon tuan Meuna idin bak ayahda Jinoe sigra lon beurjalan Meunyo hana idin doli Bahle mate lon lam tahan

Hana guna lon udep le Mangat meusampe he da badan Meunan haba Meungkawali Dendayang le beudoh rijang 'Oh troh keudeh ubak doli Jipeugah le narit intan Di keue putroe Hamilah Katon Meunoe jikheun le dendayang Deelat ampon po meukuta Patek hamba peusurohan Seumbah sujud putroe muda Hajat cinta keu jonjongan Keumeung jak eu Ruhon Afda Nyang ban gisa dalam hutan Rindu hate putroe muda Jak eu mata cuda badan Nyankeuh haba ampon doli Idin neubri he jonjongan Hamilah Katon seuot sigra Di jih cit ka deungon ensan Keupeue laen hajat cinta Manusia di jih wadan Mula Fasyah jaweueb neubri Jinoe bahle jibeurjalan Nyang leubeh jroh po sambinoe Bak uroe nyoe taba sajan Meukon meunan he cut putroe Teulah dudoe he cut intan Meunan narit raja nanggroe Dendayang woe pantah rijang 'Oh troh ubak Meungkawali Jipeugah le haba sulotan

Meuah ampon cut sambinoe Ka troh lon woe wahe intan Ka neuwasiet ubak hamba Po meukuta neuyue peusan Wahe po cut bungong jeumpa Bek neuhawa le keu ensan Bek neugalak manusia Po jroh rupa kheun sulotan

Meung neupateh bungong pade Cit jinoe le neuba sajan Teuma jaweueb putroe muda Hana dawa bak lon tuan Meunan narit po jroh rupa Dendayang ka beudoh rijang jijak peugah ubak raja Ban nyang haba putroe intan Awai akhe ka jipeugah Mula Fasyah marit yoh nyan He dendayang tajak gisa Tayue buka pinto tutopan Tayue teubiet Meungkawali Bek tinggai le dalam tahan "Oh lheueh titah raja nanggroe Sinyak putroe buka yoh nyan Jak bak ayah putroe muda Dan bak bunda dua sajan 'Oh lheueh seumbah ayah ngon umi Tren jak mandi bungong peukan 'Oh lheueh manoe bungong keumbee Ek,u juree teuma rijang Teuma jiduek sajan bunda Po jroh rupa nyang analan

Lheueh nyan marit peurmaisuri Idin neubri po jonjongan Jinoe laju lon peureugi Meungkawali lon ba sajan

Teuma seuot raja nanggroe

Idin kamoe he cut intan Akan teutapi bungong riwat Ingat beuthat judo badan

Meungkawali aneuk dara Ingat gata bek cre sajan Kareunajih hate rugha Jicinta keu bangsa ensan

Soe tube thee putroe indah Jimeulangkah lam-lam hutan Jijak laju ho langkah ba Malee gata putroe intan

Meunan narit raja nanggroe Tuan putroe kabui yoh nyan Lheueh nibak nyan laju beurangkat Deungon rakyat seukalian

Inong agam dum peureugi Meungkawalipi na sajan Han padum trep teuma dudoe Troh le sampoe geubeurjalan

Troh u nanggroe Taman Paridoh

Geumupiyoh seukalian Teuma meugah u meuligoe Bak cut putroe nyang analan

Meugah ka troh Meungkawali

Deungon umi dua sajan Deungon rakyat dum sinaroe

Bineh nanggroe piyoh sinan

'Oh ban meuthee ubak raja U istana neuek yoh nyan Raja peugah bak esteuri He putroe ti nyang analan Meugah ka troh peurmaisuri Meungkawalipi na sajan Tayue jak tueng laju sigra Ubak maja tapeugah ban Wahe ma po deungo kamoe Jak tueng keunoe putroe intan Maja deungo haba putroe Beudoh jinoe hei ngon rakan Boh ngon ranup dalam karah Maja langkah laju yoh nyan 'Ohtroh ubak putroe muda Po nek maja neukheun nyoe ban Kru seumangat puteh leusoh Meuh seuneupoh nyang analan Tho ngon ranup dalam bungkoh Lon preh-preh troh putroe intan Uroe malam lon meuteuoh He putroe jroh seulamat datang Bu meutuah bungong meulu Han tom lon eu cut bangsawan Nyoe baro troh lon eu rupa Meuah deesya ngon lon tuan Tanoh di blang pula pade Tanoh di gle pula lawang Wahe putroe panyot kande Bek trep lawi piyoh sinan Keudeh beutroh u meuligoe Jak eu putroe cut analan

Han got lagee gop kheun laku Bungong meulu trep di sinan Tamong po cut dalam kuta Jak eu cuda baro pulang

Meunan narit po nek maja Putroe muda tahe heran Hamilah Katon jaweueb sigra He nek maja jroh analan

Insya Allah he nek teungku Jinoe laju lon beurjalan Lheueh nyan teuma po nek maja Peutamong lanja seukalian

U istana troh le sigra Ban nyan kada meuliaan 'Oh troh keudeh dum seumua U istana geuek rijang

Meungkawali nyang jroh rupa Seumbah cuda gaki tangan Ruhon Afda putik sukon Hamilah Katon seumbah yoh nyan

'Oh lheueh seumbah keudeh keunoe Po sambinoe piyoh sinan Duek bak teumpat intan pudoe Sinyak putroe nyang analan

Hingga seupot le ngon uroe Geubot jinoe le hidangan Cukop hase sianeka Po nek maja neukheun yoh nyan

Ampon po cut bungong jeumpa Di jeumala dua tangan

Kureueng meujeulih kamoe rimba

Nibak maja he cut intan

Tacok ie jok peugot halua Asoe kaya teumon manisan Makeuen po cut bu ngon sira Teumpat maja jeuoh peukan Tabeue masen bek peue takheun He cut buleuen bungong rihan Deungo po nek peugah haba Khem teurtawa putroe intan Sira neukheun Meungkawali Neujaweueb le meunoe macam Bek le hai nek peugah haba Neuduek sigra keunoe sajan Po nek maja le that tuto Bak meuato utoh han ban Maja deungo haba putroe Neuduek le toe ngon cut intan Buka sahab meuceuradi Cok seurahi neusrah tangan Hingga cukop dumpeue hase Geumakeuen le seukalian 'Ohlheueh makeuen ka seuleusoe Pinah dudoe le hidangan Ampon po cut kheun nek maja Hajat cuda bungong keumang Neugade langkah u istana Bek trep lama he buleuen trang Putroe deungo haba maja U istana ek le rijang Geupiyoh le sapat dua Deungon cuda dua sajan Ruhon Afda buka tuto He adek e bungong peukan

Pakon adek pijuet tuboh Sang-sang sunggoh keudukaan Asoe han le muka pucat Peue na hajat adek badan Miseue ureueng tunu hate Sang-sang ka cre seukalian Meunan bangon lon eu rupa Kadang cit na keusalahan Teuma seuot Meungkawali Bek Allah bri cuda badan Hana cuda di lon salah Peue neupeugah keu lon tuan Han tom lon eu ureueng lakoe Dalam nanggroe suntok zaman Wahe adek bungong puteh Hanlon pateh bungong peukan Beuthat takheun meunoe meudeh Han lon pateh adek badan Le that tanda ulon lihat Jeuep-jeuep teumpat keunyataan Hana cuda di lon salah Cit lam dasyah suntok zaman Bek neupateh haba peusuna Wahe cuda nyang budiman Wahe cuda putik langsat Na peue hajat ulon tuan Napsu ulon keumeung tanyong Kheun beukeunong cuda badan Padum na trep dalam huteuen Cuda neukheun bak lon tuan Ho rot neuwoe da meutuah Pakri ek leupah bak jen setan

Teuma seuot Ruhon Afda He adekda deungo laman Teungoh lon duek di istana Troh le teuka sidroe ensan

Rupa indah kon sigeutu Soe nyang na eu reubah pangsan Muda seudang that samlakoe Hana sidroe na teuladan

Lagi gagah ngon beurani

Le that sakti ngon seunuban 'Oh troh geuek u meuligoe Ubak kamoe geukheun rijang

Wahe putroe cahya mata Peue bu bangsa gata intan Ayah umi soe geuhei gla Putroe muda soe saleh nan

Teuma lon kheun he adek beh

Taman Paridoh nanggroe laman Ruhon Afda nama kamoe Yoh di nanggroe ayah boh nan

Ulon teunyoe bangsa pari Meungkawali adek laman Bak siuroe lon peureugi Meurumpok le deungon setan

Jidrop ulon bak rot raya Keunoe jiba dalam hutan Padum uroe lam awan hijo Jiba laju patek laman

Meuna gaseh po meukuta Neucok hamba bak jen setan Bek lam huteuen suntok masa He meukuta gaseh sayang

Teuma lon tanyong he adekda Po meukuta soe geuhei nan Pat bu nanggroe po meukuta Ubak hamba neupeugah ban Teuma geukheun ubak kamoe Ulon teunyoe bangsa ensan Nama ulon bek tasudi Nama neugri Syarikatan Teuma geucok ulon sidroe Geuba jinoe rot lam awan Peuduek ateueh guda hekeumat Sakti le that adek badan Kamoe meujak na sikhan rot Ka jiseutot le jen setan Muploh ribee hantu seutot Ureueng got-got dum pahlawan Ngon kuasa Rabbon Kade Habeh mate dum geusimpan Deungon tulong gop nyan sidroe Troh geupuwoe ulon tuan 'Oh troh keunoe Taman Paridoh Geupiyoh bak bineh hutan Geuyue woe lon bak ayahda Ulon maba gop nyan sajan Han geutem jak he adekda Geumeudawa meunoe meunan 'Oh han ek le ulon maba Lon woe lanja adek badan Tinggai gop nyan sajan guda Saleh hoka lheueh nibak nyan Teuma seuot Meungkawali He cuda ti pakon meunan

Hana patot han troh neuba Dumnan guna he da badan Geucok cuda dalam gunong Geujok nyawong ubak Tuhan Adat meukon gop nyan puwoe Sampoe dudoe mantong sinan Ibu bapak han taeu le Hingga mate dalam hutan Dumnan guna manusia Han ek cuda na balasan Bit nyo cuda hana tuah Neupeuleupah geubeurjalan Adat tajok kuta nanggroe Han cit sampoe ngon guna nyan Adat meung lon he da bungong Bahle nyawong geuba sajan Lon peutamong lam istana Bak ayahda lon peugah ban Meunyo bit-bit han geutem jak Sitapak han lon cre sajan Beukit geupeugot baranggakri Han lon weh le he da badan Bit nyo cuda han got basa Tan seutia meunyo meunan Meunan jikheun Meungkawali Seubab hate that dukaan Teungoh marit bungong pade Ka teungeut le dua sajan Hingga beungoh le ngon uroe Beudoh putroe nyang analan Geujak u mon po sambinoe Geujak manoe dua sajan

'Oh lheueh manoe bandua droe Geungui jinoe le pakaian Teuma marit Ruhon Afda He adekda deungo laman Wahe adek bungong jeumpa Jak udehta dalam taman Le that bungong sinan jroh-jroh Hana saboh nyang sa ngon nyan Hijo biro kuneng mirah Bee mupeuah hana lawan Bak bungong he adek droe Dalam nanggroe tan teuladan Dalam rimba ulon puwoe Jak sambinoe takalon ban Meunan jikheun Ruhon Afda Po jroh rupa seuot yoh nyan Bit na cuda ban neupeugah Sang beurakah cuda badan Kon hai adek lon meuseunda Sabet beuna ban lon kheun ban Meunyo hana ban lon peugah Nan taubah ulon tuan Ruhon Afda meunan rawi Meungkawali beudoh yoh nyan Geujak laju bandua droe Hingga sampoe ubak taman 'Oh troh keunan po sambinoe Deungo bunyoe indah han ban Meujan-jan ban su biula Na siat ka suara ensan Na siat sang buloh meurindu Soe deungo su ladat han ban

Sikeujap sang ureueng bae 'Oh tadeungo teuka sayang Suara gambang syae panton Akhe ngon phon jroh lakuan Meungkawali teudong tahe Ie mata ro basah badan Gadoh pike Meungkawali Dumnan bunyi dalam hutan Jitanyong le teuma sigra Wahe cuda peue meusu nyan Teuma seuot Ruhon Afda He adekda tan lon tuban Han tom nyang ka meunan bagoe Bak uroe nyoe lon deungoran Baroe nyang na he adekda Ureung gila geujak keunan Bek le tajak bungong jeumpa Geupoh gata le ureueng nyan Meunan jikheun Ruhon Afda Putroe muda seuot rijang Di lon cuda hana lon woe Mangat bunyoe lon deungoran Bah lon jak eu siat jinoe Ureueng sidroe lon takot tan Galak hate lon cuda beh Bahle beutroh lon jak keunan Ruhon Afda jaweueb meunoe Di lon kuwoe adek badan Han lon jeuet jak keunan rab toe Geupbh kamoe le ureueng nyan Ruhon Afda laju gisa Pura-pura peutakot nyan

Meungkawali jikheun meunoe Beuthat neuwoe cuda intan Bahle lon jak keunan sidroe Adat rugoe pi lon paban Jijak laju putroe buleuen Wie ngon uneun tan jipandang Teutap putroe jijak lanja Lon calitra banta seudang Tajul Muluk lon hareutoe Sinan sidroe dalam taman Hana sapeue teuingat le Bungong pade sosah han ban Syae panton nyan di babah Neukisah keu putroe intan Neuseubot nan Meungkawali Malam hari tan lupaan Bak uroe nyan teungku ampon Syae panton indah han ban Deungo teelan ulon rawi Panton doli nyang mulaan Bismillah ngon nama Allah Alhamdulillah pujoe Tuhan Muhammadon Rasulullah Lon paban bah nasib badan Puteh-puteh bungong giri Kasturi ngon bungong peukan Wahe putroe Meungkawali Han ingat le keu lon tuan Dumnan ulon lam seungsara Di gata meung hiropi tan Bukon sayang bungong meulu Sret meutabu soe pileh tan

Teugo bunda peutroh napsu He cut meulu gata bek meunan Bukon sayang bungong jeumpa Geujak mita jeuep-jeuep peukan Ya Ilahi Tuhan kaya Putoh asa ulon tuan Di laot na kapai raya Keumeung bungka u Beulawan Pakon lupot putroe muda Han troh teuka bak lon tuan Wahe Tuhan Po Nyang Esa Neubri teuka putroe intan Rindu hate lon han tara Ya Rabbana apon badan Tajul Muluk meunan haba Ngon ie mata sret meurumpan Teungoh bae po samlakoe Sinyak putroe pi troh keunan Yoh nyan putroe tahe gante Malee sipu bungong rihan Jikeumeung jak malee mata Keumeung gisa han meukri ban Dalam hatejih that murok Tajul Muluk nyang meusu nyan Adat meukon po samlakoe Pakon kamoe geuteuoh nan Meunan leumah dalam hate Bungong pade susah han ban Ya Tuhanku Rabbon Kade Neupeulahe bak lon tuan Teuma pike bungong meurak Bahle lon jak keunan rijang

Kadang cit nyo po meukuta Bah lon buka ngon pakaian Jijak laju putroe buleuen Troh bak rinyeun laju keunan Jiek laju bungong tajok Tajul Muluk cit ka meunan Bit ka leumah po samlakoe Goh cit meusoe bak pandangan Seubab banta teungoh keudroe Teungoh neumoe po bangsawan Tumpang ulee bungong husen Nap ho laen bak masa nyan Hana neuthee bungong rambot Dong di likot putroe intan Tatkala nyan Meungkawali Ka jituri po bangsawan Peurab laju putroe siti Com bak gaki po jonjongan Tajul Muluk ka teukeujot Sang-sang peue sret ateueh badan 'Oh ban neueu po samlakoe Leumah putroe cahya intan Ban neukalon Meungkawali Reuloh hate han meuban-ban Putroe seumbah banta muda Sret ie mata ngon meubram-bram Meungkawali ka jibae He tuanku ampon laman Meuah ampon tuanku droe Ulon teunyoe that salahan Awai akhe lahe baten Neubri idin he jonjongan

Kayee raya jroh hijo on Meuhimpon cicem meukawan Bek neuhaloh nyang salah lon Neupeuampon seukalian He tuanku tangke hate Malam hari lon cintaan Seulawet tan tuanku droe Ulon teunyoe lam dukaan Pie ayah deungon umi Lon geurante gaki tangan Lam peunjara lon geupasoe Malam uroe teutap sinan Ban nyang kheundak Tuhan sidroe Ulon teunyoe that relaan 'Oh lon ingat wahe doli Toe rab mate ulon tuan Kadang ho-ho ka teubade Saleh mate po jonjongan Saleh ka sret dalam laot Ajai mawot syahi alam 'Oh lon ingat han meusampe Got beumate patek laman Keupue guna peutoe kaca Meunyo hana peue tasimpan Keupeue guna udep hamba Meunyo hana po jonjongan Keupeue guna kapai raya Meunyo hana lem kapitan Keupeue guna patek hamba Po meukuta dalam awan 'Oh ka malam lon uem ija Seubab meukuta hana sajan

Pie ayah deungon umi Geuboh doli han meuban-ban Meunan jikheun Meungkawali Po juhari seuot rijang Jak lam paya pot beuramoe Tapuwoe peugot beulacan Pihak ka troh keunoe lon woe Wahe putroe nyo bit meunan Adat jadeh ulon mate Bungong pade that sukaan Jeuet tagantoe ureueng diwa Nyang sa bangsa putroe intan Teungoh u gle pot bungong ta Meukerija bungong tangan Lah na untong udep hamba Nibak baya seukalian Tujoh buleuen dalam laot Riyeuek bapot lon he intan Karonya Po Tuhan Ma'bud Lon teusurut bineh hutan Bukon sayang lon eu awe Pucok mate sret meukhan-khan Wahe putroe bungong pade Bek taweueh le keu lon tuan Tacah tanah pula gapeueh Aneuk tulo breueh tren meukawan Bak uroe nyoe taeu/beudeuh Bek le taweueh lon beurjalan Bukon sayang cicem nuri Ka mate di dalam taman Ulon teunyoe geupoh mate Meungkawali lam dukaan

Jaroe gaki geuboh rante Hana lheueh le baranggajan Po sambinoe sosah hate Hingga mate ngon seubab nyan Nyankeuh lon kheun bungong geutoe Le that rugoe judo badan Adat tatueng lon keu judo Malee sipu putroe intan Ulon teunyoe manusia Ngon diwa han sabe padan Meungkawali aneuk raja Lon nyoe hamba biek teubosan Teulah dudoe po jroh rupa Malee mata nibak rakan Pane ek jeuet batee kaca Ngon meutia tapeulawan Nyankeuh lon kheun bungong pade Beuta pike narit lon nyan Reudok geulanteue kilat muble Ka runtoh gle nanggroe Asahan Seulamat tinggai jantong hate Idin tabri lon beurjalan Meunyo han ek lon theun hate Bahle mate lon lam hutan Lon paban bah meuh seuneupoh Ka meunan roh nasib badan Meunan narit banta muda Ngon ie mata sret meurumpan Meunyo neujak po meukuta Patek hamba neuba sajan Bunda abi han lon weueh le Lon kumate ngon jonjongan

Hana hajat lon meukawen

Raja laen nyang meugahan Deumi Allah deungon Nabi Nyankeuh doli judo badan

Sira marit sira jimoe Jitumbok droe putroe intan Jilungkop droe bak gaki banta Ngon ie mata basah badan

Dumnan di lon po meukuta Rugoe laba lon relaan Tuboh pijuet muka pucat Seubab lon ingat keu jonjongan

Bek antara geuboh rante Adat mate lon relaan Dumnan di lon lon theun hate Ampon doli neukheun meunan

Wahe Tuhan Rabbon Kade Neubri mate patek laman

Teungoh jimoe putroe muda

Ruhon Afda troh le keunan

'Oh sare troh cut sambinoe Jieu adoe that syugolan Teungoh po droe bungong jeumpa Ruhon Afda jikheun nyoe ban

Wahe adek bungong geutoe Bek le tamoe wahe intan Keupeue tamat ureueng lakoe Goh tatusoe he buleuen trang

Bit sinyak nyoe hana malee

Ureueng jamee tajak tawan Peue cit takheun bak lon baroe Hana sidroe nyang cintaan

Teuma seuot Meungkawali He cuda Ti bek kheun meunan Hana malee lon cuda e Nyankeuh judo di lon tuan Sampoe lon duek lam peunjara Keu meukuta lon cintaan Bek antara geuboh rante Adat mate pi lon paban Ka neutupeue cuda bungong Peue neutanyong bak lon tuan Meunan narit bintang kala Ruhon Afda jiiem yoh nyan Tajul Muluk lom peugah proe Wahe putroe cahya intan Bek le tamoe bungong pade Goh lom mate ulon tuan Insya Allah Tuhan neubri Ka meusampe ban cintaan Ban nyang hajat po sambinoe Tuhan sidroe bri sampoekan Tajul Muluk meunan kata Putroe muda jiiem yoh nyan Rotdeh rotnoe mangat hate Han sapeue le keusosahan Na sikeujab teuma dudoe Sinyak putroe jikheun nyoe ban Neubri idin po meukuta Lon jak gisa he jonjongan Deelat ampon tinggai sinoe Ulon sidroe kubeurjalan Tajul Muluk jaweueb bagah Insya Allah judo badan

Jak he judo beu seulamat Bek lupa that keu lon tuan Akan teutapi bungong riwat Sang han mangat meunan macam Bak lon sangka putik sukon Tajak tueng lon putroe intan Hana lon thee po sambinoe Peuleumah droe bak lon tuan Meungkawali teuma seuot Leumah leumbot peurkataan Pakon tuanku hate lupot Ngieng u likot po jonjongan Dumnan di lon po meukuta Na cit haba keu lon tuan Meunan narit sinyak putroe Sira jimoe basah badan Putroe jimoe meusok-meusok Cit lam dawok keulaparan Pakon tamoe bungong tajok Tajul Muluk ka na sajan Takheun tawoe po sambinoe Nibak kamoe tan larangan 'Oh lon ingat po juhari Di gop sakri di lon saban Nyankeuh seubab lon kheun meunoe Kon hai putroe lon beuncian Jak hai judo woe u teumpat Bek trep lambat dalam taman Marah ibu ngon ayauuu

Putroe muda keudukaan

Bek hai judo le tatheun droe Meuraba-raba jeuep-jeuep hutan

Tajul Muluk meunan kata Putroe muda jaweueb yoh nyan Bukon sayang bungong seurunoe Putoh taloe sret meukarang He tuanku payong nanggroe Bek neuhiro buet ka zaman Meung neupeugah sabe-sabe Neupoh mate lon jonjongan Meuhan tuanku habeh pike Han lon woe le gampong laman Ho nyang neujak po meukuta Ulon neuba jinoe sajan Meunan narit Meungkawali Ateueh doli jitiek badan Jiseumpom droe ateueh banta Jimoe rugha putroe intan Tajul Muluk marit meunoe Bek tamoe bungong peukan Jak leh tawoe bungong sukon Bah tinggai lon dalam taman Meuna idin Tuhan Esa Troh lon gisa ubak intan Nyang jinoe bah tinggai dilee Bungong keumbee bek syugolan Meunan narit Tajul Muluk Bungong tajok jimoe kiam Teutap jimoe putroe muda Ruhon Afda marit yoh nyan Wahe adek bungong jeumpa Deungo cuda wahe intan Pakon adek sosah hate Goh lom mate po jonjongan

Jinoe adek nyang meurasa Jak tagisa gampong laman Meuka tawoe bak ayahda Lon bicara lheueh nibak nyan Meuna umu bungong keumbee Banta tathee beuna sajan Lon nyang puwoe po meukuta Bek le rugha adek badan

Meunan narit Ruhon Afda Putroe muda woe le yoh nyan Sira jijak po jroh rupa Di nap banta nyang analan

Tuanku bek paleng muka Ingat guna putroe intan Meung trep neuwoe wahe doli Meungkawali han le sinan

Ulon teunyoe neuniet tan le Ka mate di dalam hutan Demi Allah deungon Nabi Han ubah le ban lon kheun nyan Habeh sumpah bintang kala Di nap banta nyang bangsawan Tajul Muluk bungong pade Neujaweueb le haba nyoe ban Aneuk meureubok kutru bak data Aneuk rawa di cong asan Jak leh tawoe putroe muda Ubah hana bak lon tuan

Meunyo cit na idin Rabbi Tujoh hari tapreh laman

Bit pi meunan putroe indah

Nibak ayah han lon tuban

Bek antara geubri lon woe Meunanggroe bek lon kalon ban Meunyo geutham bak siseun nyoe Jadeh putroe lon meulawan Ka sep he nyak lon bri nama Keu ayahda trep ka zaman Uroe nyoe ka habeh pike Bangsa pari kumeung simpan Rakyat raja kupoh mate Bek weueh hate putroe intan Meukon meunan po juhari Han geuturi bangsa ensan Han geuturi le ayahda Aneuk raja Syarikatan Kon teukabo lon bak Rabbi Seuhari han peue lon simpan Nakeuh diwa bangsa pari Leubeh lagi yoh lam hutan Jen hitam masa saboh roe Muploh katoe ngon angkatan Tajul Muluk hana cit gli Bek nyang pari na dua khan Insya Allah judo payong Deungon tulong Poku Tuhan Bek taweueh le bungong sukon Reuloh gampong deungon midan Deumi Allah kupoh mate Walee meuseuke po jonjongan Uteuen seumak lon niet jalan Gunong manyang lon niet midan Bak masa nyoe cit lon pike 'Oh ka mate habeh jalan

'Oh mate lon di blang raya Ban nyang suka gata intan Tameukawen soe nyang suka Bangsa diwa sabe wadan Ulon judo ka lheueh adat Hana sapat keumaluan Asai nyang bek jeuheut nama Gop upat ceula bangsa ensan Meungkawali deungo haba Sret ie mata han meuban-ban Weueh keu judo po sambinoe 'Oh troh geuwoe saleh pakri ban Kadang meuhat jeuet prang raya Ho troh hamba wahe Tuhan Weueh keu ayah saboh bagoe Po sambinoe hate rawan Meunan pike putroe muda Ruhon Afda kheun lom yoh nyan Bek le tamoe bungong pade Po tallah bri keubajikan Insya Allah he adekda Na bicara bak lon tuan Meungkawali seuot bagah Bu meutuah he da badan Teuma beudoh putroe muda Jiwoe lanja gampong laman 'Oh troh jiwoe u istana Troh le sigra ngon hidangan Putroe makeuen le bandua Sama-sama putroe intan 'Oh lheueh makeuen po juhari Peurmaisuri troh le keunan

.305

Teuma tanyong peurmaisuri

He boh hate pane jalan Seuot putroe nyang jroh rupa Sajan cuda jak lam taman Peurmaisuri tanyong bagah Peue na leumah taeu sinan Teuma seuot Meungkawali Han ek doli lon peugah ban Cukop dumpeue sinan lahe Hireuen hate lon kalon ban Peurmaisuri galak han soe Teuma dudoe tren le sinan Uroe pi ka seupot laju Ek u leupu putroe intan Malam jula jak beuradu Bungong meulu dua sajan Teuma marit Meungkawali He cuda ti pakon meunan Han neupeugah deungon teupat Ampon deelat dalam taman Ruhon Afda jaweueb bagah Hana salah lon hai intan Ulon tanyong awai akhe He putroe ti tapeugah han Nyankeuh seubab han lon peugah Takot salah ulon tuan Meunan narit Ruhon Afda Khem teurtawa cut analan Seubab hana ulon lahe Ampon doli lon sangka tan Hana lon thee da meutuah Na neukeubah dalam taman

Teungoh marit po sambinoe Bandua droe teungeut pangsan Hingga teuma beungoh uroe Tren jak manoe dua sajan 'Oh lheueh manoe bungong pade Ka jinggui le dum pakaian Na sikeujap teuma dudoe Ka troh sampoe ngon hidangan 'Oh lheueh makeuen ka seuleusoe Raja nanggroe neukheun yoh nyan Wahe aneuk bungong geutoe Jinoe tawoe bak sulotan Meungkawali jaweueb pantah Insya Allah po jongjongan Cukop hase sianeka Putroe muda le berjalan ； Padum na trep di rot raya Troh lam kuta bungong rihan Hamilah Katon kalon rupa Hate suka hana macam Teutap putroe lam istana Deungon bunda sinan sajan Teuduek dilee putroe muda Ruhon Afda lon peugah ban 'Oh leupah woe Meungkawali Cut putroe ti hate rawan Teuingat keu Tajul Muluk Bungong tajok nyang bangsawan Seubab geubri jroh that guna Pakri daya tabalasan Adat kon na gob nyan sidore Han soe puwoe aneuk badan

Teuma marit peurmaisuri Bak lon doli saboh padan Ruhon Afda bungong kipah Yue peunikah ngon bangsawan Bit pi meunan wahe doli Ubak siti tatanyong ban Meunan narit peurmaisuri Raja doli jaweueb rijang Wahe judo deungo kamoe Gata sidroe nyang tanyong ban Peurmaisuri tanyong leugat Bungong riwat jaweueb rijang Han jeuet bunda lon meunikah Ka lheueh sumpah lon ngon gop nyan Tajul Muluk banta muda Aneuk raja Syarikatan Gop nyan sidroe that beurani Le that sakti ngon seunuban Lagi gagah that peurkasa Cit geuthee na bangsa ensan Masa dilee he ma ubon Hamilah Katon srom lam awan Tujoh buleuen kalang kalot Sret lam laot he ma badan Uroe malam bakat beuot Han jeuet karot bungong peukan Nyang geulakee ubak Rabbi Meungkawali judo badan Masa geujak dalam rimba Deungo he ma lon peugah ban Cit lam geumoe rok-rok masa Putroe muda geuseubot nan

'Oh lon deungo meunan haba Lon kheun teuma meunoe macam Deelat ampon payong nanggroe Bek le neumoe po jonjongan Meungkawali nyang sambinoe Adek kamoe putroe seudang Meuna umu po samlakoe Lon peujaroe keu jonjongan Habeh janji ma teungku droe Lon geupuwoe rot lam awan Geumuprang ngon jen ceulaka Rakyat dumna habeh simpan Nyankeuh he ma cuba pike Jalan pakri lon sampoekan Lom pi adek Meungkawali Na peureugi dalam taman Ka meurumpok ngon putroe ti Banta ahli nyang budiman Ka lheueh janji bandua droe Tujoh uroe bri tanggohan Geubri tanggoh tujoh uroe Troh le geuwoe bak cut intan Meunyo geutham watee geuwoe Hanco nanggroe he ma badan Rakyat raja geupoh mate Meunan janji po bangsawan Ka lon peugah awai akhe Raja doli that dukaan Peurmaisuri deungo haba Sret ie mata han meuban-ban Ubak raja geujak pantah Geujak peugah dum haba nyan

Habeh geukheun awai akhe Baten lahe seukalian Teuma marit raja nanggroe Ubak meuntroe neukheun nyoe ban Wahe meuntroe bungong tajok Tajul Muluk aneuk laman Ruhon Afda nyang sambinoe Gop nyan puwoe dalam hutan Adat meukon gob nyan puwoe Mate keudroe aneuk badan Meung patot mee putroe muda Nyang po jeumba cut bangsawan Akan teutapi he peurdana Putroe muda tan sukaan Seubab dilee ka lheueh janji Meungkawali judo badan Meuhan tabri po sambinoe Akhe dudoe keususahan Nanggroe reuloh rakyat mate Jihanco le po bangsawan Jen hitam nyang le that sakti Habeh mate dum jisimpan Meung geutanyoe he peurdana Hana daya prang talawan Meuntroe deungo sabda raja That meurasa dalam badan Meuntroe jaweueb meunoe haba Ban nyang suka bak jonjongan Meunyo meunan he peurdana Peulinggoe Pura tabeurjalan Bahle gata keu teulangke Peurmaisuri taba sajan

Meuntroe deungo titah raja Beudoh lanja le beurjalan Peurmaisuri sajan geuba Hingga teuma troh lam taman Geutamong le dalam kuta Ngon peurdana dua sajan Hamilah Katon kalon rupa Jitren sigra mumat tangan Lheueh meuteumeung bandua droe U meuligoe peuek rijang Na sikeujap duek mupiyoh Dendayang troh jiba puan Putroe pajoh ranup sigapu Putroe meusu buka kalam Wahe adek cahya mata Deungo hamba wahe intan Meungkawali nyang sambinoe Hoka jinoe adek badan Hamilah Katon peugah laju Na di leupu bungong rihan Padum na treb ka hana bu Ia mata ro basah badan Saleh saket bungong meulu Sianeuk bu tan jimakan Hamilah Katon meunan rawi Peurmaisuri jaweueb yon nyan Idin gata bungong sukon Lon jak kalon putroe intan Troh u rumoh neupeureugi Meungkawali ka na sinan 'Oh ban jieu ka troh bunda Putroe muda beudoh rijang

Meungkawali com di teuot Putroe sambot dua tangan Teungoh seumbah teuot bunda Sret ie mata miseue hujan Teuma marit peurmaisuri He boh hate pakon meunan Pakon aneuk sosah hate Soe tapike wahe intan Teuma seuot Meungkawali Lon he umi sosah han ban Saleh mate lon troh masa Wahe bunda han lon tuban 'Oh lon ingat pie umi Deungon doli dua sajan Suntok masa lon geubeunci Gotkeuh bahle lon beurjalan Bahle lon jak u dalam gle Mangat mate rimueng kuran Meunan narit Meungkawali Peurmaisuri seuot rijang Wahe aneuk tangke hate Bek tamoe le bungong peukan Bek he aneuk jak lam rimba Ngieng keu bunda he buleuen trang Nyandum aneuk lon usaha Rugoe laba lon relaan Kon peue laen lon bicara Cit keu gata wahe intan Lon nyoe aneuk keu teulangke Ubak doli ayah intan Bek le aneuk hate gundah Jok bak Allah seukalian

Meunggoh mupeue hana lon woe He sambinoe bek dukaan Meunan narit peurmaisuri Meungkawali suka han ban Habeh haba cut putroe Ti Peurmaisuri ek le rijang 'Oh sare troh u meuligoe Raja nanggroe troh le keunan Mumat jaroe peurmaisuri Geutanyong le haba nyoe ban Wahe cuda pirak lipat Peue na hajat cuda badan Wahe adek lanja keunoe Suroh putroe lon beurjalan Ruhon Afda bungong meulu Jimeunapsu putroe intan Yue ba saleuem keu meukuta Saboh haba deelat laman Teuma seuot raja deelat Peue na hajat aneuk badan Peurmaisuri jaweueb sigra Ampon hamba po jonjongan Ruhon Afda tangke hate Malam hari beurcintaan

Meungkawali bungong seuke Jigade bak po jonjongan Jipeukawen uleh putroe Deungon adoe nyang bangsawan Tajul Muluk nyang seutia Aneuk raja Syarikatan Ruhon Afda jih nyang puwoe U nanggroe Paridoh Taman

Ngon jen hantu jimupake Malam hari prang jilawan Rakyat raja habeh mate Keunong sakti cut bangsawan Ruhon Afda bungong kipah Ka lheueh sumpah dua gop nyan Jimeuseubot aduen adoe Sampoe dudoe jiubah han Nyankeuh seubab wahe deelat Jiharap that bak jonjongan Meuhan neubri bungong riwat Jeuet meularat akhe zaman Dum jen hitam nyang beurani Ka lheueh mate buet bangsawan Meung geutanyoe ampon doli Baranggakri han ęk lawan Tajul Muluk that jigade Jimeunghan bri han meukri ban Akan teutapi meuhat teumakot Jikalon buet cut bangsawan Bak masa nyan raja nanggroe Ingat keudroe malee han ban Lheueh nibak nyan teuma dudoe Peurdana meuntroe neuhei keunan Huleebalang meuntroe kali Ka troh ili laju keunan Meuteumeung le deungon raja Jaroe dua beuot meulayang Deelat ampon po meukuta Peue na haba neuhei laman Teuma sabda raja raya Keu aneukda neupeugah ban

Meungkawali nyang sambinoe

Ubak kamoe troh habaran Tajul Muluk ka troh jiwoe Dalam nanggroe Paridoh Taman

Bak lon sangka jih ka mate Buet putroe ti srom lam awan Teuma jinoe ka troh gisa Jibri haba bak lon tuan

Jimeuhajat Meungkawali Meung han lon bri prang jilawan Jen hitam ka jipoh mate Cok putroe ti dalam hutan

Ruhon Afda jih nyang puwoe

Troh u nanggroe Paridoh Taman

Jinoe meuntroe pakri pakat Cuba ingat dum sibarang

Patot tabri putroe muda Nyankeuh raja nyang bangsawan Atawa bek cuba pike Gotkeuh bahle prang talawan

Nibak ulon dumkri hase Udep mate lon relaan Meunan sabda raja nanggroe Wadi meuntroe jaweueb yoh nyan

Meuah ampon po meukuta Nibak hamba saboh padan Bek tuanku hate luka Meunyo cit na patek laman

Barang peue buet ek mupike

Bek hai doli keususahan

Soe meuhajat putroe indah

Neupeunikah po jonjongan

Seubab gop nyan bahgia that Laot darat han soe lawan Kon kamoe peutakot deelat Deuh neulihat buet bangsawan

Ka lheueh neusrom dalam hawa Padum lama han cit simpan Dalam laot sret lam bakat

Malaikat sambot rijang

Meung kon gop nyan sakti le that Han le hayat he jonjongan Lom tuankù tueng ibarat Aneuk deelat putroe intan

Ruhon Afda gop nyan puwoe U nanggroe Paridoh Taman Adat kon na gop nyan sidroe Mate putroe dalam hutan

Jen hitam nyang le that sakti Lom beurani le seunuban Akan teutapi ampon deelat Deungon siat habeh simpan

Ingat beuthat wahe doli Meuhan meukri keurugian Tinggai doli dua lhee droe Geunap uroe keumaluan

Dum jen hitam ka mupaloe Meung geutanyoe siat han jan Nyankeuh lon kheun ampon deelat Ingat beuthat he sulotan

Meunyo neutueng keu meulintee Gadoh malee po jonjongan Adat teukeudi teuka bala Na aneukda prang jilawan

Deelat tuanku neuduek saja Rugoe laba buet bangsawan Meunan bak lon nyang meurasa Laen teuma bak jonjongan Meunan narit peurdana meuntroe Raja nanggroe tahe heran Teuma seuot raja nanggroe Wahe meuntroe nyang budiman Ban nyang pakat nibak gata Hana dawa bak lon tuan Jinoe takrah bandum rakyat Timu barat seukalian

Inong agam tuha muda Tayue teuka dum u midan Takheun ulon meukeurija Lon bri jeumba putroe intan Meunan narit nibak raja Lem peurdana beudoh rijang Yoh nyan meuntroe jikrah rakyat Raja deelat lon peugah ban Habeh narit deungon meuntroe Raja neuwoe laju yoh nyan Meuteumeung le peurmaisuri Raja doli neukheun nyoe ban Wahe cuda bungong pade Rela hate bak lon tuan Ban nyang hajat Ruhon Afda Rugoe laba lon relaan Pajan hase bak aneukda Peugah haba bak lon tuan Meunan sabda nibak doli Peurmaisuri jaweueb kalam

Insya Allah payong nanggroe Idin lon woe po jonjongan Teuma seuot po teuraja Idin cuda bak lon tuan Lheueh nyan beudoh peurmaisuri Woe keumbali gampong laman Deungon meuntroe nyang juhari Peurmaisuri laju pulang Padum lawet di rot raya Troh lam kuta putroe intan Meuteumeung le deungon raja Lom aneukda dua sajan Teuma marit peurmaisuri Wahe doli deungo laman Ban nyang hajat Ruhon Afda Hate rela po jonjongan Hana sapeue na meubantah Ngon meutuah putroe intan Yoh nyan raja neuhei meuntroe Neupeugah proe seukalian Wahe meuntroe nyang seutia Rakyat dumna pangge rijang Inong agam tuha muda Beutroh teuka uroe Seunayan Takheun ulon meukeurija Lon boh gaca aneuk badan Lheueh peurintah nibak raja Beudoh sigra meuntroe bujang Jikrah rakyat dum sinaroe Jeuoh ngon toe dum sibarang Inong agam keunan sampoe Ribee katoe bak bilangan

Di leuen peunoh mideuen sarat Geubri teumpat ban atoran Teuma sabda raja naggroe Ubak meuntroe nyang budiman Jinoe peugot saboh surat Tayue intat keu sulotan Ubak ayah Meungkawali Tapeugah kri buet peurasan Malam Hameh phon lon mula Lon boh gaca aneuk badan Nyang di sinoe ka lon mula Sideh teuma ban sukaan Peurdana meuntroe peugot surat Geuyue intat laju rijang 'Oh troh waki jak ba surat Raja deelat sambot yoh nyan Mula Fasyah buka surat Haba mangat sang manisan Mangat hate raja deelat Dalam surat buet ka meujan Teuma neukheun bak peurdana Deungo hamba peugah macam Jinoe kamoe meukeurija Meung boh gaca putroe intan Rakyatpi ka keunan sampoe Peurdana meuntroe peugah yoh nyan Wahe rakyat dum sinaroe Raja nanggroe beursukaan Neupeukawen tuan putroe Ngon samlakoe nyang analan Tajul Muluk nyang samlakoe Tuan putroe nyan tunangan

Geutanyoe dum keunoe ka troh Toe ngon jeuoh dum sibarang Uroe malam bek le piyoh Bek na teudoh mupeurasan Hingga teuma haba nyang toe Malam uroe tango kiam Peurasan meuribee bagoe Rakyat nanggroe that sukaan Jisie lumo meureutoh ploh Keu peunajoh jamee datang 'Oh habeh nyan laen ka troh Tango kiroh bukon wayang Meunan sabe geunap uroe Teuduek 'oh noe keu sulotan Tajul Muluk bungong geutoe Dalam nanggroe Paridoh ·Taman Hate sosah hana bagoe Teuduek sidroe po bangsawan Ka teuingat po samlakoe Keu cut putroe bungong rihan Ruhon Afda lam meuligoe Deungon ma droe cut analan Laen nibak nyan rakyat dumna Agam dara ka troh keunan Keubeue lumo cit ka hase Meukhanduri peurayaan Cukop pakat wadi meuntroe Meuriam sagoe geutet yoh nyan Su meuriam hana teudoh Sang runtoh Paridoh Taman Tajul Muluk bungong pade Teukeujot le tatkala nyan

Bak neusangka prang raya that Saleh pat-pat teuka lawan Neueu ureuengpi rame that Subra sangat inong agam

Keumeung jak eu Ruhon Afda Neutren lanja po bangsawan Teungoh neutren po samlakoe Sinyak putroe ka troh keunan

Neutanyong le meunoe haba Peue na bala cuda badan Pane musoh keunoe teuka Peugah cuda bak lon tuan

Teuma seuot po sambinoe

He adek nyoe kon pasai muprang

Hajat ayah meukhanduri Rindu hate po jonjongan

Nyankeuh adek lon jak keunoe Hesamlakoe jak peugah ban Seubab ayah meukeurija Neuboh gaca gata intan

Meunan narit Ruhon Afda Po cut banta that sukaan Hana sapeue le beurkata Neutren lanja lheueh nibak nyan

Tajul Muluk nyang samlakoe

Di meuligoe bak masa nyan Seugala inong nyang muda-muda Sajan banta duek meurumpan

Tan jiminah meung sideupa Keunan mata seukalian Ladom inong nyang ceulaka Sang beujiwa jicom yoh nyan

Ruhon Afda jikheun meunoe Bak samlakoe jipeugah ban Wahe adek cahya mata Lon boh gaca gata intan Uroe nyoe lon puphon gaca Idin gata adek badan Tajul Muluk jaweueb meunoe Bak lon sidroe dawa cit tan Ban nyang hajat nibak cuda Hana dawa bak lon tuan Akan teutapi lon na hajat Neupreh siat cuda badan Kareuna ulon na syeedara Syamson Akba nyang analan Ayah bundapi tan sinoe Dalam nanggroe Syarikatan Patot cuda lon mupakat Meunan hajat cuda badan Meunyo hana lon mupakat Hana mangat bak lon tuan Gop upat ceula da meuubon Geukheun ulon seutia tan Bitpih meunan da boh hate Ban nyang pike cuda badan Teuma seuot Ruhon Afda He adekda deungo laman Meunyan adek bek tatakot Meunyo bak buet keubajikan Meunan narit Ruhon Afda Banta muda tahe heran Jeuetkeuh dumnan lon peuhaba Peulinggo Pura pi cit meunan

Hana kureueng ube seuma Meukeurija hana reunggang Uroe malam meukeurija Macam rupa dum peurasan Peulinggoe Pura Taman Paridoh Subra rioh hana macam Mupeurasan hana teudoh Meugeureupoh uroe malam Tajul Muluk nyang samlakoe Peurdana meuntroe sinan sajan Huleebalang meuntroe kali Di keue doli duek meurumpan Laen rakyat dum sinaroe Raja nanggroepi di sinan Teungoh-teungoh peugah haba Neuteupok pha cut bangsawan Ka teuduek le aneuk raja Syamson Akba geurasi nan Nyankeuh sakti raja naga Lam keumala keunyataan Nyankeuh baro lahe nyata Syeedara banta analan Teuma marit Syamson Akba Di jeumala dua tangan Peue na hajat po meukuta Keupeue hamba neupanggelan Tajul Muluk jaweueb sigra He syeedara deungo laman Lon ka teulhon han le ija He syeedara pakri jalan Meunyo hana tulong gata Jeuheut nama bak lakuan

Teuma seuot Syamson Akba Po meukuta bek sosahan Soe keumeung poh ampon deelat Peugah leugat bak lon tuan Teuma seuot bungong pade Tan soe taki lon he intan Nyang jeuet lon kheun haba meunoe Lon keumeung woe bak cut intan Lon woe bak Meungkawali Jinoe pakri adek badan Tapuwoe lon bak buleuen nyoe Ubak putroe nyang analan Akan teutapi he syeedara Han sapeue na di lon tuan Ulon harap nibak gata Meunyo cit na keumudahan 'Oh nan narit po jroh rupa Syamson Akba teukui yoh nyan Tangah u langet teukui u bumoe Pahlawan droe meuhei rijang Teuka reudok deungon tupeuen Lam uteuen teubiet pahlawan Deungon rakyat muploh katoe Nyum lham nanggroe Paridoh Taman Asoe nanggroe yo ngon atot That teumakot jikalon ban Peurdana meuntroe deungon raja Miseue geumpa leungo badan Teuma marit po samlakoe Tuanku droe bek syugolan Bukon musoh keunoe teuka Adek hamba nyang pubuet nyan

Syamson Akba ampon deelat Adek sahabat di lon tuan Meunan neukheun banta ahli Mangat hate dum sibarang Lheueh nibak nyan padum lama Syamson Akba hei pahlawan He syeedara dum sinaroe Deungo kamoe dumna rakan Peudong kuta ngon meuligoe Tujoh uroe beu hase nyan Pahlawan ngo sabda doli Jibeudoh le seukalian Jideumpek le pahlawan Sadon Rakyat meuhimpon dalam awan Pahlawan teukuiu bumoe Kuta beusoe teudong sinan Cukop hase ngon meuligoe Indah han soe takalon ban Syamson Akba teupok jaroe Tujoh putroe teudong keunan Laen nibak nyan ureueng binoe Ribee katoe bak bilangan Juho Alam pahlawan tarek Jireutek dua blah tangan 'Oh jireutek dua jaroe Le that bagoe troh peurasan Geundrang tambo ngon napiri Seurune kale pi na sinan Datok Jani pahlawan kha Jisrom ija dalam awan 'Oh troh keudeh dalam miga Kapai raya jeuet le rijang

Kapai teureubang indah rupa Han sapat na nyang sa ngon nyan Teuma beudoh Meurak Diwangga Nyang keupala dum pahlawan Jipaleng le kanan kiri Ngieng u bumi tangan u mayang Ateueh ulee jaroe jikeubah Jihah babah raya han ban 'Oh ban jihah babah raya Asap meubura teubiet sinan Dalam asap he teungku droe Jeuet le nanggroe luah han ban Nanggroe baro indah rupa Hana nyang sa dalam alam Ngon sipai muploh laksa Dum seunjata nibak tangan Jaga kuta ngon istana Han ek kira bak bilangan Ladom taeu gulam beude Ulee ili ateueh jalan Ngon meuriam han peue peugah Po tallah dum nyang tuban Han ek teelan tariwayat Maklum sahbat buet bangsawan Bak masa nyan wahe sabat Sang kiamat bak lakuan Asoe nanggroe agam dara Miseue geumpa leungo badan Taman Paridoh Peulinggo Pura Rakyat dumna keutakutan Agam inong klik meu'a-’a Ladom hei ma ladom hei wang

Saboh macam di ureueng binoe Jimat lakoe ka roh tuan Nyang di tuan saboh lagee Mat meulintee nibak badan Sira jiwoe jikheun lagee Neuba kee-kee teungku sajan Le that ureueng seudee ratee Gadoh malee inong agam Bahkeuh 'oh nan kaman dilee Tango lagee lon peugah ban 'Oh lheueh cukop sianeka Po jroh rupa tren le yoh nyan Tajul Muluk nyang samlakoe Neuduek sidroe dalam taman Troh le keunan Ruhon Afda Bak cut banta nyang analan Teungoh-teungoh peugah haba Syamson Akba troh le keunan Jisujud le ubak banta Jaroe dua beuot meulayang Ampon tuanku payong nanggroe Ka troh lon woe po jonjongan Ban nyang hajat tuanku droe Hase sampoe seukalian Tajul Muluk jaweueb pantah Bu meutuah adek badan Jinoe tawoe he adekda Ubak tandra seukalian 'Oh troh'keudeh gata teuka Uroe lusa troh lon tuan Seureuta deungon meuntroe muda Ngon keukanda wahe intan

Meunan takheun dalam kuta Bak syeedara dum pahlawan Tajul Muluk meunan kata Syamson Akba beudoh rijang Ban nyang suroh nibak raja Tan meutuka bungong rihan Pahlawan tujoh peukeumah droe Malam uroe teungeutji tan Jipreh teuka po samlakoe Malam uroe mupeurasan Teuduek 'oh nan saboh leua Ruhon Afda marit yoh nyan Jitanyong le ubak banta Peue suara dalam awan Pane nanggroe lam awan miga He adekda tapeugah ban Meuligoe jroh lon eu rupa Seuot sigra banta seudang Nyankeuh nanggroe wahe cuda Adek hamba nyang buatan Meuna idin bak Rabbana Uroe lusa lon beurjalan Ruhon Afda seuot bagah Insya Allah adek badan Jinoe adek ulon gisa Idin gata wahe intan Meunan jikheun Ruhon Afda Jiwoe lanja lheueh nibak nyan 'Oh troh jiwoe bak ayahda Peugah haba laju yoh nyan Padum lawet teuma dudoe Ka troh sampoe bak tanggohan

Uroe Seunanyan buleuen peuet blah Neucok langkah bungong peukan Geucok langkah bandum rata Marit banta nyang analan Di istana saboh laku Deungo teungku lon peugah ban Raja hekeumat nyang keu raja Adek banta nyang analan He syeedara dum sinaroe Raja jinoe heundak beurjalan Meung beurangkat raja nanggroe Beudoh jinoe peugot jalan Beu hase le deungon siat Peugot sabat jalan intan Pahlawan tujoh beudoh sigra Jiteupok pha pantah han ban Teubiet asap meubura-bura Rakyat teuka di dalam nyan Jipeugot le jalan raya Meuh suasa batee intan Dalam nanggroe Peulinggoe Pura Meukeurija bak masa nyan Geupreh-preh woe banta muda Agam dara laloe sinan Hana jieh malam uroe Dawok laloe ngon peurasan Teungoh-teungoh jimeunari Jikalon le sidroe rakan Leumah jieu jalan raya Hu meucahya miseue intan Phon bak bineh kuta nanggroe Hingga sampoe dalam awan

'Oh ban jieu meunan bagoe Jikheun meunoe ubak rakan He syeedara dum sinaroe Han lon tupeue bala Tuhan Jeh takalon di lua kuta Sinan mula troh lam awan Han tom lon eu meunan rupa Beuneung raja troh lam awan Kadang-kadang teuka bala Buet Rabbana han tatuban Ban jideungo meunan haba Jingieng teuma seukalian Inong agam rioh subra Jikheun bala ka troh datang Ladom jiplueng dalam kuta Ubak raja jak peugah ban Nyang ladom jiplueng u lua Bak jikira ek lheueh badan Nyang di inong saboh bagoe U meuligoe jiek curam Jijak peugah ubak putroe Ampon kamoe he cut intan Ampon po cut di jeumala Beuneung raja keulaheran Han tom lon eu meunan rupa Hu meucahya miseue intan Phon teubiet lam parek raya Keudeh punca dalam awan Meunan jikheun bak putroe ti Meungkawali beudoh rijang Jibuka le jeundila kaca Jipeunyata yoh nyan rijang

Teuma leumah jingieng nyata Hana nyang sa meucahya trang Na sikeujab putroe tahe Jideungo su meuribee ban Teuma marit Meungkawali Nyankeuh sakti cut bangsawan Yoh nyan jikheun uleh putroe Bak sinaroe dum dendayang Nyankeuh sakti po samlakoe He cuda droe bek sosahan Ban jideungo meunan haba Jitren lanja seukalian Jitren u yub bandum rata Jijak mita bandum rakan 'Oh meuteumeung jipeugah le Wahe akhi bek sosahan Nyankeuh sakti po samlakoe Tanda neuwoe bak cut intan Meunan neukheun Meungkawali Ubak kami neupeugah ban Teungoh-teungoh dong meututo Troh le lalo guda kandran Lam blang raya guda lalo Rakyat pi le inong agam Ngon peurasan rupa-rupa Hana nyang sa dalam alam Ayah putroe Meungkawali Meuntroe wadi neuhei rijang Troh le keunan dum peureugi Raja doli buka kalam Wahe meuntroe nyang seutia Jak tueng sigra bungong rihan

Deungon rakyat bandum taba Haria deungon ben peukan Ban jideungo meunan haba Teubiet lanja dum sibarang Inong agam bandum jiba Jak tueng banta nyang analan Nyang jak di keue bungong kipah Payong teuhah seukalian Lom likot nyan ureueng tuha Aneuk dara di likot nyan Taeu jijak santeut banja Payong sutra nibak tangan Rotdeh geupreh rotnoe geujak Ka meurumpak teuma yoh nyan 'Oh meuteumeung dua pihak That meuhayak mupeurasan Diwa Hamilah nyang sambinoe Dalam nanggroe saboh padan Deungon sireutoh di rakan droe Teubiet jinoe bungong rihan Sidroe dendayang nyang mat payong Jipeutudong putroe intan Troh le keunan tuan putroe Meurumpok nyoe ngon bangsawan Ban meurumpok he syeedara Jaroe dua beuot rijang Lom jitumpoh ngon suara Ampon hamba po jonjongan Lon nyoe miseue saboh piala Bak srah muka cut bangsawan Tabeue masen ie lam gaca Bek meukuta keumarahan

Bukon sayang putik iboh Peunajoh cicem meukawan Assalamwalaikom meuh seuneupoh Pakon trep troh keunoe datang

Aneuk bayeuen di cong iboh

Leuek utoh meuen bak taman

Tho ngon ranup dalam bungkoh

Lon preh-preh troh po jonjongan

Bukon sayang mirahpati Nibak gaki gleueng kunengan Bek tuanku sinoe lawi Sayang nuri dalam taman

Sianeuk bu tan jipajoh Meunggoh lom troh cintra intan Meunan jikheun Diwa Hamilah Seuot pantah putroe seudang

Ruhon Afda jaweueb meunoe Deungo kamoe he ma badan Alaikom salam he ma putroe Nibak kamoe muliaan

Leuek bangguna roh lam taloe

Sayang han soe takalon ban

Nyang jeuet lama keunoe sampoe Trep that kamoe dalam hutan

Padum lawet dalam laot Riyeuek bapot he ma badan Adat kon tulong Tuhan Ma'bud Kalheueh mawot cintra intan

Aneuk musang di cong iboh

Teungoh pajoh boh rambotan

Ranup nyang tho dalam bungkoh

Singoh neuboh he ma badan

Cempala nyang bulee got Di cong beunot bineh jalan Meuna umu po bungong crot Troh jiseutot dalam awan Meunan jikheun putroe indah Diwa Hamilah seuot rijang Diwa Hamilah marit meunoe Deungo kamoe he cut intan Puteh-puteh bungong geutoe Angen tampoe musem hujan Kamoe bandum nyang troh keunoe. Jak tueng putroe ngon bangsawan Diwa Hamilah meunan narit Seuot nyang bit putroe intan Diwa Rakna Keumala Sari Nyan esteuri di sulotan Insya Allah waheumi Nibak kami hajat meunan Meunan neukheun bungong kipah Diwa Hamilah mumat tangan Bandua si mumat jaroe Geujok dudoe ngon bungkosan Putroe pajoh ranub lam karah Diwa Hamilah geukheun yoh nyan Udeh jinoe dalam kuta Deungon hamba bungong rihan Tamong laju teuma sigra Deungon tandra seukalian

Huleebalang meuntroe wadi Teumpat geubri meuatoran Lheueh nibak nyan teuma dudoe Po samlakoe peuek rijang

Geupeuduek le di seuramoe Bantai pudoe tampok intan Tajul Muluk neupiyoh le Teungku kali neukheun yoh nyan Jinoe banta lon peunikah Ngon cut indah nyang analan Po samlakoe jaweueb bagah Ban nyang titah guree laman Teungku kali kheun bismillah Alhamdulillah lheueh nibak nyan Lon peunikah banta ahli Ngon putroe ti nyang peurawan Tajul Muluk neujaweueb le Kabui kami seukalian Teuma geupeuek u meuligoe Bak cut putroe nyang analan Troh bak pinto putroe muda Sidroe maja teupreh sinan Geumat ngon ie lam seurahi Geusrah gaki cut bangsawan Lheueh nibak nyan banta muda Laju jiba bak cut intan Jipeuduek le po jroh rupa Ateueh tika meuh ngon intan Teuma peurab Meungkawali Di keue doli duek meurumpan Cok le ranup dalam bate Jisuleueng le keu sulotan Na sikeujab duek beureunti Geubeuot le ngon hidangan Troh le maja keunan teuka Sanggoi raya pinah rijang

Teuma geusrah jaroe banta Seureuta geubuka hidang Makeuen tuanku bu ngon sira Nanggroe hamba jeuoh peukan Teuma seuot banta muda Makeuen sama he ma badan Teuma makeuen sama-sama Putroe muda ngon sulotan 'Oh lheueh makeuen po jroh rupa Hidang raya pinah rijang Teuma malampi ka jula Banta muda jak tidoran Ateueh geuta nyang indah that Dua sapat ngon cut indan Hana peue le lon riwayat Meung buet deelat han lon tuban Hingga teuma beungoh uroe Tren jak manoe dua sajan 'Oh lheueh manoe suci asoe Troh le sampoe ngon hidangan Tajul Muluk ngon putroe ti Neumakeuen le dua sajan Meunan sabe geunap hari Banta ahli ngon cut intan Han tom jarak meung sipade Hana tom cre uroe malam Hamilah Katon deungon doli Mangat hate han meuban-ban Padum lawet sinan lawi Deungo akhi lon peugah ban Poteu raja nyang juhari Meuntroe wadi neuhei keunan

Imum geusyik tandi waki Rakyat sare seukalian 'Oh troh keunan dum peureugi Jiangkat le dua tangan Deelat ampon payong nanggroe Rakyat sinaroe habeh datang Teuma sabda raja nanggroe Wahe meuntroe nyang analan Tajak gata bak samlakoe Di meuligoe bak cut intan Lakee langkah siat keunoe Rindu kamoe tapeugah ban Meunan sabda raja nanggroe Beudoh meuntroe laju jalan 'Oh troh keudeh u meuligoe Angkat jaroe le meulayang Ampon tuanku di jeumala Patek hamba peusurohan Neuyue jak tueng tuan hamba Keudeh sigra bak sulotan Tajul Muluk nyang bahgia Bak ayahda neujak yoh nyan 'Oh sare troh ubak raja Seumbah sigra po jonjongan Poteu raja sambot pantah Bu meutuah bungong rihan Taduek keunoe bungong pade Rindu hate lon hana ban Tajul Muluk nyang juhari Ka neuduek le di hadapan Na sikeujab neuduek banta Tren le sabda bak sulotan

Wahe aneuk bungong jeumpa Lon ka tuha wahe intan Nyan pat kuta ngon meuligoe Nyan pat putroe bungong peukan Nyan pat rakyat wadi meuntroe Jeuoh ngon toe seukalian Takeurajeuen uleh gata Gantoe hamba aneuk badan Teuma jaweueb banta muda Ban nyang suka deelat laman Muzafasyah teuma kata Bak peurdana seukalian Wahe meuntroe nyang seutia Nyoe aneukda gantoe laman Peue nyang hajat bandum gata Peugah sigra nibak gop nyan Meunan narit poteu raja Peurdana seuot le rijang Deelat ampon po meukuta Di jeumala patek laman Ban nyang titah seuripada Kamoe dumna that sukaan Habeh haba ngon samlakoe Mumat jaroe ngon sulotan Lakee idin bungong geutoe Laju neuwoe bak cut intan Teutap raja peutimang nanggroe Teutap putroe peutimang badan Masa keurajeuen po samlakoe Hana sapeue keukurangan Hukom ade hana bagoe Rakyat nanggroe that sukaan

Troh meusyeuhu jeuep-jeuep nanggroe Po samlakoe that adelan Timu barat ureueng teuka Maniaga laju keunan Aman nanggroe hana tara Rakyat dumna that sukaan Bab peurtama 'oh noe reuda Bab keudua lon peugah ban

Bungong jeumpa puteh mirah Bee meupeuah bungong asan Teuduek 'oh noe saboh kisah Laen ulah lom lon peutrang

Jakarta Nopember 1982 Dialih aksarakan dan disunting oleh Ramli Harun

Wahe nenk bungong jumposnan qeusbqousk udusvauem dor

Lor ka tuha wabe lntan Nyar pat kute pgou meußigoe Nyas pat patroc burgong peukaa

Nyan pac rakyat wadimenmpe

Jeuch ngon fob caukallun Taksunijeuen Dieh gata Gantce hmbe aneok badan

Ban ayana saka decla lan Mizofayah tetmua kuta.

Bek peurdana seukakin Waba mcustroe myang seutia. Myoc 60980P188mks96446fakst

Pee n d

Peugab sagra nibak do heueib

M Pourdans scuor ke rhng. Peclet ampos po meukata Di jeamaks paiek bantan. Ban myang titsh seuripada Kamoe dumna that sukaan Babeh lebg mon samlakoe Momat Jeroo npon wioms Lakae kdm bungana geutoe Lan mewoe bak cot mtan

Teutap rae patimang ranggive

Tentap putroo pentimang badan Masa Keumjcuen po samhkce Hane dapeue kcukunhvan

Tukom ade huna bagoe

Rakyst panggrbe4batsakdan

makeba md sokelma 09 u ta umi mamvel vial sgała6k. 8m3 8m672 50188060 mmA m0a ład smb av abust 9om do amahueq da8 ned dauaq mol aobvoa daa

0886 gnogmud daoquom 998 deailrodaa son do laubusT 2amosq nol mol áelv a9a.1

Teuma jawetch banta muda daim 1590q 8qm901.3002008

23681984

PN BALAI PUSTAKA-JAKARTA bp